12
Ikibuuzo hiꞌgulu lya banangora-mabi
1 E Nahano, ngiisi kyanya ndi mu kuleetera ulubaaja,
unayamiri uli mu lutwa ku njira íkwaniini.
Aaho! Lekaga ngubuuze: Balya banangora-mabi, kituma kiki bakiri mu genduukirwa?
Si balyagagi ngalagaaja! Aaho! Kituma kiki bayamiri bajeberiiri?
2 Balya banabyaha booshi, si we kababyala, keera banayisa imizi bweneene!
Keera banagangaala, banakola mu tongeka kweꞌbitumbwe.
Utunwa, kundu tuli mu kudeta bwija,
haliko mu mitima yabo, batakutwaziizi.
3 E Nahano, uyiji-yiji ngiisi byo ndi mu tona mu mutima gwani,
unali mu kizi bigeza.
Aahago! Yabo banangora-mabi, ubayobore, nga bibuzi íbigagendi tongeerwa.
Ee! Ubahandule, unabalindirize ku kyanya bagayitirwa kwo.
4 Kino kihugo kigayama kiyumagusiri halinde mangoki?
Si ibyasi keera bikahangalala!
Ibitugwa nabyo bikola bigaamala, kiri noꞌtunyuni.
Abandu banakola mu deta: «Si Rurema atabwini íbiri mu tukoleka kwo!»
Na íbitumiri yibyo byoshi bikola mu koleka, bwaꞌbandu bakoli bihuusiri.
5 Nahano anambwira: «Ikyanya ugweti ugaagira ndangwe naꞌbandu naaho, uli mu luha.
Aaho! Ikyanya ugayigereeraga ifwarasi, kuti kwo bigaaba?
Kwo na kwokwo, iri wangagwa mu kihugo kizira bihangatiizi,
kutagi kandi wangagenda mu lubako lwa ku ngombe yoꞌlwiji Yorodaani?
6 Si na beene winyu, kiri naꞌbeꞌmbaga yawe, bali mu kutanga mu bagoma,
banali mu kuyamiriza, ti yuhuu!
Balya bandu, kundu bagweti bagakulyeryega, hatagire ye ugayemeera!»
Rurema ahala inyumba yage naꞌbandu baage
7 Nahano ashubi detaga kwokuno:
«Balya Bahisiraheeri, kundu bashuba beꞌmwani, si keera nꞌgabajanda.
Na kundu bashuba katoni kaani, keera nꞌgababiika mu maboko gaꞌbagoma.
8 Na kundu nâli mali batoola,
haliko bakoli gweti bagandundumira, nga ndare za mu lubako.
Kwokwo, ngoli bashombiri ngana-ngana!
9 Abandu baani bakola mu hindwa nga kanyuni ákali mu hindwa ngiisi luhande na banyunda.
Ngahwe! Mugendi kuumania inyamiishwa zooshi,
gira nazo ziyiji balya.
10 Abangere bingi, keera bayilala mu ndalo yani yeꞌmizabibu, banagishereeza.
Iyo ndalo, kundu ishuba nyiija, haliko bagagilibata-libata mwo,
banagihindula libe ishamba.
11 Keera bakanagisivya ngana-ngana,
inakola mushaka imbere lyani.
Yayewe! Kirya kihugo kyoshi, kikolaga ishamba, ndaanaye úkitwaziizi.
12 «Hooshi ku marango, abasirikaani bakola mu yiji shahula ibindu.
Yabo basirikaani, nienyene nie kabatumira, gira bashereeze ikihugo kyoshi,
ndaanaye mundu úgakituula mwo ku butoge.
13 Abandu baani, kundu bakabyala ingano,
si bakola bagayimbula imigenge.
Na kundu bâli kizi yitubanula mu kukola, ndaako kamaro balongaga.
Buno, mu kuyimbula, bakola bagateteerwa,
bwo ngoli barakariiri.»
Rurema agayimula ábali ha butambi lyaꞌBahisiraheeri
14 Nahano adetaga kwokuno: «Yibyo binyamahanga bibi íbituuziri ha butambi lyaꞌbandu baani Abahisiraheeri, keera byashereeza ikihugo kyo nꞌgabaheereza. Ku yukwo, nabyo ngabishikula mu bihugo byabyo. Na ngize beene Yuda mu maboko gaabyo. 15 Si ikyanya ngaaba keera nabishikula, ngashubi bikejeerera, na mbigalulire mu bihugo byabyo, ngiisi mundu imwabo. 16 Yaho keera, bikayigiriza abandu baani ukubiika indahiro kwiꞌziina lyoꞌmuzimu Baali. Haliko ikyanya ngabigalulira imwabo, lyo bigaagira umwete gwoꞌkuyiga bwija ngiisi kwaꞌbandu baani bali mu nyikumba, binakizi biika indahiro kwiꞌziina lyani, ti: “Nga kwo Nahano ayamiri ho.” Aaho! Iri byanganyemeera, nabyo bikabuli tuulanwa naꞌbandu baani, binagenduukirwe. 17 Si ngiisi mulala úgutagaba gunzimbahiri, ngagushikula lwoshi, gunazimiire.» Kwokwo, kwo Nahano adesiri.