2
1 Yayewe imwinyu, mwe mugwejiiri ku ngingo,
iri munashungika kwo mugaakola ibitalaalwe.
Yibyo bitalaalwe, bwo muhiitagi ubulyo bwoꞌkubigira,
muli mu zinduka ku mutwezi, gira mugendi bikoleesa.
2 Ikyanya muli mu ba muyifwijiri indalo,
muli mu yami zinyaga.
Neꞌri mwangaloozagya inyumba za beene,
muli mu gungana mu kuzinyaga.
Muli mu gungana, mu kunyaga ibya beene,
kiri noꞌbuhyane bwa beene.
3 Kyo kitumiri Nahano adetaga kwokuno:
«Ikyanya mugweti mugaagira amabi, niinyu, ngamùgirira go.
Umutego gugamùgwasa,
mutanashobole ukuguyifuushula mwo.
Mu kugenda, mutagaki yikangaata,
si kigaaba kikolaga kyanya kyoꞌkuhuumirwa.»
4 Yizo siku, abagoma bagakizi mùhonyoleza.
Banakizi yimba yulu lwimbo lwaꞌmaganya hiꞌgulu liinyu, ti:
«Ala twe! Keera tukahererekera,
twanamirwa lwoshi-lwoshi!
Nahano keera akatunyagaga ikihugo kiitu,
anakigabira abagoma biitu.»
5 Abandu ba Nahano, batagaki deta ngiisi kweꞌkihugo kyabo kigagaburwa.
Si abandi bo bagabiika imbibi zaakyo.
Mika alahizibwa ukutanga ubuleevi
6 Abandi baleevi, badesiri ti: «Aahabi! Buno buleevi bwawe, ubutwikirage kwo!
Mutakizi lomboojera hiꞌgulu lyabwo!
Ibala mwene yiryo, bitaziziri kwo lyangatugwata!»
7 E beene Yakobo! Ka mukwaniini ukukizi deta kwokwo?
Ikyanya mukoli gweti mugaagira ibitalaalwe,
ka Nahano angaki mùyigenderera? Nanga, maashi!
Haliko, iri mwangakizi gira íbitungiini,
lyoki amagambo gaani gangamùholeeza.
8 Haliko Rurema adeta kwokuno: «Si mwehe, muki gweti mugalwisa abandu baani nga bagoma.
Ikyanya abandu bali mu lenga mu mutuula,
munayami bashulumula ibyambalwa byabo.
Banakola nga bandu ábali mu shaaga mwiꞌzibo.
9 Abakazi mu bandu baani, kundu bali mu ba bavwagariiri mu nyumba nyiija,
si muli mu bayimula mwo!
Na kundu ndoziizi ukugashaanira abaana baabo neꞌbindu biija,
halikago mugweti mugabanyaga byo byoshi.
10 Aaho! Yimuki, mulyokage hano!
Kino kihugo kitakiri kyeꞌmwinyu, mutaganaki kiluhuuka mwo.
Si keera mukakiyulubaza,
kinakoli lindiriiri naaho ukushereezibwa!»
11 Mwehe, muyamiri musiimiri naaho abaleevi beꞌbibeesha.
Bagweti bagakizi deta, ti: «Iri mwangambeereza idivaayi naꞌmaavu,
lyo ngamùtangira amaleevi miija-miija.»
Haliibwi! Umuleevi mubi mwene uyo, ye musiimiri.
Nahano alagaania ukukiza abandu baage
12 «E bandu ba Yakobo, mwe musigiiri, ngamùkuumania kuguma.
Ee! Ngamùkuumania, munabeere mu lugo nga bibuzi,
munabe nga bitugwa íbiragiiri mu ndagiriro.
Ikihugo kiinyu kigashubi yijula mwaꞌbandu bingi.
13 Kundu mushuba mu gwatwa imbohe mu mahanga,
haliko ikirongoozi kiinyu kigahongola inyiivi zaꞌbagoma, anamùlyose yaho.
Ee! Mwami winyu, agakizi mùrongoora.
Na Nahano yenyene, agakizi mùshokolera injira.»