6
Abagoma basokanana akaaya keꞌYerusaleemu
1 «E beene Binyamiini, mutibitage!
Si ikiteero kikola mu lyoka uluhande lweꞌmbembe,
munakola mugashereezibwa lwoshi!
Mulyokage i Yerusaleemu, muhunge.
Mulakize ibibuga mu kaaya keꞌTekowa.
Munashonie irembera mu keꞌBeeti-Hakeremu, gira likizi kengula abandu.
2 E kaaya keꞌSayuni, kundu uli nga munyere úsimisiizi, unanonosiri,
haliko ngola ngakushereeza.
3 Abangere bagakusokanana, bali noꞌbuso bwabo bweꞌbibuzi,
banashumbike ha butambi lyawe.
Ngiisi muguma agakizi teereza haage-haage.»
4 Yabo bangere bakola mu twa ikitambira, mbu:
«Muyilingikanie, tuteerage abatuulaga beꞌSayuni.
Tuteere ku kyanya kyaꞌkalenge-renge.»
Ha nyuma, banashubi deta: «Yayewe! Twakeereza! Si izuuba keera lyasooka!
Aaho! Kakola kabigingwe, neꞌkihulu kyatoola.
5 Ku yukwo, tugirage tukabateere bwobuno bushigi.
Inyumba zaamwo nzitire, tukazishereeze lwoshi!»
6 Nahano woꞌbushobozi bwoshi, adetaga kwokuno:
«Muteme ibiti, munalunde noꞌluvu, bibe kishonero, halinde muteere akaaya keꞌYerusaleemu.
Ee! Yako kaaya kakwaniini kahanwe.
Mukuba, abandu baamwo bagweti bagavindagazania bweneene.
7 Amabi gakola mu hinga mwo,
nga kulya amiiji gali mu huluka mu kirigo.
Abandu baamwo bakola mu teerana, iri banayitana.
Akaaya kooshi kakolaga mwaꞌkamburugu.
Byo ngweti ngakabona mwo naaho, gali malwazi neꞌnguma.
8 Ku yukwo, e Yerusaleemu! Bwo ngweti ngakuhanuula, unyuvwagwe!
Buzira kwokwo, ngakulyoka mwo,
na ngugire ishamba limaata,
halinde abandu batanaki kutuule mwo.»
9 Nahano woꞌbushobozi bwoshi, adetaga kwokuno:
«Ngiisi ábaki sigiiri, mubakuumanie.
Kubaagage nga kwo muli mu shondooza imizabibu mu ndalo.
Bali mu shondooza imihuli ku ngiisi itavi.»
Abandu beꞌYerusaleemu batayuvwa Nahano
10 Nanashuvya: «Nyandagi ye nangakengula, halinde ananyuvwe?
Si yaba bandu booshi balyagagi babitwitwi!
Ikyanya ndi mu bakengula, batali mu nyuvwa.
Si igambo lyawe, bali mu lijambuura, batanalitwaziizi.
11 E Nahano, bwo ukoli rakiiri hiꞌgulu lya yaba bandu, naani, kwo na kwokwo.
Yubwo buraakari bwawe, ngoli luhiri noꞌkubuhangirira.»
Nahano anashubi mbwira: «Yubwo buraakari, ugendi buyonera ku baana mu njira,
kiri na ku misore, ngiisi ho ibwatiiri.
Kiri abashosi na bakaabo, ngakizi bashavurira,
kiri naꞌbashaaja kongotwe.
12 Inyumba zaabo, zigahaabwa abandi bandu,
kiri neꞌndalo zaabo, na bakaabo.
Ngabahana ngana-ngana ku bushobozi bwani.»
Kwokwo, kwo Nahano adesiri.
13 «Yabo bandu booshi bali bazizi beꞌbindu,
ukushaagira ku bagunda, halinde ku bakulu.
Kiri naꞌbaleevi naꞌbagingi, booshi ziri ngunge naaho.
14 Yabo bandu, kundu abandu baani bakoli komeresiri bweneene,
si inguma zaabo bali mu zilunga ku maleeza kwo.
Bagweti bagaadeta, mbu: “Umutuula guli ho! Umutuula guli ho!”
Kiziga ndaagwo úguli ho!
15 Ibitalaalwe byo bali mu gira, ka bikabateera ishoni? Aahabi!
Kiri noꞌkuyiyubaara, ndaakwo!
