8
Ubwitegeereze bwahamagalana
1 Bwitegeereze agweti agakuhamagala,
Bumenyi agweti agateerera umulaga.
2 Yabo bombi, bali mu kuhamagalira ku njira íziri ku marango,
na íziri ha mashangaaniza.
3 Bayimaaziri kiri ha marembo goꞌkuyingira mu kaaya,
bali mu kizi teerera umulaga imwa ábali mu galenga mwo kwokuno:
4 «E bandu, ngweti ngamùberangira,
kwo muli mweshi.
5 E bahwija, mukizi longaga ubwitegeereze.
E bizeeze, mukizi sobanukirwa.
6 Mukizi yuvwa bwija.
Amagambo go ngaadeta, gali naꞌkamaro bweneene.
Ee! Byoshi byo ngola ngaadeta, biri byoꞌkuli,
7 ndaanabyo binyoma íbigali mwo.
Si amagambo geꞌbibeesha goohe, ngashombiri bweneene!
8 Amagambo gooshi ágali mu lyoka mu kanwa kaani, gatungiini.
Mu kati kaago, ndaalyo írihengamiri, ndaanalyo írishobiri.
9 Ngiisi ábali mu sobanukirwa, bayiji-yiji kwo ndi mu deta íbiri byoꞌkuli.
Ee! Booshi ábali noꞌbumenyi, bayiji kwo bitungiini.
10 Galya migirizo gaani, ukizi galooza bweneene ho wangalooza iharija.
Ee! Ukizi looza ubumenyi, ho wangalooza inooro muguuhya.
11 Si ubwitegeereze, buli naꞌkamaro, ukuhima amabuye madukula ágakeyengiini,
bunahimiri byoshi byo wangayifwijiri.
12 «Nie bwitegeereze, ndi noꞌbumenyi,
noꞌbwenge, na nzobanukiirwi bweneene.
13 Ngiisi úsimbahiri Nahano, ali mu shomba amabi.
Kwokwo naani, njombiri ubwikangaate, noꞌkuyihaya.
Njombiri neꞌngesho mbi, neꞌbibeesha.
14 Nie nzobanukiirwi, na ndi mu hanuulana,
ndi noꞌbwitegeereze, kiri noꞌbushobozi.
15 Ndi mu tabaala abaami, halinde batwale bwija.
Abatwali nabo, ndi mu batabaala ukubiika imaaja ízikwaniini.
16 Kiri naꞌbaluzi, bali mu longa ubutwali.
Naꞌbandi bakulu, bali mu ngoleesa mu kurongoora bwija.
17 Ngiisi ábanguuziri, naani mbakuuziri.
Na ngiisi ábagweti bagandooza, bagayiji ndonga.
18 Nie mwene ulushaagwa noꞌbugale.
Na yubwo bugale, buli mu genduusania.
19 Ngiisi byo ndi mu haana, biri biija, ukuhima inooro muguuhya,
noꞌkuhima iharija nyiija.
20 Ndi mu kulikira íbikwaniini,
iri na ngulikiriza imaaja za Rurema.
21 Ngiisi ábanguuziri, ndi mu kizi baheereza ubugale,
halinde ibihinda byabo binayame biyijuliiri.
22 Nie bwitegeereze, Nahano akatee mbumba
ikyanya átazi bumba ikindi kindu kyoshi.
23 Ee! Ku ndondeko ya byoshi, lyo nꞌgatee bumbwa.
Ikyanya ikihugo kikayiji bumbwa, nâli koli yamiri ho.
24 Nâli kola ho, kiri neꞌkyanya inyaaja zitâli zaazi ba ho,
neꞌkyanya ishyoko zaꞌmiiji zitâli zaazi bumbwa.
25 Kiri neꞌkyanya imigazi noꞌtugangazi bitâli zaazi biikwa ahandu haabyo,
nâli koli tuuziri ho.
26 Ku kirya kyanya, Rurema atâli zaazi bumba ikihugo,
kandi iri indalo, kandi iri ulukungu.
27 Nâli kola ho, ikyanya Rurema akabumba igulu,
na ku kyanya akazungulusa ulubibi ku nyaaja.
28 Nâli kola ho neꞌkyanya akabiika ibibungu kwiꞌgulu,
neꞌshyoko zeꞌnyaaja.
29 Nâli kola ho, neꞌkyanya akabiikira inyaaja ulubibi,
gira amiiji gatalujabuke,
ku kyanya akabiika indaliro zeꞌkihugo.
30 Ku yikyo kyanya, twâli kizi kolanwa,
nga naluganda woꞌbulenga.
Ngiisi lusiku, nâli kizi ba naꞌmalega,
bwo twâli ririinwi.
31 Ee! Nâli kizi shambaalira ikihugo na booshi ábakituuziri mwo.
Nâli kizi shambaalira ukutuula kuguma naꞌbandu.
32 «E bagala baani, mundegage amatwiri.
Bahiriirwi ngiisi ábagweti baganzimbaha.
33 Ngiisi byo ngweti ngamùyigiriza, mukizi bikania, gira mube bitegeereza.
Si mutakizi bijajaaka.
34 Ahiriirwi, ngiisi úli mu ndega amatwiri.
Ali mu yama abwatiiri ha mulyango gweꞌnyumba yani,
mu kulindirira, halinde ikyanya ngayingira.
35 Ngiisi ábali mu ndonga, bagayama bali bagumaana,
banabe bagashaniirwi na Nahano.
36 Si ngiisi ábatali mu ndonga, boohe, bali mu yikululira umwama boonyene.
Ee! Ngiisi ábanjombiri bakuuziri Narufu.»