9
Abahisiraheeri bayilega ibyaha byabo
1-2 Umwezi gwa kalinda, mu siku makumi gabiri na zina, Abahisiraheeri banashubi kuumana, gira bayishalise. Bâli mali yihandula ku binyamahanga. Banâli koli yambiiti amasuuzu, banayitumuulira ulukungu mu matwe, mu kuyerekana kwo bajengeerwa. Banayaga kwo boohe, kuguma na bashokuluza baabo, bâli kizi yifunda mu byaha bweneene.
3 Shesheezi kare-kare, banatee hisa ibihe bishatu bayimaaziri, bagweti bagayuvwiriza ngiisi kwo bagweti bagaasoma mu maaja za Rurema Nahamwabo. Ibindi bihe bishatu, banafukama imbere lya Rurema, bagweti bagamúhuuna ulukogo, iri banamúyivuga.
4 Ku bushonero, hâli riiri Abalaawi, nga Yeshuha, na Baani, na Kadimyeri, na Shebaniya, na Buni, na Sherebiya, noꞌgundi Baani, kuguma na Kenaani. Yabo booshi, bâli gweti bagayiberekaania kwiꞌzu mu kuhuuna Rurema Nahamwabo.
5 Ha nyuma, yabo Balaawi (Yeshuha, na Kadimyeri, na Baani, na Hashabineya, na Sherebiya, na Hodiya, na Shebaniya, na Petahya) banabwira abandu kwokuno: «Yimuki, mukizi huuza Rurema Nahamwinyu. Mukizi múhuuza, imyaka neꞌmyakuula.
E Nahano, iziina lyawe likizi yivugwa.
Mukuba, liri lya kahebuuza, linahuziibwi bweneene, ukuhima ibindi byoshi.
6 Wehe naaho, we Nahano.
We kabumba igulu, na byoshi íbiri mwo.
We kabumba neꞌndonde zooshi.
We kabumba neꞌkihugo na byoshi íbiri mwo.
We kabumba neꞌnyaaja, na ngiisi íbiri mwo.
Yibyo byoshi, we tumiri biri bigumaana.
Byoshi íbiri kwiꞌgulu, biyamiri bigweti bigakuyikumba.
7 E Nahano Rurema, we katoola Hiburamu.
Ukamúshaaza i Huuri, mu kihugo kyeꞌBukalidaayo, wanamúyinika iziina lya Hiburahimu.*9.7 Ndondeko 11.31; 12.1; 17.5.
8 Wanabona kwo ali mundu mwemeera imbere lyawe.
Ikyanya mukanywana ikihango,
wanamúlagaania, kuguma naꞌbeꞌkibusi kyage, kwo ugabaheereza ikihugo kyeꞌKaanani,
neꞌkyaꞌBahiti, neꞌkyaꞌBahamoori, neꞌkyaꞌBapereesi, neꞌkyaꞌBayebuusi, neꞌkyaꞌBagirigaashi.
Yugwo muhango, keera wanagukwiza. Mukuba, uli mwemeera.†9.8 Ndondeko 15.18-21.
9 «Ikyanya bashokuluza biitu bâli kizi libuuka mu kihugo kyeꞌMiisiri, wanababona.
Neꞌkyanya bakakutakira ku Nyaaja Ndukula, wanabayuvwa.‡9.9 Kulyoka 3.7; 14.10-12.
10 Wâli yiji-yiji ngiisi kwaꞌBamiisiri bagweti bagabalibuza.
Kyanatuma ugakizi gira ibisoomeza neꞌbitangaaza, imbere lya Faraho weꞌMiisiri,
neꞌmbere lyaꞌbakozi baage booshi, neꞌmbere lyaꞌbandu booshi ba mu kihugo kyage.
Kwokwo, kwo ukagingika iziina lyawe, linaki gingisirwi halinde zeene.§9.10 Kulyoka 7.8–12.32.
11 Ikyanya inyaaja yâli koli hangiriiri bashokuluza biitu, emwe,
wanagibunduula, banagijabuka ikoli yumiri.
Haliko Abamiisiri boohe, ikyanya bakabalandiriza, wanababindikira mwo.
Ee! Bakayami mirwa ngiꞌbuye mu kalingi.
12 Mwiꞌzuuba, wâli kizi barongoora neꞌnguliro yeꞌkibungu.
Na mu bushigi, wâli kizi barongoora neꞌnguliro yoꞌmuliro,
gira ikizi bamolekera mu njira.*9.12 Kulyoka 13.21-22.
13 Ikyanya bakahika i Sinaayi, ukashonooka mwiꞌgulu, wanayiji baganuuza.
Wanabaheereza imaaja ku njira íkwaniini.
Ngiisi byo ukabategeka mu kukyula, biryagagi biija.
14 Ukakoleesa umukozi wawe Musa, mu kubamenyeesa ulusiku lwawe lweꞌSabaato.
Wanabayereka ubulyo bwoꞌkusimbaha amategeko gaawe,
kuguma neꞌmigeeza, neꞌmaaja.