Ku yukwo, ikyanya ngaahana abandi, nabo ngabahanira kuguma.
Balya booshi baganyanyagwa haashi.»
Kwokwo, kwo Nahano adesiri!
16 Nahano adetaga kwokuno: «Muyimange mu mashangaaniza, muloleekeze bwija.
Irya njira nyiija ya kare, mubuuze ngiisi ho iri.
Ee! Irya njira nyiija, ibe yo mugakizi lenga mwo.
Iri mwangagira kwokwo, lyo mugaluhuuka.
Haliko, balya bandu banashuvya:
“Iyo njira nyiija, twalahira, kwo tutagagikulikira.”
17 Nꞌgabiika abalaliizi, bakizi mùbwira, ti:
“Yuvwi! Ikibuga kyoꞌkumùkengula keera kyalaka.”
Halikago, mwanadeta: “Aahabi! Tutagatwaza!”
18 Ku yukwo, e binyamahanga mweshi! Mundegage amatwiri.
Yabo bandu beꞌBuyuda, mulolage bwija ngiisi kwo ngabagira.
19 Munyuvwirize bwija!
Yabo Bayuda, bwo bakoli higwiri, ngabayogogoza ngana-ngana!
Kundu nâli kizi bakengula,
nanakizi bayigiriza, haliko batanandwaza.
20 E bandu beꞌBuyuda, kituma kiki muki gweti mugandeetera umubadu ukulyoka i Sheeba?
Na kituma kiki mukiri mu gendi nzeehera amalaasi i mahanga?
Kundu mwangakizi nziriigiza amatuulo geꞌbitugwa ku katanda,
haliko, ndagaki gayemeera!
Mukuba, gataki nzimisiizi.»
21 Ku yukwo, Nahano adetaga kwokuno:
«Yabo Bayuda, ngolaga ngabasiitaza.
Ngagwisa abashosi kuguma na bagala baabo,
naꞌbatuulani, kiri naꞌbiira. Booshi bagafwira kuguma.»
Ikiteero ukulyoka imbembe
22 Nahano adetaga kwokuno:
«Langiizi! Abasirikaani bakola mu lyoka imbande zeꞌmbembe.
Bali mulala úguhimbiri, banalyosiri mu mbeka zeꞌkihugo.
23 Yabo basirikaani bahagasiri imiheto naꞌmatumu.
Balyagagi balangi, batanali mu yuvwirana indengeerwa.
Ikyanya bali ku fwarasi zaabo, bali mu yamuuka nga midunda mu nyaaja.
E bandu beꞌSayuni! Yabo bagoma bakola ibiringiini, kwo bayiji mùteera.»
24 Abandu beꞌYerusaleemu banadeta: «Yabo basirikaani, keera tukayuvwa imyazi hiꞌgulu lyabo, tunakoli shengusiri.
Ala twe! Tukolaga noꞌlushunguti ngoꞌmukazi úgweti úgaliibwa noꞌmukero.
25 Hatagire úgashubi hinga, kandi agenda mu mutalimbwa!
Si balya bagoma bakola yo, banali neꞌngooti!
Ngiisi ho twangalenga, bali mu tuteera ikyoba.»
26 Nahano adetaga kwokuno: «E bandu baani,
muyambale amasuuzu, munayivuruguuze mu munyota-kiiko.
Mubululuke nga úwafwirwa noꞌmwana weꞌkininga.
Mukuba, masaasa atabukwa, umushereeza akola agayija.
27 «E Yeremiya, keera nakubiika ukizi geza abandu baani,
nga kwoꞌmukozi ali mu geza ibyuma mu muliro.
28 Balya bandu baani, si booshi bali bahuni, banakola mindagabika.
Bagweti bagabanganizania.
Bali bakomu nga mulinga, kandi iri nga kyuma.
Booshi bali banangora-mabi.
29 Umuliro gwoꞌmuduba, kundu guli mu duuta bweneene,
haliko ikikwi kitali mu lyoka ku miringa.
Kwokwo, abandu baani nabo, kundu bakola mu leezibwa mu muliro,
haliko ubuligo bwabo butali mu bamala kwo.
30 Kyo kitumiri bagakizi detwa kwo iri iharija íyajajaakwa.
Mukuba, Nahano keera akabajajaaka.»