Amagambo ga Herihu
32
(32.1–37.24)
Herihu ashuvya abiira ba Hayubu
1 Uyo Hayubu âli kaviriziizi ukuyibona kwo ye kwaniini. Neꞌri hakatama, yabo bandu bashatu, Herifaazi, na Biridaadi, na Sofaari, banaleka ukumúshuvya.
2 Haaho, hanayija umundu muguma, iziina lyage ye Herihu. Âli riiri mugala Barakeeri, woꞌmulala gwa Buuzi,*32.2 Buuzi mulala muguma gweꞌkiharaabu. Yeremiya 25.23. mwiꞌkondo lya Raami. Uyo Herihu âli koli rakariiri Hayubu bweneene, mbu bwo Hayubu âli yibwini kwo ye kwaniini, ukuhima Rurema. 3 Anâli rakariiri na yabo biira bashatu, mbu bwo bakayabirwa ukushuvya Hayubu, halinde Rurema anaboneka kwo ali muhubi.
4 Ikyanya yabo bashaaja bâli gweti bagahambanwa na Hayubu, uyo Herihu âli bwatiiri kanyerere ha butambi, bwo âli kiri musore. 5 Haliko, iri akabona kwo bayabiirwi ukushuvya Hayubu, anaraakara ngana, 6 anatondeera ukudeta kwokuno:
«Nie kiri musore, na mwehe mukola bashaaja.
Kyo kyatuma ndamùbwira byo ndoniri.
7 Nanakizi yitoneesa: “Uleke yaba bashaaja batee deta.
Ee! Ábakoli hiiti imyaka mingi, bo bali mu yigiriza ku bwitegeereze.”
8 «Kundu kwokwo, ikyanya umundu ali mwoꞌMutima gwa Rurema woꞌbushobozi bwoshi,
lyo ali mu ba akoli sobanukiirwi.
9 Ee! Abashaaja batali bo beene ubwitegeereze naaho.
Batanali bo basobanukiirwi naaho niꞌgambo liija.
10 Ku yukwo, munyuvwirize.
Mulekage naani nimùbwire ngiisi kwo ndoniri.
11 «Ikyanya mushuba mu looza igambo lyo mugaadeta,
nanakizi mùyuvwiriza ku bwitonde.
Njubi mùteziri amatwiri bweneene.
12 Na kundu njuba mu mùyuvwiriza kwokwo,
haliko ndaaye úwahima Hayubu.
Ikyanya akayibulanira, ndaaye úkamúyagiisa, kwo ahuba.
13 «Ku yukwo, mutashubi deta mbu: “Twe tuyiji íbikwaniini.
Nanga maashi! Muleke ngana Rurema abe ye gamúyagiisa.”
14 Uyo Hayubu, íngibe nie tugweti tugahambanwa,
mu kumúshuvya, ndashuba ngakoleesa galya magambo giinyu.
15 «Si mukoli bwatiiri naaho, mwayabiirwa ukumúshuvya.
Honyo! Si ndaanalyo irindi ishuvyo lyo muki hiiti.
16 Aaho! Ka ngenderere ukumùlindirira, mutanakiri mu deta?
Ka mbwatale naaho, buzira kushuvya igambo?
17 Nanga maashi! Leka naani ndete ishuvyo lyeꞌmwani.
Ngiisi byo ndoniragi, buno ngola ngabideta.
18 «Si umutima gwani gukoli yijwiri mwaꞌmagambo mingi.
Kwokwo, ngola mu shumwa-shumwa kwo ndete.
19 Buno, umutima gwani, guli nga divaayi íyatumbikirwa,
gunali nga kirembe kyeꞌdivaayi mbyahya íkikola bu pwamuuka.
20 Bikoli ngwiriiri ndete, lyo ndonga ukuyisa umuuka.
Kwokwo, muleke naani ndondeere ukushuvya.
21 Ndaaye mundu ye ngakundirira,
ndaganakoleesa amagambo goꞌkushiiga umundu amavuta.
22 Si iri hangagira ye ngakundirira,
Umulemi wani agambindikira.»