15 Ikyanya bâli shalisiri, wanakizi baheereza imikate ukulyoka mwiꞌgulu.
Neꞌkyanya bâli nyotiirwi, wanabanywesa amiiji ágakashalala mu lwala.
Kirya kihugo kyo ukabalagaania ku ndahiro,
wanababwira kwo bagendi kihyana.†9.15 Kulyoka 16.4-15; 17.1-7; Bukengeeze 1.21.
16 «Balya bashokuluza biitu, banaba mindagabika, banayumuusa imitima yabo,
batanakizi ki kulikira imaaja zaawe.
17 Birya bitangaaza byo wâli kizi bagirira, banabiyibagira.
Banalahiraga, mbu batagaki kutwaza.
Banayumuusa imitima yabo, banahuna,
halinde banatoola ikirongoozi kyoꞌkubagalula i Miisiri mu buja bwabo.
Kundu kwokwo, utakabajanda.
E Rurema, uli mu kizi kogana.
Wehe, uyijwiri ulukogo, unali mwigenderezi.
Uli mu kundana bweneene,‡9.17 Kulyoka 34.6; Muharuuro 14.18. utanali mu yagalwa duba.
18 Bakajongolola inooro, banayigirira umugisi gweꞌnyana.
Banadeta: “Uyu, ye kola Rurema witu. Ye katushaaza i Miisiri.”
Mu kugira kwokwo, bâli gweti bagakutuka ngana.§9.18 Kulyoka 32.1-4.
19 Kundu bakakuhubira kwokwo mwiꞌshamba, utanabajanda.
Mukuba, uyamiri uli neꞌndengeerwa ya kahebuuza.
Kirya kibungu íkyâli kizi barongoora mwiꞌzuuba, kitanabalyokerera.
Kiri na kirya kibungu kyoꞌmuliro, kyanagenderera mu bushigi, gira kikizi bamolekera mu njira.
20 Umutima gwawe mwija, gwâli kizi bayigiriza.
Ikyanya bakashalika, wanabaliisa imana.
Neꞌkyanya bakanyoterwa, wanabanywisa amiiji.
21 Wanahisa imyaka makumi gana, ubalaaziri kwokwo mwiꞌshamba.
Ku yikyo kyanya, ndaahyo bakabula.
Ibyambalwa byabo, bitakahula.
Kiri neꞌshando zaabo, zitakanaheema.
22 «Ikyanya bakagwanana neꞌbinyamahanga, kuguma naꞌbaami baabo, ukabahimira bo.
Wanabakwiza mu mbande zooshi zeꞌbihugo byabo.
Banayabiira ikihugo kyeꞌHeshibooni, kyeꞌmwa mwami Sihooni,
neꞌkihugo kyeꞌBashaani kyeꞌmwa mwami Hoogi.*9.22 Muharuuro 21.21-35.
23 Wanabaluza, halinde banaba nga ndonde kwiꞌgulu,
wanabayingiza mu kihugo kyeꞌKaanani.
Yikyo kihugo, kinali kyekirya wâli mali bwira bashokuluza baabo kwo bagendi kihyana.†9.23 Ndondeko 15.5; 22.17; Yoshwa 3.14-17.
24 Bagala baabo banakiyingira mwo, banakihyana.
Ikyanya bakagwana mwaꞌBakaanani, wanabahimira bo.
Yabo bandu, kuguma naꞌbaami baabo, wanababiika mu maboko gaabo.
Banakizi bayogogoza, nga ngiisi kwo baloziizi.‡9.24 Yoshwa 11.23.
25 Utwaya twabo, kundu twâli zitiirwi, bakatugwata, kuguma neꞌndalo zaabo.
Bakagwata kiri neꞌnyumba zaabo ízâli yijwiri mweꞌbindu bya namwingye.
Bakagwata neꞌbirigo íbyâli mali humbwa.
Banagwata neꞌndalo zeꞌmizabibu, na zeꞌmizehituuni, kuguma neꞌbindi biti bingi byeꞌbitumbwe.
Banakizi lya, halinde banakizi dadaara.
Na bwo we mwija bweneene, kyanatuma bagajega ngana-ngana.
26 «Kundu kwokwo, balya bashokuluza biitu batâli kizi kusimbaha.
Si bakakizi huna imbere lyawe, batanatwaza imaaja zaawe.
Banayita kiri naꞌbaleevi baawe,
banali bo bâli kizi bayinginga kwo bakugalukire.
Banakizi tuka iziina lyawe bweneene.§9.26-28 Batwi beꞌmaaja 2.11-16.
27 Iri ukabonaga kwokwo, wanababiika mu maboko gaꞌbagoma baabo,
halinde yabo bagoma banabagira yondo-yondo.
Kundu kwokwo, ikyanya bâli kizi libuuka, banakutabaaza.
Na kwokwo utuuziri mwiꞌgulu, wanabayuvwiriza.
