1 Ha nyuma, nanabonaga ikindi kihagarusi kyoꞌmuganda, kigweti kigayika ukulyoka mwiꞌgulu. Uyo muganda, âli sokaniinwi neꞌkibungu. Na hiꞌgulu liꞌtwe lyage, hâli soosiri umukuruzi. Amalanga gaage, gâli kizi langashana ngiꞌzuuba, ngaa! Amagulu gaage, gâli riiri nga nguliro zoꞌmuliro. 2 Uyo muganda, mu kuboko kwage, mwâli riiri ihitaabo hibunguule. Anabiika ukugulu kwage kweꞌlulyo ku nyaaja. Na kweꞌlumosho, anakubiika i bulambo. 3 Anateerera umulaga nga gwa kilulumbo kyeꞌndare. Neꞌkyanya akaguteerera, imikungulo irinda yanayuvwikana. 4 Neꞌri nꞌgaba ngola ngayandika byeꞌyo mikungulo ikadeta, lyeryo nanayuvwa irindi izu ukulyoka mwiꞌgulu, lyanambwira: «Yaga magambo, ngiisi kwo gadetwa neꞌyi mikungulo irinda, utakolwe mbu ugayandike! Ulekage naaho bube bumbishwa.»

5 Haaho, ulya muganda ye nꞌgabona atambaraziizi ku nyaaja na ku bulambo, anatigalika ukuboko kwage. 6 Anabiika indahiro kwiꞌziina lya Rurema úyamiri ho imyaka neꞌmyakuula, anali ye kabumba igulu neꞌkihugo, neꞌnyaaja, na íbibiri mwo byoshi. Ulya muganda anadeta: «Ikyanya kyoꞌkulindirira, keera kyamala! 7 Mukuba, ikyanya umuganda wa kalinda agadihiriza ikibuga kyage, lyeryo lyo ngiisi byo Rurema âli koli shungisiri ku bumbishwa bigakoleka. Bigaaba nga kwo âli mali gwanwa amenyeesa abaleevi baage, balya ábâli kizi múkolera.»

8 Yiryo izu ukulyoka mwiꞌgulu, lyanashubi mbwira: «Ugendi yabiiraga hiriira hitaabo hibunguule, íhiri mu kuboko kwoꞌliira muganda útambaraziizi amagulu ku nyaaja na ku bulambo.»

9 Kwokwo, nanayegeera uyo muganda. Neꞌri nꞌgamúhuuna hyo, anambwira: «Yihi hitaabo, uhiyabiire, unahilye. Ikyanya higaaba hikiri mu kanwa, higaaba hinunu nga buuki. Haliko, mango hiyikiraga mu nda, higalula.»

10 Kwokwo, yihyo hitaabo, nanahiyabiira mu kuboko kwage, nanahirya. Ikyanya hikaba hikiri mu kanwa, nanayuvwa kwo hiri hinunu nga buuki. Haliko, iri nꞌgaba keera nahimira, mu nda mwanatondeera ukulyana bweneene.

11 Haaho nanabwirwa, ti: «Uki kwiriiri ushubi tanga ubuleevi hiