132
Nahano akatoola akaaya keꞌSayuni
1 Luli mu yimbwa na ábali mu zamuukira i Yerusaleemu.
E Nahano, ukengeere mwami Dahudi.
Ukengeerage naꞌmakuba gaage gooshi.
2 Ulyagagi Rurema wa Yakobo, unali Rurema woꞌBushobozi.
Uyo Dahudi akakubiikira indahiro kwokuno:
3 «Ndagayingira mu mwani,
ndanâye gwejere ku ngingo yani,
4 ndanâye lembwe niꞌro,
ndanâye hunire,
5 índazi kulingaaniza ho ugabeera.
E Nahano, Rurema wa Yakobo, unali we mwene Ubushobozi.
Ndoziizi nguloogeze ho ugakizi tuula.»
6 Tukayuvwa kwaꞌKajumba keꞌKihango kali mu kaaya keꞌHefurata.
Yako kajumba, twanakagwana kali mu mbingiro zeꞌmwa Yehariimu.
7 Aaho! Tugendage ngiisi ho Nahano atuuziri,
tunafukame imbere lyeꞌkitumbi kyage kyeꞌkyami, mu kumúyikumba.
8 E Nahano, uyimukage, uyiji beera ahandu haawe hoꞌkuluhuukira.
Uyije kuguma naꞌKajumba kaawe keꞌKihango.
Mukuba, ko kali mu yerekana ubushobozi bwawe.
9 Abagingi baawe bakizi yama bakwaniini, binabe nga byo byambalwa byabo.
Ngiisi ábakuyemiiri bakizi banda akabuuli ku bushambaale.
10 Si Dahudi ali mukozi wawe!
Aaho! Bwo keera ukamútoola, utaki mújandirire.
11 Nahano akalagaania Dahudi umuhango,
atanganaguyishuhiza kwo.
Mukuba, akamúlagaania kwokuno:
«Ngayimika umundu muguma wa mwiꞌkondo lyawe,
agenderere ukukizi twala isiku zooshi.
12 Abaana baawe, iri bangakizi simbaha ikihango kyani,
banakizi kulikira neꞌmaaja zo ngabayigiriza,
haaho, lyaꞌbaana baabo nabo, bagakizi twala imyaka neꞌmyakuula.»
13 Nahano akatoola akaaya keꞌSayuni,
analooza kwo habe ho agakizi tuula.
14 Anadeta: «Hano, ho ngakizi luhuukira, halinde imyaka neꞌmyakuula.
Hano handu, ho ngabwatala ku kitumbi kyani kyeꞌkyami.
Ee! Haahano!»
15 Kano kaaya keꞌSayuni, ngakizi kagashaanira, halinde kayere bweneene.
Kiri naꞌbakeni ábakatuuziri mwo, ngakizi bayigusa.
16 Abagingi baamwo bagakizibwa, bibe nga byambalwa byabo.
Na ngiisi ábakuyemiiri bagakizi banda akabuuli ku bushambaale.
17 Mu yako kaaya, ngayimika mwoꞌmwami wa mwiꞌkondo lya Dahudi.
Uyo mwami, nie gamútoola, ninamúsikamye,
halinde anakizi ba ngiꞌtara íriyasiri.
18 Abagoma baage, ngakizi bateeza ishoni.
Haliko yehe yenyene, ngamúyambika ulushembe úluli mu keyengana ngana-ngana.