62
I Yerusaleemu yaguluulwa
1 Bwo nguuziri akaaya keꞌYerusaleemu bweneene,
ngagenderera ukukizi kadetera, ndanâye hulike.
Ee! Akaaya keꞌSayuni, ndagaleka ukukahuunira, halinde mbone kwo kaguluulwa,
kanatanguule nga mulengeerwe gwa ku lukula.
Íbikwaniini bikizi boneka mu kati kaako.
Noꞌbukize bunakizi kayaka mwo ngiꞌtara.
2 E Yerusaleemu, ibinyamahanga byoshi bigaabona amiija gaawe.
Abaami baabo banabone ubulangashane bwawe.
Haaho, lyo Nahano yenyene aganakuyinika iziina lihyahya.
3 Unabe ukola ngoꞌlushembe lweꞌkyami úlubuyahiri mu maboko gaage.
Mukuba ye Rurema wawe.
4 Nahano ayamiri akusiimiri.
Kiri neꞌkihugo kyawe, kikola kigaaba nga muhya wage.
Ku yukwo, iziina lyawe, litagaki ba Mujandwa, kandi iri Mushaka.
Si we kola ugaaba «malega ga Nahano»,
neꞌkihugo kyawe kigadetwa «muhya wa Nahano».
5 Nga kwoꞌmusore mutabana ali mu ba mwene umuhya,
kwo na kwokwo ulya úkakubumba agaaba yibalo.
Na nga kwoꞌmushosi ali mu shambaalira mukaage,
Kwo na kwokwo Rurema wawe agakizi kushambaalira.
6 E bandu beꞌYerusaleemu, inzitiro ziinyu keera nazibiika kweꞌnaazi.
Yizo naazi zigakizi mùhuunira ubushigi niꞌzuuba.
E balaliizi, si mwe muli mu tabaaza Nahano! Aahago! Mutâye hulike.
7 Mutatooze Nahano iro, mútazi bona kwo asikamya akaaya keꞌYerusaleemu,
kanakizi huuzibwa naꞌbandu booshi mu kihugo.
8 Nahano akabiika indahiro ku bushobozi bwage kwokuno:
Ku kasiisa, ndâye ki heereze ingano zaawe, zibe zaꞌbagoma biinyu.
Ndanâye ki leke ibinyamahanga kwo biyiji nywa ku divaayi yinyu,
keera mwanagiyitubanulira kwo.
9 Iyo ngano, bwo mwe mugweti mugagiyimbula,
mwenyene mugaagilya, iri munanyivuga.
Kiri neꞌyo mizabibu, bwo mwe mugweti mugagikanda,
mwenyene mugaanywa idivaayi yayo mu mbuga zeꞌnyumba yani.
10 E batuulaga beꞌYerusaleemu, muhuluke mu kaaya!
Ee! Muhulukage, mulingaanize abandu biinyu injira, gira bagaluke.
Ngiisi áhali ibihomogolo, muhaseemanie.
Na áhali amabuye, mugalyosagye.
Mubiike irembera, likizi languula abandu ho bagalenga.
11 Nahano agweti agabwira abandu baꞌmahanga gooshi kwokuno:
«Mubwire abatuulaga beꞌSayuni, kwo Lukiza wabo akolaga mu njira.
Anali neꞌmbembo yage, gira abahembe.*62.11 Hisaaya 40.10; Bwigule 22.12.»
12 Abandu ba Rurema bagakizi detwa Bataluule.
Banashubi detwa Bandu bo Nahano akaguluula.
Akaaya keꞌYerusaleemu kagakizi detwa Kaaya ko Rurema asiimiri,
na kandi Kaaya ákatakiri mu jajaakwa.