41
1 Yikyo kingisho-ngisho kyoꞌmujoka Levyataani, kundu umundu angagira mbu akigwate, shoobe!
Ikyanya ali mu kibona, ali mu yami hemuka umutima.
2 Aaho! Bwo ndaaye mundu úwangatami gira mbu akikange,
nyandagi leero úwangambangirira?
3 Nyandi úkambeereza ikindu, gira nimúgalulire kyo?
Si byoshi íbiri mwiꞌdako lyeꞌkyanyaanya, biri byeꞌmwani.*41.3 Barumi 11.35.
4 «Yikyo kingisho-ngisho, ndoziizi ukuganuula hiꞌgulu lyeꞌbirumbu byakyo.
Si kihiiti imisi ya kahebuuza. Naꞌmagala gaakyo, gasimisiizi.
5 Aaho! Nyandi úwangahonya uluhu lwakyo?
Si ndaaye úwangalutula, bwo luli nga kyuma!
6 Nyandi úwangayigusa akanwa kaakyo?
Si amiino gaakyo, gali kiteera-bwoba imbande zooshi!
7 «Umugongo gwakyo guli nga miziizi yeꞌsiribo
íshwekiini kuguma.
8 Ngiisi muguma gushwekiini noꞌgwabo,
halinde kiri neꞌhihuusi hitangasheshera ha kati kaayo.
9 Ngiisi siribo, iri mu ba inanisirwi ku yabo.
Bitanganaziga kwo tugihandule.
10 «Ikyanya kiri mu yasamura, ulukeera lunayilashuule.
Amasu gaakyo, gali mu keyengana ngiꞌzuuba, ikyanya liri mu tunduuka.
11 Mu kanwa kaakyo, muli mu kizi shaaga imilavyo.
Ishasha zoꞌmuliro ziri mu kizi yilasha imbuga.
12 «Mwiꞌzuulu lyakyo, muli mu tutumuka ikyusi.
Kishushiini neꞌkyuka kyeꞌnyungu ígweti ígaashera,
ikyanya ishodu ígweti ígagulumira kwoꞌmuliro.
13 Umuuka gwakyo, gwangakizi yasa amakala.
Mu kanwa kaakyo, muli mu lyoka imbigi zoꞌmuliro.
14 Igosi lyakyo, lihiiti imisi ya kahebuuza,
linali mu leeza abandu mweꞌkinyukura.
15 «Inyama zaakyo, zishwekiini haguma.
Kidediiri bweneene nga kyuma, kitanganatulwa.
16 Umutima gwakyo, guli mukomu ngiꞌbuye.
Guli ngiꞌbuye lyoꞌlushyo.
17 «Yikyo kingisho-ngisho, ikyanya kiri mu yinamuka,
ibikalage binagwatwe neꞌkyoba, binashenguke.
18 Ndaayo ngooti iyangakikomeeresa,
kandi iri itumu, kandi iri mwambi, kandi iri kindi kyugi kyoshi.
19 Yikyo kingisho-ngisho, kiri mu bona ikyuma kwo kiri kinovu nga kyasi.
Neꞌmiringa, iri nga kiti keera íkikabola.
20 Umwambi gutangakipuumusa.
Neꞌri bangalasha amabuye naꞌkahobola,
kiri mu gabona nga byula.
21 Ubudinga buli nga kihande kyeꞌkyasi.
Neꞌkyanya amatumu gali mu lashwa ku bwingi, kiri mu sheka naaho.
22 «Ibunda lyakyo, liri mu bwikirwa naꞌmagamba makomu-makomu.
Ikyanya liri mu kululwa mu bidaka, liri mu ba nga lyabihinga.
23 Ikyanya kiri mu yishagania mu nyaaja,
amiiji gali mu ba nga gashera,
ganatange ulufulo ngiꞌrengo lyaꞌmavuta.
24 Ikyanya kiri mu lenga mu miiji,
amiiji gali mu birinduka inyuma lyakyo,
ganakizi boneka meeru-meeru.
25 «Mu kihugo kyoshi, ndaakyo kindi kiremwa íkyangakihasha.
Ibindi byoshi biri byoba-byoba naaho.
26 Mu biremwa byoshi, kyo kiri noꞌbwikangaate bweneene.
Ye mwami weꞌnyamiishwa zooshi.»