11
Ubwami bwoꞌmutuula
1 Mu naludakwe weꞌkiti, mwo muli mu lyoka ishibwe.
Kwo na kwokwo, na mwiꞌkondo lya Yese, mwo mugalyoka umwami muhyahya.* 11.1 Bwigule 5.5; 22.16.
2 Uyo mwami, umutima gwa Nahano gugakizi beera mu kati kaage,
halinde anabe noꞌbwitegeereze, noꞌbwenge,
anashobole ukuhanuulana, anabe mwoꞌbushobozi.
Agaamenya Nahano, anakizi músimbaha.
3 Uyo mwami, agasiima ukukizi simbaha Nahano.
Ataganakizi twa ulubaaja ku byo ali mu bona naaho,
kandi iri ku byo ali mu yuvwa.
4 Haliko yehe, ikyanya agakizi twa ulubaaja lwaꞌbakeni, noꞌlwa ábatindimaziibwi,
kugakizi ba ku njira íkwaniini.
Ikyanya agakyula, abandu babi bagaahanwa,
na banangora-mabi banaminikwe.† 11.4 2 Batesaloniki 2.8.
5 Ikyanya agakulikira ukuli, noꞌkugira íbikwaniini,
lyo agalonga imisi, nga úkenyiiri umukaba.‡ 11.5 Bahefeso 6.14.
6 Imirunga ikolaga igakizi tuula kuguma neꞌbibuzi.
Kiri neꞌngwi, inakizi bwatala, inaluhuukire kuguma neꞌbyanahene.
Ingaavu neꞌndare, bigashangiira.
Noꞌmwana waꞌkalenge agakizi birongoora.§ 11.6-9 Hisaaya 65.25.
7 Ingaavu neꞌdubu bikola bigaliisa mu mutuula.
Abaana baabo banaluhuukire kuguma.
Indare ikola igakizi lya ibyasi nga ngaavu.
8 Umwana waꞌkalenge agashaatira hoofi noꞌmuhobo gwoꞌmujoka,
kundu guli gwa manjoka-njoka.
Uyo mwana agagufunda mwoꞌkuboko, ataganakomeresibwa.
9 Mu mugazi gwani mweru, batagaki komeresania, kandi iri kushereezania.
Nga kweꞌnyaaja iyijwiri mwaꞌmiiji,
kwo na kwokwo, neꞌkihugo kyoshi kigayijula mwaꞌbandu ábakoli yiji Nahano.* 11.9 Habakuki 2.14.
Imbohe zahanguulwa kwo zigaluke
10 Ku yikyo kyanya, umwami muhyahya wa mu mbaga ya Yese agayimuka, ali ngiꞌrembera mu bandu baꞌmahanga. Yabo booshi, bagamúkumanira. Na ngiisi ho agaaba atuuziri, hagalangashana bweneene.† 11.10 Barumi 15.12.
11 Ku yikyo kyanya, Nahano agashubi golola ukuboko kwage, anagalule abandu baage ábaki sigiiri imbohe mu kihugo kyeꞌHasuriya, na mu kyeꞌMiisiri, na mu kyeꞌPaturo, na mu kyeꞌHendyopiya, na mu kyeꞌHelamu, na mu kyeꞌShinaari, na mu kyeꞌHamaati, kiri na mu tulira.
12 Lirya irembera, Rurema agalishonia.
Ligakizi menyeesa Abahisiraheeri naꞌBayuda booshi ábakoli tuuziri mu mahanga,
kwo kundu bakashaabulwa mu mbande zooshi zeꞌkihugo,
haliko agaki bakuumania.
13 Yabo Bahifurahimu naꞌBayuda, batâye ki yuvwiranwe uluugi,
batanâye ki teerane.
14 Yabo bandu ba Rurema, bagayibiikaga kuguma, banagende uluhande lweꞌmuga,
gira bagendi teera Abafirisiti.
Banagende na mu batuuziri isheere, gira bagendi bashahula ibindu.
Bakola bagakizi twala Abahedoomu, naꞌBamohabu, naꞌBahamooni.
15 Nahano agakamya Inyaaja Ndukula, halinde hanaboneke injira íkamiri.
Kwokwo, agagolola ukuboko kwage, na mu kutuma imbuusi ngayu ku lwiji Hefuraati.
Yulwo lwiji, akola agalubunduula mweꞌnyiiji zirinda,
halinde abandu baage banajabuke áhayumiri.
16 Yabo bandu baage ábasigiiri, bagalonga injira yoꞌkulyoka mu kihugo kyeꞌHasuriya,
nga kwokulya Abahisiraheeri ba keera bakalyoka mu kyeꞌMiisiri.