13
Rurema agaahana i Babeeri
1 Ulya muleevi Hisaaya mugala Hamoozi, Rurema akamúyereka yaga mabone hiꞌgulu lyeꞌkihugo kyeꞌBabeeri:* 13.1 Hisaaya 47.1-15; Yeremiya 50.1–51.64.
2 Mushingage irembera ku mugazi úguyanuusiri!
Mukoobeze abasirikaani, gira bagendi teera akaaya keꞌBabeeri.
Mukuba, yabo Bababeeri, kundu abatwali baabo baki gweti bagayikangaata,
haliko, abagoma bagayifunda mu kaaya kaabo.
3 Yabo basirikaani, nie Nahano nie bahamagiiri,
keera nanabataluula, gira bagendi teera Abababeeri.
Bwo ngoli rakiiri, keera nabatuma, kwo bagendi bahana.
Banakoli shambaliiri ukugendi gira ngiisi byo nabatuma.
4 Yuvwagwi ngiisi kweꞌkigugu kyaꞌbandu kigweti kigagirigimba ku migazi!
Nahano woꞌbushobozi bwoshi, ye gweti úgabakuumania mu maami mingi,
gira balongage ukuteera i Babeeri.
5 Yabo basirikaani bakola mu yija ukulyoka ku mbeka zeꞌkihugo.
Na bwo Nahano akoli rakiiri bweneene, agabakoleesa,
babe bilwaniiso byage byoꞌkushereeza ikihugo kyoshi kyeꞌBabeeri.
6 E bandu beꞌBabeeri, mukizi banda akaluulu.
Ulusiku lwo Nahano agayiji mùtwira kweꞌmaaja, lukoli yegeriiri.
Ee! Rurema woꞌbushobozi bwoshi, akola agamùshereeza.† 13.6 Yuheeri 1.15.
7 Ku yikyo kyanya, abandu booshi bagayoboha, banatwike indege,
halinde imitima yabo inajajuke.
8 Yabo booshi bakola mu shenguka,
iri banababala.
Bakola mu lyanirwa,
nga mukazi úkola mu liibwa noꞌmukero.
Bakola mu lolana-lolana kwo mu kati keꞌkyoba.
Na bwo bakoli humiirwi, amalanga gaabo gakola mu yaga-yaga nga muliro.
9 Lolagi! Ulusiku lwo Nahano agaatwa kweꞌmaaja lukoli yegeriiri.
Lulya lusiku, lwo agayerekana kwoꞌburaakari bwage,
halinde abandu banahuumirwe.
Yikyo kihugo kyoshi, agakishereeza, kinahinduke mushaka.
Agaminika abanabyaha booshi ábakituuziri mwo.
10 Indonde íziri kwiꞌgulu, zigayidika mweꞌkihulu.
Kiri niꞌzuuba, ikyanya ligaboneka, nalyo ligayami yidika mweꞌkihulu,
kuguma noꞌmwezi.‡ 13.10 Hisaaya 34.4; Hezekyeri 32.7; Mataayo 24.49; Mariko 13.24-25; Luka 21.25; Bwigule 6.12-13.
11 Nahano adetaga kwokuno:
«Bwaꞌbandu ba mu kihugo bakoli bihuusiri, ngolaga ngabahana.
Ee! Ngahaniiriza banangora-mabi booshi.
Kundu balyagagi noꞌbwikangaate, si ngabumala lwoshi.
Na kundu bakiri mu tindimazania ku kanyaaro,
haliko nabo, ngabatindimaza, gira batakizi ki yikangaata.
12 Balya bandu, ngabaniihya kwo,
babulike nga nooro muguuhya.
Ee! Bagabulikaga nga nooro yeꞌHofiiri.
13 «Nie Nahano woꞌbushobozi bwoshi, bwo ngoli rakiiri, ngashagania igulu.
Kiri neꞌkihugo, ngakijuguuvya, kishaagage ku ndaliro zaakyo.
14 Abandu booshi beꞌBabeeri, bagakizi tibita bwalaafwe.
Bagatibita nga kasa, ku kyanya bakola mu kahiiva.
Ukutibita kwabo, kunabe nga kweꞌbibuzi bizira mungere.
Ngiisi mundu agaagira mbu atibitire mu beene wabo, ba mu kihugo kyabo.
15 Ngiisi yeshi úgagwatwa, agayami yitwa.
Ee! Bagayomekwa ingooti.
16 Abaana boꞌtulenge, ababusi baabo bagayibonera
ngiisi kwo bagayitwa, mu kunyanyagwa haashi.
Inyumba zaabo zigashahulwa mweꞌbindu.
Na bakaabo banakizi bimbiirwa.
17 «Lolagi! Ngashimya Abameedi kwo bagendi teera Abababeeri.
Yabo Bameedi, batangahooha, mbu bahaabwe iharija kandi iri inooro.
18 Si abasirikaani baabo bagakoleesa imyambi mu kuyiji yita imisore.
Batanakizi kejeerera utulenge, kandi iri abaana.»
19 Mu maami gooshi, ikihugo kyeꞌBabeeri kyo kilimbisiibwi bweneene.
Abandu baamwo, bayiyuvwiti hiꞌgulu lyakyo bweneene.
Kundu kwokwo, Rurema agabaminika,
nga kwo âli mali minika i Soodoma neꞌGomora.§ 13.19 Ndondeko 19.24.
20 Kalya kaaya keꞌBabeeri, katâye ki tuulwe mwo.
Si kagasigala mushaka, halinde imyaka neꞌmyakuula.
Ndaaye Muharaabu úwâye ki shinge mwiꞌheema lyage,
ndaanaye mungere úwâye ki gishe mwo.
21 Inyamiishwa naaho, zo zigatuula mwo.
Inyumba zaabo zigaashaka, zinayifunde mweꞌmirunga.
Banafufulu nabo, banayubake mweꞌngisha.
Noꞌtusa tugakizi guruka mwo.* 13.21 Hisaaya 34.14; Sefaniya 2.14; Bwigule 18.2.
22 Indama-kumulinga zigakizi yanira mu nyaala zaamwo.
Na kundu inyumba zishubi limbiri bweneene,
haliko, imirunga igakizi zimokera-mokera mwo.
Akaaya keꞌBabeeri kakolaga kagaahera lwoshi-lwoshi!
Isiku ízikasigiriiri, zikola nga ndaakizo.