38
Mwami Hezekiya alwala
(2 Baami 20.1-11; 2 Kutondobola 32.24-26)
1 Ku yikyo kyanya, mwami Hezekiya analwala bweneene, anahambiri fwa. Kwokwo, umuleevi Hisaaya mugala Hamoozi, anayiji mútanduula, anamúbwira kwo Nahano adetaga kwokuno: «Utagaki kira, si ukola ugaafwa. Aaho! Ulingaanie bwija amagambo ga mu nyumba yawe.» 2 Hezekiya anahindukira ikibambaazi, anahuuna Rurema kwokuno: 3 «E Nahano, nakuyinginga ukengeerage ngiisi kwo nâli kizi kukolera mu kati koꞌbwemeera, na ku mutima gwani gwoshi. Ee! Ukengeere ngiisi kwo nâli kizi gira íbikwaniini imbere lyawe.» Haaho, Hezekiya anagwatwa neꞌkifufu, analira.
4 Lyeryo Hisaaya, Nahano anashubi mútumira indumwa 5 kwo agendi bwira Hezekiya kwokuno: «Ndi Nahano Rurema wa shokuluza wawe Dahudi. Galya mahuuno gaawe, keera nagayuvwa, nanabona neꞌmigenge yawe. Ku yukwo, ngakuyushuulira imyaka ikumi niꞌtaanu ku burambe bwawe. 6 Na ngukize mu maboko ga mwami weꞌHasuriya, kuguma na kano kaaya kooshi. Ee! Kano kaaya, ngakizi kalanga.
7 «Naꞌkalangikizo koꞌkukuyereka kwo ngaagira nga ngiisi kwo nꞌgakulagaania, ko kaakano: 8 Nie Nahano, ngagalula ikimbehwa kiꞌzuuba indambo ikumi, ku lwingo úlukayubakwa na Ahaazi.»
Iri Nahano akayusa ukudetaga kwokwo, yikyo kimbehwa kyanagaluka indambo ikumi.
9 Uyo mwami Hezekiya, ikyanya akaba keera akiraga, anayimba ulwimbo lwoꞌkuhuuza Rurema kwokuno:
10 Nâli gweti ngayibuuza: Si uburambe bwani, buki ryagagi ha kati naaho!
Kundu kwokwo, ngolaga bu genda i nakwere.
Aahago! Iyo myaka íkinzigiriiri, ka ngaginyagwa?
11 Nanashubi deta: Ala nie! Ndâye ki bone Nahano mu bagumaana.
Mu batuuziri mu kihugo, ndâye ki bone umundu yeshi-yeshi.
12 Uburambe bwani bukolaga ngiꞌheema lyoꞌmungere,
lyo bali mu kulula haashi, banalishaaze.
Yoho wee! Si ngola mu malaga, ngoꞌmulondo gwoꞌmuhaazi ali mu bungiriza.
Mu lusiku luguma naaho, lyo wayami mbisa ku mbeka yeꞌsiku zaani.
13 Kwokwo, nanahisa ubushigi bwoshi, ngweti ngabululuka.
Nahano ali nga ndare, mu kuvungula-vungula amavuha gaani.
Mu lusiku luguma naaho, lyo ukambisa ku mbeka yeꞌsiku zaani.
14 Nâli gweti ngaalira nga kalembe-rembe,
iri na ngongeera nga ngunde.
Ngoli luhiri bweneene, mu kukonolera amasu mwiꞌgulu.
E Nahamwitu! Keera nashundeera ma!
We kongwa we, undabaalage!
15 Bikagi byo nangaki deta?
Yibyo byoshi, Nahano keera akambwira kwo bigakoleka,
keera anabikwiza.
Bwoꞌmutima gwani gushuba mu lyanirwa,
kyo kitumiri ngakizi ba mutuudu isiku zaani zooshi.
16 E Nahamwitu! We tumiri tukiri ho.
We na tumiri umutima gwani gukiri mugumaana.
We kangiza, wanahanguula kwo mbe ngiri ho.
17 Kundu njubi yuvwiti umwizingeerwe, we kaguhindula bube buhiirwa.
Wanangiza na Narufu, wanashuluguta ibyaha byani inyuma lyawe.
18 Iyo munda i nakwere, ndaaye úwangakuhuuza yo.
Ikyanya bali mu manukira yo, batangaki kuyimbira inyimbo.
Ee! Abafwiri batangaki kubiika kwoꞌmulangaaliro kwo ugabatabaala.
19 Si ábakiri bagumaana, boohe, bo bali mu kuhuuza,
nga kwo naani ngweti ngaagira zeene.
Abashosi bakwaniini bakizi menyeesa abaana baabo ngiisi kwo uli mwemeera.
20 Nahano keera akangiza!
Ku yukwo, tugakizi shiiba mu nyumba yage isiku ziitu zooshi, tugweti tugamúlakiza inyimbo.
21-22 Kwokwo, Hezekiya akabuuza umuleevi Hisaaya: «Kalangikizo kaki ákagayerekana kwo ngaki shubi genda mu nyumba ya Nahano?» Hisaaya, ti: «Muleete ikitumbula kyoꞌmutiini, munakibiike ku kirole kya mwami. Kwokwo, lyo alonga ukukira.»