30
Nahano âye ki galulire abandu baage imwabo
1-2 Nahano Rurema waꞌBahisiraheeri, anashubi bwira Yeremiya kwokuno: «Ewe! Byo ngolaga ngakubwira, ubiyandike mu kitaabo. 3 Mukuba, abandu baani Abahisiraheeri, mu siku ízigayija, ngabalyosa mu mbohe, bali kuguma naꞌBayuda booshi. Na njubi baheereza ikihugo kyo nâli mali gwanwa naheereza bashokuluza baabo. Baabo, bo bagashubi kihyana.» Kwokwo, kwo Nahano adesiri.
4 Yabo Bahisiraheeri, kiri naꞌBayuda, Nahano ashubi detaga hiꞌgulu lyabo kwokuno:
5 «Keera tukayuvwa ngiisi kwo mugweti mugabanda akashiba, ku kyoba.
Mukoli humiirwi. Noꞌmutuula, ndaagwo!
6 Ku yukwo, mutee yibuuzagya bwija, ti:
“Koꞌmushosi angabuta?”
Aaho! Kutagi ngiisi mushosi akola mu yigwata ha kibuno,
iri anahinya ngoꞌmukazi úgweti úgaabuta ku bulyanirwe?
Na kituma kiki amalanga gaabo gakoli zizibiiri?
7 Yulwo lusiku, lukola lugaaba lweꞌnguuke.
Beene Yakobo bagagooka ngana-ngana!
Yayewe! Ulusiku mwene yulwo, lutâye shubi ba ho.
Kundu kwokwo, ubuzinda, bâye kizibwe.»
8 Nahano woꞌbushobozi bwoshi, ashubi detaga kwokuno:
«Yulwo lusiku mango lwahika, lyeꞌrya ngata yo bashubi hogesirwi mu magosi, ngagivungula, kiri neꞌrya mirinda.
9 Bwo nie Rurema Nahamwabo, bakola bagakizi ngolera,
banakizi kolera noꞌmwami ye ngayimika, ulya wa mwiꞌkondo lya mwami Dahudi.
10 «E beene Yakobo, muli bakozi baani! Ku yukwo, mutayobohe.
E Bahisiraheeri! Mutavunike indege.»
Kwokwo, kwo Nahano adesiri.
«Ngamùlyosagya mu buja i mahanga.
Kiri naꞌbaana biinyu, bagalyoka yo.
Beene Yakobo bagashubi tuula ku butoge, mu kati koꞌmutuula.
Ndaanaye mugoma úgashubi bateera ikyoba.
11 Ee ma! Tuyamiinwi, nganakizi mùkiza.»
Kwokwo, kwo Nahano adesiri.
«Si binyamahanga byeꞌyo munda nꞌgamùshabulira, byohe ngabizimiiza lwoshi.
Haliko mwehe, ndagamùzimiiza lwoshi.
Kundu kwokwo, ndagamùlekeerera.
Si ngamùhana naaho nga kwo bimùkwiriiri.»
Kwokwo, kwo Nahano adesiri.
12 Nahano adetaga kwokuno: «Inguma ziinyu zikayiri bweneene, halinde zitangabukwa mbu zikire.
13 Ndaanaye úgamùbulanira, ndaanagwo muti gwoꞌkumùbuka mwo inguma ziinyu.
Ku yukwo, ndaagwo mulangaaliro muhiiti kwo mugaakira.
14 Mu booshi ábashubi mùtabiiri, ndaaye úki mùtwaziizi.
Si booshi bakoli mùyibagiiri.
Amabi giinyu, gakoli leeziri ulugero bweneene.
Neꞌbyaha biinyu, bikoli luguusiri.
Kwokwo, ngola mu mùharuura nga bagoma baani,
keera nanamùhaniiriza, buzira kumùyuvwira indengeerwa.
15 Aahago! Yizo nguma, kundu mugweti mugalira-lira hiꞌgulu lyazo,
haliko ndaagwo muti úgwangazibuka.
Na íbitumiri nꞌgamùhana kwokwo, bweꞌbyaha biinyu bikoli luguusiri.
Mukoli ba banabyaha ba bweneene.
16 Kundu kwokwo, ngiisi ábali mu mùjanganula, nabo ngabajanganula.
Abagoma biinyu booshi, nabo kandi bagatwalwa imbohe mu mahanga.
Na ngiisi ábakamùshahula ibindu, nabo bagayiji bishahulwa.
Na ngiisi ábakamùteera, nabo bagayiji teerwa.
17 E bandu beꞌSayuni, keera mukajandwa, ndaaye úmùtwaziizi.
Kundu kwokwo, ngola ngaakiza inguma ziinyu,
halinde munashubi ba bagumaana.»
Kwokwo, kwo Nahano adesiri.
18 Nahano adetaga kwokuno:
«Ngakejeerera abandu baani, na mbagalulire mu kihugo kyabo,
halinde bashubi tuula mwo.
Utwaya twabo, kundu twâli mali siba, bagashubi tusibuula.
Kiri naꞌkaaya keꞌYerusaleemu, bagashubi kayubaka mweꞌnyumba zoꞌmulimbo, nga kwo kâli tuula.
19 Ngiisi ábagatuula mwo, bagashubi yimba inyimbo zoꞌbwivuge, iri banabanda akabuuli.
Ngaaluza abaana baabo, halinde banaluguuke ngana-ngana!
Ngabagingika bweneene, ndaanaye úgashubi banegura.
20 Abaana baabo bagakizi genduukirwa, nga kwo bâli tuula.
Nganashubi basikamya imbere lyani.
Haliko, ngiisi ábâli kizi gira mbu babakomeerese, boohe ngabahaniiriza.
21 Muguma wabo, ye gakizi barongoora.
Uyo mutwali, agalyoka mu kati kaabo.
Ikyanya ngakizi múhanguula kwo anyegeere, anayami gira kwokwo.
Mukuba, buzira kuhanguulwa, ndaaye úwangagira mbu anyegeere.»
Kwokwo, kwo Nahano adesiri.
22 «Kwokwo, mugashubi ba bandu baani,
naani na mbe nie Rurema winyu.»
23 Lolagi! Nahano agweti agahaniiriza abandu ku buraakari bwage,
bunakoli kayusiri nga kihuhuuta.
Buli mu yihwika ku banangora-mabi.
24 Bulya buraakari bwage, butaganahooha, átazi yusa ukugira byoshi byo keera ashungika.
Yibyo byoshi, mwâye bisobanukirwe mu siku ízigayija.