19
Indumwa hiꞌgulu lyeꞌMiisiri
1 Ino ndumwa, iri hiꞌgulu lyeꞌkihugo kyeꞌMiisiri.
Lolagi! Nahano agweti agasuula umulindi ku kibungu,
gira agendi teera ikihugo kyeꞌMiisiri.
Buno, imigisi yaꞌBamiisiri ikola mu juguma imbere lyage.
Kiri naꞌBamiisiri boonyene, imitima yabo keera yajajuka, banakoli shengusiri.
2 Nahano adetaga kwokuno:
«Balya Bamiisiri, ngabateerania boonyene ku boonyene!
Ee! Umundu agagendi lwisa mwene wabo.
Noꞌmutuulani anagendi lwisa uwabo mutuulani.
Akaaya kaguma kagagendi lwisa akaabo kaaya.
Noꞌmwami muguma agagendi lwisa uwabo mwami.
3 Balya Bamiisiri, kwokwo, kwo ngabavuniisa imitima.
Bagakizi laguza, iri banaganuuza imizimu, kiri naꞌbalozi, naꞌbanamaleere.
Kundu kwokwo, ngiisi byo bagaaba bashungisiri, ngabishereeza ngana.
4 Yabo Bamiisiri, ngola gababiika mu maboko goꞌmwami mulangi.
Uyo mwami anakizi bakoleesa ku kahaati.»
Kwokwo, kwo Nahano Rurema woꞌbushobozi bwoshi adesiri.
5 Ulwiji Niire lukolaga lugakama ngenene!
Lunasigale naaho luumaguka.
6 Ingera za yulwo lwiji Niire, nazo zigaakama.
Inyiiji niini zigatondeera ukubaya buligo.
Zigayijula ibibingu bibolo, neꞌbyasi byaꞌkaliri.
7 Ibyasi byoshi íbimeziri ku ngombe yoꞌlwiji Niire bigayumaguka.
Kiri neꞌmbuto ízigaaba zabyalwa mu ndalo,
nazo zigayehuulwa neꞌmbuusi, zinamale.
8 Ikyanya inyiiji zigaakama, abadubi bagaabula umukolwa,
banatondeere ukugongeera, iri banakizi lira.
Kiri na ábali mu dubiisa injenga, nabo bagatwika indege.
9 Ngiisi ábali mu lingaania imirondo mu kitaani, bagajengeerwa.
Na ábali mu kihanga mweꞌmirondo, nabo bagashenguka.
10 Ee! Ngiisi ábali mu hanga imirondo, kuguma naꞌbandi bakozi booshi, bagatwika indege.
11 Si abahanuuzi beꞌSowani, biri bizeeze ngana!
Ikyanya bali mu hanuula Faraho,
si bali mu múshobania amagambo!
Kituma kiki bangaki yihaya kwokuno:
«Twehe, tuli bitegeereza bweneene!
Si tubusirwi mwiꞌkondo lyaꞌbaami ba keera!»
12 E Faraho! Balya bagingi baawe, hayagi bali?
Ngahwe! Iri bangahasha, bakumenyeese
ngiisi kwo Nahano woꞌbushobozi bwoshi ashungika hiꞌgulu lyeꞌMiisiri.
13 Abanabwenge baawe beꞌSowani, si keera bakahendwa!
Kiri na ábalyosiri i Mefiisi, nabo bakoli tebesiri.
Balya batwali beꞌMiisiri, keera bakabashereegeza ikihugo.
14 Yibyo birongoozi, Nahano keera akabibiika mwoꞌbuyingi-yingi.
Kwokwo, ngiisi byo bakola mu hanuulana,
biri bya kuhaburana naaho.
Keera bakalalusa ikihugo kyeꞌMiisiri,
halinde abandu baakyo bakola nga balalwe ábali mu gaaya-gaaya mu bishazi byabo.
15 Mu balya Bamiisiri booshi, ndaaye úwangatabaalana, aba mutwali, kandi iri mugunda, aba mundasumbwa, kandi iri mwana mwanuke.
Abamiisiri bâye ki yikumbe Nahano
16 Nahano woꞌbushobozi bwoshi, ikyanya agahaniiriza Abamiisiri ku bushobozi bwage, bagaaba bakoli yobohiri nga bakazi, banalenge mweꞌkinyukura. 17 Beene Yuda bagakizi teera Abamiisiri ikyoba bweneene! Ngiisi kyanya Abamiisiri bagakizi bakengeera, bagakizi lenga mweꞌkinyukura. Mukuba, Nahano woꞌbushobozi bwoshi akoli bashungikiiri ubuhanya naaho.
18 Ku yikyo kyanya, abandu ba mu twaya tutaanu tweꞌMiisiri, bagaaba bali mu deta indeto yeꞌkiheburaniya, banalagaanie kwo bagayibiika ku Nahano woꞌbushobozi bwoshi. Mu yutwo twaya, kaguma kagayinikwa iziina Kaaya kiꞌzuuba.*19.18 Akaaya kiꞌzuuba kandi iri, Heryopoli. Kaaya ka mu kalira koꞌlwiji Niire, irindi sobaanuro «Kaaya koꞌBushereere».
19 Ku yikyo kyanya, ha kati keꞌkihugo kyeꞌMiisiri, hagabiikwa akatanda koꞌkusiriigiza Nahano kwaꞌmatuulo. Na ku lubibi lwakyo, hagaaba inguliro yaꞌmabuye, hiꞌgulu lyoꞌkukengeezania ibya Rurema. 20 Iyo nguliro, igakizi menyeesa abandu kwo Nahano woꞌbushobozi bwoshi akola mu kihugo kyabo kyeꞌMiisiri. Kwokwo, ikyanya bagateerwa naꞌbagoma, banabe bali mu tabaaza Nahano, haaho agayami batumira umundu woꞌkubakingira, anabaguluule.
21 Kwokwo, kwo Nahano agayimenyeesa imwabo, halinde banakizi yemeera kwo ye Nahano, banakizi múyikumba, iri banamútangira amatuulo mingi. Neꞌkyanya bagakizi biikira Nahano indahiro, banakizi zikwiza. 22 Yabo Bamiisiri, kundu Nahano agabahaniiriza, halikago ha nyuma, agashubi bakiza. Ikyanya bagamúgalukira, agayuvwa ngiisi kwo bali mu mútabaaza, anabakize.
23 Ku yikyo kyanya, mu kihugo kyeꞌMiisiri mugalenga injira mbamu yoꞌkugenda i Hasuriya. Kwokwo, Abahasuriya bagakizi balamira i Miisiri. NaꞌBamiisiri nabo, banabalamire i Hasuriya. Yabo bandu booshi, banakizi yikumba Rurema kuguma.
24 Ku yikyo kyanya, i Hisiraheeri igashalagira ikihugo kyeꞌMiisiri na kyeꞌHasuriya. Kwokwo, kwo Nahano agagashaanira amahanga gooshi. 25 Nahano woꞌbushobozi bwoshi, agabagashaanira kwokuno: «E Bamiisiri, mukolaga bandu baani. Na niinyu mwe Bahasuriya, nꞌgamùbumba nienyene. Kiri na niinyu, mwe Bahisiraheeri! Muli beꞌmwani. Kwokwo, mweshi mukoli gashaniirwi!»
*19:18 19.18 Akaaya kiꞌzuuba kandi iri, Heryopoli. Kaaya ka mu kalira koꞌlwiji Niire, irindi sobaanuro «Kaaya koꞌBushereere».