19
Ubulangashane bwa Rurema neꞌmikolezi yage
1 Imwoꞌmwimangizi waꞌbimbi. Izaburi ya Dahudi.
2 Igulu liri mu yerekana ubulangashane bwa Rurema.
Ee! Mu kyanyaanya, mwo tuli mu bona byo akakola.
3 Iyo myazi, umulege-rege mutaazi guli mu kizi gibalira úmuzinda.
Kiri noꞌbushigi, nabwo kwo na kwokwo.
4 Bigweti bigakizi deta, buzira kukoleesa izu.
Ee ma! Ndaalyo íriri mu yuvwikana.
5 Kundu kwokwo, indumwa yabyo iri mu kwira mu mahanga gooshi,
halinde inahike heꞌkihugo kihekiiri.
Yaho hiꞌgulu, Rurema akaloogeza izuuba ho ligabeera.*19.5 Barumi 10.18.
6 Linali mu kizi suula umulindi.
Liri mu tibita, nga nahano woꞌbuhya úshambiiri.
Linali nga muhimi úgweti úgatibita ku ndangwe.
7 Ee ma! Liri mu huluka uluhande luguma lwa mu kyanyaanya,
linayami sookera ulundi.
Ndaanakyo íkyangayiyeka indugumbo yalyo.
8 Imaaja za Nahano zitungiini lwoshi.
Zinali mu kania umutima, halinde gunabe mugumaana.
Ngiisi byo Nahano agweti agakyula, bikwiriiri bikizi yemeerwa.
Biri mu hindula kiri neꞌbizeeze bibe noꞌbwitegeereze.
9 Amahano gaage gakwaniini, ganali mu shambaaza umutima.
Ngiisi byo ali mu kyula kwo, biri mu keyengana,
halinde amasu ganayengehe.
10 Ukusimbaha Nahano kukwaniini bweneene,
kuganayama ho, halinde imyaka neꞌmyakuula.
Imaaja zaage zisikamiri, zinakwaniini lwoshi-lwoshi.
11 Yizo maaja zaage, ziri neꞌkishingo ukuhima inooro,
kundu kangaba kanyamwala keꞌnooro muguuhya.
Zinanuniri bweneene, ukuhima ubuuki bushongoole.
12 E Rurema, imaaja zaawe ziri mu kizi kengula umukozi wawe.
Na mu kuzisimbaha, mwo ali mu longa imbembo mbamu bweneene.
13 Aaho! Nyandagi úwangabona amahube gaage yenyene? Si ndaaye!
E Nahano, ungoge ku mahube go ndi mu gira, buzira kumenya.
14 Kiri neꞌbyaha byo ngweti ngagiriirira, ukizi binjaagiza maashi.
Utabileke mbu bikizi ngoleesa.
Kwokwo, lyo ngayiyeka amahube mahamu.
Ndanaki galegwe kwo. Na mbe ngoli tuuziri buzira mahube.
15 E Nahano, amagambo ágalyosiri mu kanwa kaani,
kuguma neꞌnzaliro zaani, bikizi kusimiisa.
Mukuba we lwala lwani, we na Lukiza wani.