9
1 Abandu, kundu bâli kizi mamaata mu kihulu,
haliko bakoli tundukiirwi noꞌmulengeerwe muhamu.
Kundu bâli tuuziri mu kihulu namudidi,
si buno bakolaga mu mulengeerwe!* 9.1-2 Mataayo 4.15-16; Luka 1.79.
2 E Rurema! Keera ukakuza ikihugo kiitu,
halinde abandu baawe bakola mu kushambaalira.
Bagweti bagakizi shambaala imbere lyawe,
nga bandu ábali mu shambaalira umwimbu,
na nga bandu ábagweti bagaagaba iminyago.
3 Kundu bâli kizi bakoomeka ubuhiri mu mugongo,
haliko keera ukabuvuna-vuna.
Ukavuna kiri neꞌngoni zaꞌbandu baawe bâli kizi himbulwa mwo.
Keera ukashubi bakiza,
nga kwo ukatee bakiza mu maboko gaꞌBamidyani.
4 Ibiraato byaꞌbasirikaani, kiri neꞌbyambalwa byabo íbiyijwiragi imiko,
keera bikakabulirwa mu muliro, byanasingooka.
5 Umwana, keera akabutwa hiꞌgulu liitu.
Ee! Tukoli haabirwi umwana woꞌbutabana.
Uyo mwana agayimikwa, gira abe mutwali waꞌbandu baage.
Anakizi buuzibwa Muhanuuzi wa kahebuuza, na Rurema woꞌbushobozi,
na Daata weꞌmyaka neꞌmyakuula, na Muluzi woꞌmutuula.
6 Ubutwali bwage bugayamaga ho imyaka neꞌmyakuula!
Noꞌmutuula gwage, gutâye here.
Ye gayimikwa ku kitumbi kya mwami Dahudi.
Yubwo butwali, agabujingiriza, anabusikamye ku njira íkwaniini,
ukulyokera ku yikyo kyanya, halinde imyaka neꞌmyakuula!
Birya byoshi, Nahano woꞌbushobozi bwoshi, agabigira.
Mukuba, akuuziri abandu baage bweneene.† 9.6 Luka 1.32-33.
Nahano ahana Abahisiraheeri
7 Nahano akatumira beene Yakobo indumwa yoꞌkubakengula.
8 Iyo ndumwa, Abahifurahimu booshi, kuguma naꞌBasamariya, banamenya kwo Rurema ye kagituma.
Kundu kwokwo, bakiri mu yikangaata, iri bananaaka kwokuno:
9 «Inzitiro ízikayubakwa naꞌmatafaari, kundu zikayibumbulikaga haashi,
si tugaki ziyubakulula naꞌmabuye mabaaje!
Na kundu bakatema inguliro zeꞌbiti biniini byeꞌmizehituuni,
si ahandu haazo, tugayubaka neꞌbiti bihamu byeꞌmyerezi.»
10 Yabo Bahisiraheeri, kundu badetaga kwokwo,
haliko Nahano agabaleetera ibihaliiza ukulyoka mu bagoma ba Resini.
Keera akahidika yabo bagoma baabo.
11 Abaharaamu bakalyoka uluhande lweꞌsheere.
NaꞌBafirisiti, bakalyoka imuga.
Yabo booshi, bagayiji janganula Abahisiraheeri.
Kundu kwokwo, ubute bwa Nahano butazi hooha.
Aki bangwiragi ukuboko kwage, mu kulooza ukuhana abandu baage.
12 Yabo bandu, kundu Nahano woꞌbushobozi bwoshi akabahana,
si batanamúgalukira.
13 Kwokwo, Nahano agasingula Abahisiraheeri itwe noꞌmukira.
Ee! Lusiku luguma naaho, agaatema itavi lyeꞌkigazi, kuguma na lyeꞌkibingu.
14 Lirya itwe, bo bashaaja naꞌbanalushaagwa.
Noꞌmukira, bo baleevi, kwo bagweti bagabeesha.
15 Yabo bimangizi baabo, bakabahushiisa ikirari.
Kyo kitumiri keera bavujuuka.
16 Yabo booshi, bakoli bihuusiri, banakoli yifuuziri mu bitalaalwe,
banakola mu deta íbitali nga byo.
Kyo kitumiragi Nahano ataki shambaliiri imisore yabo.
Kiri neꞌfuuvi zaabo, na banamufwiri baabo, atakiri mu bakejeerera.‡ 9.16 atakiri mu bakejeerera kandi iri: atakiri mu simiisibwa nabo.
Kundu kwokwo, ubute bwage butazi hooha.
Aki bangwiri ukuboko kwage, mu kulooza ukuhana abandu baage.
17 Ikyanya abandu bagweti bagaagira amabi, gali mu ba nga muliro.
Guli mu tee singoola imigenge, gunabuli yigwima mu biti bihamu,
halinde ikyusi kinanunge bweneene mu kyanyaanya.
18 Kwokwo, Nahano woꞌbushobozi bwoshi, akoli rakiiri,
anakola agajigiivya ikihugo.
Gulya muliro, agaguduulika mu bandu, gira basingooke ngana.
Ndaanaye mundu úgaagira mbu akejeerere mwene wabo.
19 Yabo bandu, kundu bali mu manyulana imbande zooshi,
si baki shalisiri.
Ubuzinda, bagakizi lya kiri neꞌnyama zaꞌbaana baabo.
20 Manaasi agweti agateera Hifurahimu.
Hifurahimu naye, ali mu teera Manaasi.
Yabo bombi, banabuli teera Abayuda.
Kundu kwokwo, ubute bwa Nahano butazi hooha.
Aki bangwiri ukuboko kwage, mu kulooza ukuhana abandu baage.