11
1 Ikyanya abandu bali mu koleesa ibigero byoꞌkugungana, bali mu yagaza Nahano.
Si ibigero byoꞌkuli byohe, biri mu músimiisa.
2 Ikyanya umundu ali mu yikangaata, ishoni nazo zinamútogere kwo.
Si abatuudu, boohe, bo bali mu longa ubwitegeereze.
3 Abandu biija, ubutuudu bwabo bwo buli mu kizi barongoora.
Si abanabibeesha boohe, bagashereezibwa hiꞌgulu lyoꞌmujina gwabo.
4 Kundu umundu angaba ali noꞌbugale,
si ku lusiku lwoꞌkufwa, butamúhitiiri kamaro.
Haliko, umundu úkwaniini, yehe, ali mu kizibwa mu lufu.
5 Ábakwaniini batuuziri bazira kashembo.
Kwokwo, injira zaabo ziri mu ba zigolosiri.
Si banangora-mabi boohe, bali mu shereezibwa hiꞌgulu lyaꞌmabi gaabo.
6 Abandu biija, ikyanya bali mu ba bakulikiiri íbikwaniini, bali mu kizibwa.
Si abanabibeesha boohe, bali mu gwasibwa mu mifwije gaabo mabi.
7 Ikyanya nangora-mabi ali mu fwa, umulangaaliro gwage guli mu yami hera lwoshi.
Na kundu âli biisiri umulangaaliro ku bugale bwage, ndaabyo buli mu mútabaala kwo.
8 Umundu mwija ali mu kizibwa mu makuba.
Si nangora-mabi yehe, yago makuba gali mu mútibukira kwo.
9 Ngiisi úgayiriziizi Rurema, ikyanya ali mu deta, ali mu shereeza umutuulani.
Si umundu mwija yehe, ali mu kizibwa ku njira yoꞌbwenge bwage.
10 Abandu biija, ikyanya bali mu genduukirwa, booshi mu kaaya bali mu shambaala.
Banali mu banda akabuuli, awi yiyi yiyi, ikyanya banangora-mabi bali mu fwa!
11 Abandu biija, bali mu gashaanira akaaya kaabo, iri banakayubaka.
Si banangora-mabi boohe, bali mu kashereeza ku magambo gaabo mabi.
12 Ngiisi útahiiti ubwenge, ali mu kizi keneka umutuulani wage.
Si umwitegeereza yehe, ali mu beera shee!
13 Ngiisi úli mu genda agahwehweteza, ali mu bishuuka ubumbishwa.
Si ngiisi úyemiirwi, yehe, ali mu bulanga mu mutima gwage.
14 Ikyanya ikihugo kiri mu bula uburongoozi, kiri mu shaabuka.
Si ikyanya abahanuuzi bali bingi, lyoki kiri mu kizibwa.
15 Ngiisi úli mu biikira umuhinjuka ubushinga, ali mu yiji tulagula.
Si ngiisi úli mu bulahira, ali mu ba atuuziri mu mutuula.
16 Umukazi woꞌkugirirana bwija, ali mu simbahwa.
Noꞌmushosi weꞌmisi, byo ali mu longa naaho, buli bugale.
17 Abandu beꞌshagayo, bali mu yiyungula boonyene.
Si umulangi yehe, ali mu yikululira umwama.
18 Nangora-mabi, ikyanya ali mu gungana, ibihembo byage biri mu múteba.
Si úli mu kola íbikwaniini, yehe, ali mu hembwa mu kati koꞌkuli.
19 Ngiisi úli mu gira íbikwaniini, ali mu longa ukulama.
Si úli mu kulikira amabi, yehe, ali mu fwa.
20 Ngiisi ábali mu bisha ishungi mbi mu mutima, Nahano ali mu ba abashombiri.
Si ngiisi ábali boꞌkuli, bo bali mu músimiisa.
21 Banangora-mabi, ukuhanwa, bagaahanwa nyene.
Si ábakwaniini boohe, bagakizi genda mu butoge.
22 Ikyanya umukazi abuyahiri, anabe atasobanukiirwi,
ali mu ba nga mbete yeꞌnooro íbiisirwi ku mushushu gweꞌngulube.
23 Abandu ábali mu gira íbikwaniini, bali noꞌmulangaaliro kwo bagagashaanirwa.
Si banangora-mabi, boohe, umulangaaliro gwabo, guli gwa kuhanwa ku buraakari naaho.
24 Ikyanya abandu bali mu haana ku mutima úgushenguusiri, bali mu yushuulwa kweꞌbindi.
Si ikyanya bali mu yimana, bali mu herera mu bukeni.
25 Ikyanya abandu bali mu haana ku shagayo, bali mu genduukirwa.
Neꞌkyanya bali mu tabaala abandi, lyo nabo bali mu tabaalwa.
26 Ikyanya umundu ali mu bishiiriza ingano, abandu bali mu múdaaka.
Si ikyanya ali mu yemeera ukugiguliisa, bali mu kizi múgashaanira.
27 Ikyanya abandu bali mu looza ukugirirana amiija, nabo bali mu gagirirwa.
Si ngiisi úli mu looza ukugira amabi, galya mabi gali mu múgalukira.
28 Ikyanya abandu bali mu yegamira ibindu byabo, bali mu tindibuka.
Si umundu mwija yehe, agaadeha nga kyasi kibishi.
29 Ikyanya umundu ali mu shombania aba mu mwage, ali mu yiji yimbula mweꞌmbuusi naaho.
Ee! Umuhwija, agayama ali muja woꞌmwitegeereza.
30 Ikyanya umundu akwaniini, ali mu tabaala abaabo, anabaleetere ubugumaana.
Noꞌmwitegeereza ali mu yigiriza abandi ngiisi kwo bangatuula bwija.
31 Umundu úkwaniini ali mu longa ikihembo ku byo agira hano mu kihugo.
Aahago! Imwa nangora-mabi, neꞌmwoꞌmunabyaha, ka itali yo haahe!