135
Nahano ye mu kiza
1-2 Tukizi huuza Nahano!
Mwe bakozi ba Nahano, si mwe mutuuziri mu nyumba yage,
munali mu kizi shiiba mu lubuga lwayo!
Aaho! Mukizi múhuuza.
Mukizi huuza iziina lyage.
3 Nahano ali mwija. Aaho! Mukizi yivuga iziina lyage.
Mukizi múyimbira inyimbo zoꞌbwivuge.
Kwokwo, kwo bimúkwaniini.
4 Nahano yenyene, ye katoola beene Yakobo, babe bandu baage.
Ee! Akatoola Abahisiraheeri, babe beꞌmwage.
5 Nyiiji ku kasiisa kwo Nahano ye mukulu.
Ee! Nahamwitu ye sumbiri bweneene abandi ábali mu yikumbwa booshi.
6 Yehe, ngiisi byo aloziizi, ali mu bigira,
muba mwiꞌgulu, kandi iri mu kihugo, kiri na mu nyaaja, na mu tulingi twazo.
7 Ali mu zamuula ibibungu íbiri ku mbeka yeꞌkihugo,
analeete neꞌmilavyo, halinde invula inatonye.
Ali mu lyosa neꞌkihuhuuta mu bihinda byakyo.
8 Iyo munda mu kihugo kyeꞌMiisiri,
Rurema akayita yeꞌfula zaꞌbandu, kiri na zeꞌbitugwa.
9 E bandu beꞌMiisiri, Nahano âli kizi gira
ibimenyeeso byeꞌbitangaaza mu kihugo kiinyu.
Âli kizi bigira imbere lya Faraho, kiri neꞌmbere lyaꞌbatwali baage.
10 Rurema akaminika ibinyamahanga.
Na kundu abaami baabo bâli riiri bikalage, akabayita nyene.
11 Muguma wabo, ali Sihooni mwami waꞌBahamoori.
Noꞌgundi, ali Hoogi mwami weꞌBashaani,
kuguma naꞌbandi baami booshi ba mu kihugo kyeꞌKaanani.
12 Ibihugo byabo byoshi, anabinyaga,
anabiheereza abandu baage, Abahisiraheeri.
Bwanayiji ba bwo buhyane bwabo.
13 E Nahano, iziina lyawe liyamiri ho, halinde imyaka neꞌmyakuula.
Abandu beꞌbibusi byoshi bagakizi kukengeera.
14 Abakozi baawe booshi, unabayuvwirwe indengeerwa,*135.14 Bukengeeze 32.36; Baheburaniya 10.30.
halinde unakizi bulanira abandu baawe.
15 Ibinyamahanga bikalingaania imigisi naꞌmaboko gaabyo,
byanagitula mu harija, na mu nooro.
16 Kundu iri mu ba noꞌtunwa, si itangadeta!
Na kundu iri mu ba naꞌmasu, si itangabona.
17 Na kundu iri mu ba naꞌmatwiri, si itangayuvwa!
Na kundu iri mu ba naꞌmazuulu, si itangabayiza.
18 Haliibwi! Iyo migisi, ngiisi ábali mu gitula, si bagishushiri nyene!
Kiri na ábagibiisiri kwoꞌmulangaaliro, kwo na kwokwo.
19 Mwe Bahisiraheeri, mukizi huuza Nahano.
Mweshi, mwe ba mu nyumba ya Harooni, mukizi múhuuza.
20 Ee! Mwe ba mu nyumba ya Laawi, mukizi múhuuza.
Na niinyu mwe musimbahiri Nahano! Mweshi mukizi múhuuza.
21 E bandu beꞌYerusaleemu,
mukizi huuza Nahano ku mugazi Sayuni.
Tukizi huuza Nahano!