17
Ibyaha byaꞌBayuda
1 Nahano adetaga kwokuno: «Abayuda, ibyaha byabo, bitangahotolwa. Yibyo byaha, keera bikahokoororwa mu mitima yabo naꞌkalamu keꞌkyuma. Bikoli yandisirwi kiri na ku tugongo twoꞌtutanda two bali mu tangira imizimu kwaꞌmatuulo. 2 Kiri naꞌbaana baabo, bali mu genda ha yutwo tutanda, banakizi yikumba hoꞌmuzimu Hasheera. Yutwo tutanda, tukoli biisirwi mwiꞌdako lya ngiisi kiti, na ku ngiisi irango.
3 «E Bayuda, bwo mugweti mugaagira kwokwo, ngaheereza abagoma biinyu umugazi gwani. Ngabaheereza noꞌbugale bwinyu bwoshi. Na íbitumiri ngaagira kwokwo, bwo mukoli bihuusiri hooshi mu kihugo kiinyu. 4 Yikyo kihugo, kundu nâli mali gwanwa namùheereza kyo, si buno ngola ngamùnyaga kyo, munagendi ba baja i mahanga. Mukuba, uburaakari bwani, bukoli yasiri ngana nga muliro. Gutanâye zime, halinde imyaka neꞌmyakuula!»
Ukulangaalira Nahano, kandi iri abandu
5 Nahano ashubi detaga kwokuno: «Ngiisi úbiisiri umulangaaliro ku bandu,
anabe ali mu yihega ku bushobozi bwabo, iri adaasirwi.
Mukuba, agaaba akoli jaaziri Nahano mu mutima gwage.
6 Uyo mundu, agaaba nga hishungu-shungu mwiꞌshamba, hazira mundu.
Yaho, hahangalusiri bweneene! Noꞌluvu, lulyagagi lwa muloba.
Yabo bandu, ndaalwo lusiku bangagenduukirwa!
7 Haliko, ngiisi úbiisiragi umulangaaliro imwa Nahano,
yehe, agaaba agashaniirwi.
8 Umundu mwene uyo, agaaba nga kiti íkikabyalwa hoofi naꞌmiiji,
halinde imizi yakyo iri mu yikira áhali amiiji.
Kiri neꞌkyanya izuuba liri mu daruula, yikyo kiti kitangayoboha.
Ibyasi byakyo, biyamiri bidoohiri.
Kiri neꞌkyanya invula iri mu ba yahangama, kitali mu gerania.
Si kiyamiri kiri mu tongeka kweꞌbitumbwe.
9 «Umutima gwoꞌmundu, guli mu tebana bweneene, ukuhima ibindi byoshi,
gutanâye kire.*17.9 Ndondeko 6.5.
Ndaaye úwangasobanukirwa ngiisi kwo guli.
10 «Kundu kwokwo, niehe Nahano, imitima yaꞌbandu, ndi mu giloleekeza.
Kiri neꞌnzaliro zoꞌmundu, ndi mu zigahiriza,
ninamúhembe ukukulikirana na ngiisi kwo akakola.
11 Abandu, iri bangagala ku njira yoꞌkugungana,
bali mu ba nga kanyuni ákali mu laalira amagi go katakateera.
Ikyanya bali mu ba baki ryagagi misore, ibindu byabo biri mu yami bamalira.
Na mu kuheza, banaboneke ku bweranyange kwo bali bahwija.»
12 Ukulyokera ku ndondeko, inyumba ya Rurema iri mu gingikwa, nga kitumbi kyeꞌkyami.
Iyo nyumba, iri mwoꞌbulangashane, hanali handu hiitu heeru.
13 E Nahano! We Abahisiraheeri babiisiri kwoꞌmulangaaliro.
Halikago, ngiisi ábagakujajaaka, bagateezibwa ishoni.
Ee! Ngiisi ábagakuyihandula kwo,
boohe, baganyerera ngiꞌziina íriyandisirwi mu luvu.
Yabo banakuhambwa, bagaaba bajaziiri Nahano,
anali ye shyoko íri mu leeta ubulamu.
Amahuuno ga Yeremiya
14 E Nahano! Ungizagye, lyo ngira lwoshi-lwoshi.
Unanguluule, lyo nguluulwa ngana-ngana.
Si wehe, we ngweti ngayivuga!
