111
Imikolezi ya Nahano, iri ya kahebuuza
1 Tukizi huuza Nahano!
Ikyanya ngayingira mu muhumaanano gwaꞌbandu ba Nahano,
ngakizi múhuuza ku mutima gwani gwoshi.
2 Mukuba, ngiisi mikolezi yo Nahano agweti agaagira,
iri ya kahebuuza.
Iyo mikolezi, ikyanya abandu bali mu gishambaalira,
bakwaniini bakizi giyitoneesa kwo.
3 Ee! Ngiisi byo ali mu gira,
biri mu yerekana ubulangashane bwage, halinde anagingikwe.
Ayamiri ali mu twa imaaja ku njira íkwaniini, halinde imyaka neꞌmyakuula.
4 Ibitangaaza bya Nahano, nyandagi úwangabiyibagira?
Si agweti agagashanirana, anali mu yuvwirana indengeerwa!
5 Ngiisi ábali mu ba bamúsimbahiri, ali mu baheereza byo bagaalya.
Neꞌkyanya akanywana ikihango nabo,
ali mu ba akikengiiri halinde imyaka neꞌmyakuula.
6 Nahano keera akayereka abandu baage ubushobozi bwage,
mu kubaheereza ibihugo byeꞌgindi milala, bube buhyane bwabo.
7 Ngiisi byo Nahano ali mu gira, biri byoꞌkuli, binakwaniini ukuyemeerwa.
Kwokwo, ikyanya ali mu tuheereza imaaja, tukwaniini tukizi múyemeera.
8 Mukuba, imaaja zaage ziyamiri ho imyaka neꞌmyakuula.
Ikyanya akazitanga, zâli za kuyemeerwa, zinâli zoꞌkuli.
9 Akaguluula abandu baage, ananywana ikihango bo nabo,
kinayamiri ho, halinde imyaka neꞌmyakuula.
Iziina lyage, liri litaluule, linali lya kahebuuza.
10 Ku kyanya umundu asimbahiri Nahano,
lyoꞌbumenyi buli mu múyijaga mwo,
analonge noꞌbwitegeereze.
Tukizi huuza Nahano, halinde imyaka neꞌmyakuula.