21
Ishuvyo lya Hayubu
1 Ha nyuma, Hayubu anashubi shuvya kwokuno:
2 «Yaga magambo gaani, mugayuvwirize ku bwitonde.
Lyoki, mubuli mboleeza.
3 Munyigenderere, gira nimùganuuze.
Na mango nayusa ukudeta, mukabuli genderera noꞌkunjekeereza.
4 Aahago! Ndagweti ngayidodombera abandu.
Si ngweti ngayidodombera Rurema yenyene.
Ye tumiri umutima gwani gutayisiri mu nda.
5 «Mundole kwo, lyo niinyu musoomerwa.
Mubiike amaboko giinyu ku tunwa, mu kuyerekana kwo mukoli shengusiri.
6 Ikyanya ndi mu yitoneesa ku bikamba kwo, ndi mu huumirwa.
Amagala gaani ganajugume bweneene neꞌkyoba.
7 «Balya banangora-mabi, kituma kiki baki genderiiri ukutuula ho?
Si imisi yabo, iri mu kizi yushuuka, halinde mu bushaaja bwabo!
8 Babwinagi ngiisi kwaꞌbaana baabo bagendukiirwi,
banabone kiri na bijukulu baabo.
9 Ikyanya bali ha mwabo, batali mu yoboha.
Kiri na Rurema, atali mu bahana.
10 «Yabo banangora-mabi, ingaavu zaabo ziri mu yolola zooshi,
zinakizi buta buzira kuramburura.
11 Abaana baabo bali mu shaata nga bibuzi,
banayamiri bali mu kina.
12 Ikyanya bali mu yimba, bali mu lasa ingoma noꞌlulanga,
iri banashambaalira ukulasa umuteera-teera.
13 Bali mu yama bagendukiirwi.
Neꞌkyanya bali mu fwa, banaziikwe ku mutuula.
14 «Bali mu bwira Rurema: “Utushaagage ha butambi.
Tutali niꞌgoorwa lyoꞌkukizi kukulikira.
15 Ehee! Rurema woꞌbushobozi bwoshi, alyagagi nyandi?
Kituma kiki tugakizi múkolera?
Neꞌkyanya tugamúhuuna, tugalonga bunguke buki?”
16 Yabo banangora-mabi, batoniragi kwo bo batumiri bagendukiirwi.
Kundu kwokwo, imitono yabo itali yo miguma neꞌyeꞌmwani.*21.16 Kandi iri: Igambi lya banangora-mabi liri hala na niehe.
17 Amatara gaabo, gatali mu zima, batanali mu longa amagoorwa.
Rurema atanali mu bajengeeza ku buraakari bwage.
18 Boohe, batali mu yehuulwa nga byasi,
batanali mu kumuulwa neꞌkihuhuuta.
19 «Abandu bali mu deta, mbu: “Bwo yabo banangora-mabi bali mu huba,
Rurema agaki hana abaana baabo.”
Kundu kwokwo, nga angayamiri abahana,
lyo bangalooziri ukusobanukirwa.
20 Boonyene, banalonge ukumenya ngiisi kwo bagashereezibwa.
Banakizi libuuka ku buraakari bwa Rurema woꞌbushobozi bwoshi.
21 Mukuba, ikyanya bagaaba keera bafwa,
batagaki twaza ngiisi kwaꞌbaana baabo bagweti bagaahanwa.
22 «Aaho! Nyandagi kandi úwangayigiriza Rurema?
Si ye mu twa imaaja zaꞌbakulu booshi!
23 «Umundu muguma ali mu fwa, anabe ashuba kikalage,
anabe ashubi shambiiri mu kati koꞌmutuula.
24 Anashubi jeberiiri mu magala.
Kiri naꞌmavuha gaage, ganabe gaki shubi kaniri.
25 «Ugundi ali mu fwa akoli kekeriiri, anajengiirwi mu mutima gwage.
Anabe atakashambaala, kiri kwiꞌgambo liguma.
26 Kundu kwokwo, yabo bombi bali mu ziikwa,
banali mu liibwa na byebyo bitwera.
27 «Yuvwirizi! Ngoli yiji ngiisi kwo mugweti mugayitoneesa.
Nyiji kwakundi ngiisi kwo mwagira igambi libi hiꞌgulu lyani.
28 Mwehe, mugweti mugabuuza mbu: “Yabo bagale, inyumba zaabo, ziri hayi?
Si zitakiri ho, hiꞌgulu lyeꞌbyaha byabo!”
29 «Nanga maashi! Ka mutazi buuza ábali mu balama?
Boohe, bo bagamùbwira ukuli.
30 Ikyanya Rurema ali mu ba akoli rakiiri, anabe aloziizi ukuhana abandu,
nangora-mabi ali mu fuushuka.
31 Ndaaye úli mu múyihoola ku buligo bwage.
Ndaanaye úwangamúyereka bwo.
32 Ikyanya ali mu twalwa iwa maherero,
ha shinda yage hali mu biikwa abalaliizi.
33 Uyo nakufwa, abandu bingi bweneene bali mu genda bamúherekeziizi.
Neꞌkyanya ali mu ziikwa, ali mu fulirwa bwija mu luvu.
34 «Yaga magambo giinyu, si galyagagi ga busha!
Aaho! Kuti kwo gangamboleeza?
Si amashuvyo giinyu, biri bibeesha naaho!»