Wanabayuvwirwa indengeerwa, wanabatumira abandu boꞌkubakiza.
Yabo bandu, banakizi baguluula mu maboko gaꞌbagoma baabo.
28 Kundu kwokwo, ikyanya bakaba bakoli tuuziri mu mutuula,
banakizi shubi yifunda mu byaha imbere lyawe.
Kwokwo, wanashubi bajanda,
wanababiika mu maboko gaꞌbagoma baabo, gira babatwale.
Neꞌkyanya bakashubi kutakira,
wanabayuvwiriza yaho mwiꞌgulu.
Ee! Ukabayuvwirwa indengeerwa,
wanakizi bakiza ubugira kingi.
29 Ukakizi bakengula kwo bakizi simbaha imaaja zaawe.
Halikago, banayigira mindagabika, batanazitwaza.
Na kundu bangárambiri bwija ku mategeko gaawe,
haliko batanakizi gasimbaha.
Banayumuusa imitima yabo, banayigira babitwitwi,
banakizi na yifunda mu bitali nga byo.*9.29 Balaawi 18.5-9.
30 «Wanahisa imyaka mingi, ugweti ugabayigenderera.
Wanakizi batumira abaleevi baawe,
gira bakizi bahanuula ku njira yoꞌmutima gwawe.
Kundu kwokwo, batanakizi kutwaza, kiri neꞌhiniini.
Kyanatuma ugashubi babiika mu maboko geꞌbinyamahanga.†9.30 2 Baami 17.13-18; 2 Kutondobola 36.15-16.
31 Kundu kwokwo, ukabayuvwirwa indengeerwa,
utanabashereeza lwoshi-lwoshi, utanabajanda.
Ee! Uli Rurema weꞌndengeerwa, unali mu kejererana.
32 «E Rurema witu, ulyagagi mukulu bweneene, unali wa kahebuuza.
Ikyanya uli mu nywana ikihango kuguma na nyiitu, uyamiri ugweti ugakisimbaha.
Aaho! Ulolage ngiisi kwo twahanyagala,
ukulyokera ku kyanya kyaꞌbaami beꞌHasuriya, halinde zeene.
Emwe! Twalibuuka ngana-ngana, kuguma naꞌbaami biitu, naꞌbatwali biitu,
naꞌbagingi biitu, naꞌbaleevi biitu.
33 Mu byoshi íbikatukoleka kwo, uyamiri uli mu gira íbikwaniini.
Kiri neꞌkyanya tukakuhubira, uyamiri ukiri mwemeera.
34 Abaami biitu, kuguma naꞌbatwali biitu, naꞌbagingi biitu, kiri bashokuluza biitu,
yabo booshi batâli kizi simbaha imaaja zaawe.
Na kundu wâli kizi bahanuula, wanakizi bategeka,
haliko batanakutwaza.
35 Yabo bashokuluza biitu, bâli tuuziri mu bwami bwabo,
banakizi vwagarara mu byoshi byo ukabaheereza.
Idaho, lyâli ki riiri mweꞌnagiira, neꞌkihugo kyabo kyanaba kiyajabusiri.
Kundu kwokwo, batanakutwaza, banakizi yifunda mu bitali nga byo.
36 Aaho! Lolaga zeene buno, tukola baja.
Kino kihugo, kundu ukakiheereza bashokuluza biitu,
kwo bakizi lya ibitumbwe byamwo, neꞌbindi byokulya biija,
haliko buno tukoli kituuziri mwo nga baja.
37 Kundu tuli mu yeza bweneene mu kino kihugo,
haliko abaami beꞌmahanga bali mu yiji tunyaga byo.
Yoho wee! Ikyanya twâli kizi yifunda mu byaha, lyo ukababiika hiꞌgulu liitu.
«Buno yabo baami, bagweti bagatukoleesa nga ngiisi kwo baloziizi, kiri neꞌbitugwa biitu. Tunakoli hanyagiiri bweneene.»
*9:7 9.7 Ndondeko 11.31; 12.1; 17.5.
†9:8 9.8 Ndondeko 15.18-21.
‡9:9 9.9 Kulyoka 3.7; 14.10-12.
§9:10 9.10 Kulyoka 7.8–12.32.
*9:12 9.12 Kulyoka 13.21-22.
†9:15 9.15 Kulyoka 16.4-15; 17.1-7; Bukengeeze 1.21.
‡9:17 9.17 Kulyoka 34.6; Muharuuro 14.18.
§9:18 9.18 Kulyoka 32.1-4.
*9:22 9.22 Muharuuro 21.21-35.
†9:23 9.23 Ndondeko 15.5; 22.17; Yoshwa 3.14-17.
‡9:24 9.24 Yoshwa 11.23.
§9:26 9.26-28 Batwi beꞌmaaja 2.11-16.
*9:29 9.29 Balaawi 18.5-9.
†9:30 9.30 2 Baami 17.13-18; 2 Kutondobola 36.15-16.