98
Mukizi yimbira Nahano
1 Izaburi.
Mukizi yimbira Nahano ulwimbo luhyahya.
Mukuba, ayamiri ali noꞌbushobozi, anali mweru.
Ali mu gira ibya kahebuuza,
iri anahimana ku njira yeꞌkitangaaza.
2 Nahano, keera akayerekana kwo ali muhimi bweneene.
Anayerekana kwo ali woꞌkuli, kiri na mu bandu baꞌmahanga gooshi.
3 Akalagaania Abahisiraheeri kwo agakizi bakunda, anakengiiri umuhango gwage,
anakizi bayereka kwakundi kwo ali mwemeera.
Abandu baꞌmahanga gooshi keera bakabona ngiisi kwo ali mu kiza.
4 Mwe bandu baꞌmahanga gooshi, mukizi bandira Nahano akabuuli.
Mukizi na múhuuza, iri munayimba ku bushambaale.
5 Ee! Mukizi yimbira Nahano,
iri munalasa inzeeze ku njira ísimisiizi.
6 Mukizi dihiriza ibibuga.
Mukizi lasa naꞌmahembe.
Nahano ye mwami witu.
Mukizi múbandira akabuuli.
7 Inyaaja na íbigiri mwo byoshi, bikizi múbandira utubuuli.
Ikihugo na íbikiri mwo byoshi, nabyo bikizi múbandira two.
8 Inyiiji zikizi koma amagasha ku busiime.
Neꞌmigazi ikizi yimba ku bushambaale.
9 Ee! Yibyo byoshi bikizi yimbira Nahano,
bwo agayiji twa imaaja za ábali mu kihugo.
Yizo maaja, agakizi zitwira ábali mu kihugo
nga kwo bibakwaniini, mu kati koꞌkuli.