15 Abayuda bagweti bagambonyoleza mbu:
«Igambo lya Nahano, liryagagi hayi?
Ngahwe! Lekaga ngana likoleke, nga kwo ukagwanwa walideta.»
16 E Nahano! Si we kambiika mbe mungere, ndanali mu kutibita.
Lulya lusiku lweꞌkihano, ndaluyifwijiri mbu luhike.
Aahago! Byoshi byo nâli kizi deta, wenyene ubiyiji-yiji.
17 Ku yukwo, utandeere ikyoba.
Si ku kyanya kyaꞌmakuba, wehe naaho, we ndi mu tibitira.
18 Balya bandu, bagweti baganvindagaza.
Aaho! Ubateezagye ishoni. Si ndabe nie ugaziteeza.
Boohe, babe bo ugaleeza mweꞌkinyukura.
Si ndabe nie gakilenga mwo!
Balya bandu, ukizi bahaniiriza, unabazimiize lwoshi.
Amategeko hiꞌgulu lyeꞌSabaato
19 Nahano anambwira kwo ngendi yimanga kwiꞌrembo lyaꞌkaaya keꞌYerusaleemu, na nyimangire ku mulyango gwo mwami ali mu lenga mwo, na ngenderere halinde ku gindi yoshi, 20 na ngendi menyeesa abandu kwokuno: «E baami beꞌBuyuda, muyuvwagwe igambo lya Nahano, kiri na mweshi mwe mutuuziri mu kaaya keꞌYerusaleemu, na mu kihugo kyoshi kyeꞌBuyuda.
21 «Nahano adetaga kwokuno: “Ku lusiku lweꞌSabaato, mutakolwe kwo mwakizi betula imiteekerwa, mutanagiyingirane mu kaaya keꞌYerusaleemu. 22 Ku yulwo lusiku, hatagire úgahulukana umuteekerwa mu mwage. Hatanagire byoshi-byoshi byo mugalukola kwo. Si yulwo lusiku lweꞌSabaato, mukizi lundaluulira, nga kwo nâli kizi bwira bashokuluza biinyu. 23 Si boohe, batakanyuvwa, batananzimbaha. Bâli riiri mindagabika. Na kundu nâli kizi bahana, batanandwaza.”
24 «Nahano ashubi detaga kwokuno: “Mwehe, mukwaniini mukizi nzimbaha. Iyo miteekerwa, mutakizi gibetula ulusiku lweꞌSabaato, mbu mugiyingirane mu kaaya. Hatanagire hyo mugalukola kwo. Haliko, lulya lusiku, mukizi lundaluulira.
25 «“Iri mwangakizi nzimbaha, abaami naꞌbaluzi bagakizi yingira mu marembo ga kano kaaya kiinyu, halinde imyaka neꞌmyakuula! Ku kyekyo kitumbi kyeꞌkyami, hagakizi yima abaami ba mwiꞌkondo lya Dahudi, banakizi yija, bashoniri ku fwarasi, na mu magaare gaabo, bali kuguma naꞌbatuulaga beꞌYerusaleemu, kiri naꞌbandi Bayuda booshi. Kwokwo, kano kaaya kagayama katuuziri mwaꞌbandu, halinde imyaka neꞌmyakuula. 26 Balya bandu bagakizi yija ukulyoka i Yerusaleemu, na mu tundi twaya tweꞌBuyuda, noꞌtwa Binyamiini, kiri na mu tugangazi tweꞌmuga, na mu migazi, noꞌluhande lweꞌkisaka. Balya booshi, bagakizi yija mu nyumba ya Nahano, gira bayiji mútangira mwaꞌmatuulo goꞌkusiriiza lwoshi, naꞌgandi matuulo. Bagatanga kiri noꞌmushyano, noꞌmubadu, naꞌgandi matuulo goꞌkutanga kongwa imwage.
27 «“Haliko, hali ikyanya mutangandwaza, munakizi koleesa ulusiku lweꞌSabaato nga zindi-zindi siku, munakizi lubetula kweꞌmiteekerwa mu kaaya. Iri mwangagira kwokwo, kano kaaya, ngaduulika imiryango yako kwoꞌmuliro. Yugwo muliro, gunagendi jigiivya kiri neꞌnyumba nyiija zaꞌbaami. Ndaanaye úgaahasha ukuguzimya.”»