9
Ipasaka ya kabiri
1 Ikyanya Abahisiraheeri bakahisa umwaka gwoshi bashaaziri mu kihugo kyeꞌMiisiri, mu mwezi gwa mbere gwoꞌmwaka gwa kabiri, Nahano anaganuuza Musa mwiꞌshamba lyeꞌSinaayi kwokuno: 2 «Ubwire Abahisiraheeri kwo bashambaalire ulusiku lukulu lweꞌPasaka ku kyanya íkikashungikwa. 3 Yikyo kyanya, kali kabigingwe keꞌsiku ikumi na zina za gwoguno mwezi. Na mu kulushambaalira, bakwaniini bakizi simbaha ngiisi byo nꞌgababwira.»
4 Iri Nahano akadeta kwokwo, Musa anabwira Abahisiraheeri kwo bashambaalire ulusiku lukulu lweꞌPasaka. 5 Kwokwo, banalushambaalira yaho mwiꞌshamba lyeꞌSinaayi, kabigingwe koꞌlusiku lwiꞌkumi na zina zoꞌmwezi gwa mbere. Bakagira nga ngiisi kwo Nahano akabwira Musa.
6 Haliko yulwo lusiku, Abahisiraheeri baguma batâli kwiriiri ukulushambaalira, bwo bâli koli yulubiiri hiꞌgulu lyoꞌkuhuma ku kirunda. Lwolwo lusiku, banagendera Musa na Harooni, 7 banabwira Musa: «Tukahuma ku kirunda, tunakoli yulubiiri. Kundu kwokwo, kituma kikagi tulahiziibwi kwo tutatangire Nahano amatuulo kuguma naꞌbiitu Bahisiraheeri ku kyanya kyo akashungika?»
8 Na wa Musa, ti: «Mutee ndindira. Ngagendi ganuuza Nahano hiꞌgulu liinyu.» 9 Nahano anabwira Musa, 10 kwo abwire Abahisiraheeri kwokuno: «Tudete nga muguma winyu, kandi iri muguma weꞌmbaga yinyu, angadwakala mu kuhuma ku kirunda, kandi iri angaba abalamiiri hala ku kyanya kyeꞌPasaka. Kundu kwokwo, mukwaniini mushambaalire Ipasaka yani, nie Nahano.
11 «Haliko, mugishambaalire mu mwezi gwa kabiri, kabigingwe mu zeezo siku ikumi na zina. Kirya kyanabuzi, mugakiliira kaako kalaaja, na yeyo mikate mizira saama. 12 Hatanagire ibyokulya byayo byo mugalaaza, halinde shesheezi. Yikyo kitugwa, mutanakolwe kwo mwavuna kiri niꞌvuha lyakyo liguma.*9.12 Kulyoka 12.46; Zaburi 34.20; Yohana 19.36. Lulya lusiku lweꞌPasaka, mu kulushambaalira, mukizi kulikiriza gaago mategeko gaalwo.
13 «Haliko, iri hangaba hali umundu úyiyerusiizi, anabe atabalamiri, uyo, iri atangalya Ipasaka, agatwibwa ngana mu Bahisiraheeri. Iri atangandangira ituulo ku kyanya íkishungisirwi, yenyene agayibetuza ikihano kyeꞌbyaha byage.
14 «Ibinyamahanga íbimùtuuziri mwo, iri byangasiima kwo nabyo bishambaalire ulusiku lukulu lwani lweꞌPasaka, bikwiriiri bikulikirize yerya migeeza, na zeezirya maaja zaayo. Yizo maaja, zo zeezirya ízigweti zigaakola ku binyamahanga, nga kwo zituula ziri mu kola neꞌmwinyu kwakundi.»
Ikibungu kyazinga iheema lyeꞌmihumaanano
(Kulyoka 40.34-38)
15 Ku lusiku iheema lyeꞌmihumaanano likashingwa, ikibungu kyanajooka, kyanalibwikira. Mu bushigi, yikyo kibungu kyanaboneka nga nguliro yoꞌmuliro, kyanamoleka kwokwo halinde ku mukyo. 16 Ukulyokera ku lulya lusiku, mwiꞌzuuba, yikyo kibungu kyâli kizi bwikira iheema. Na mu bushigi, kyanakizi boneka nga ngulumira yoꞌmuliro.
17 Yikyo kibungu, ikyanya kyâli kizi nunga, lyeryo Abahisiraheeri banayami hongola ishumbi yabo, banakikulikire. Na ngiisi ho kyâli kizi gendi yimanga, ho na haaho nabo bâli kizi shubi shinga ishumbi yabo. 18 Kwokwo, Abahisiraheeri bâli kizi yimuka ku burongoozi bwa Nahano. Na ku bwobwo burongoozi bwage, bâli kizi shubi shinga amaheema gaabo mu shumbi. Yikyo kibungu, ikyanya kyâli kizi beera hiꞌgulu liꞌheema, abandu banakizi shumbika haaho.
19 Ikyanya kiguma, yikyo kibungu kyâli kizi tinda hiꞌgulu liꞌheema. Kundu kwokwo, Abahisiraheeri batanalunguli yimuka yaho. Si bâli kizi simbaha Nahano. 20 Ikindi kyanya, yikyo kibungu kinabeere hiꞌgulu liꞌheema siku ngerwa naaho. Kwokwo, ku burongoozi bwa Nahano, bâli kizi shinga amaheema gaabo mu shumbi. Na ku bwobwo burongoozi bwage, banashubi kizi yimuka.
21 Ikindi kyanya, yikyo kibungu kyâli kizi beera hiꞌgulu liꞌheema ukutondeerera kabigingwe halinde shesheezi naaho. Kundu kwokwo, guba mulege-rege kandi iri bushigi, ikyanya kyâli kizi nunga, nabo lyo bâli kizi hongola ishumbi, banabunge. 22 Kirya kibungu, hali ikyanya kyâli kizi beera kwiꞌheema siku zibiri, kandi iri mwezi muguma, kiri umwaka gwoshi. Ku yikyo kyanya, Abahisiraheeri bâli kwiriiri bakizi beera haaho, batanasheguuke. Halikago, iri kyangánuuziri, lyo bâli kizi genda.
23 Ku burongoozi bwa Nahano, lyo bâli kizi shumbika. Na ku bwobwo burongoozi bwage, banashubi kizi lyoka ho bashumbisiri. Kwokwo, kwo bâli kizi simbaha ngiisi kwo Nahano akabwira Musa.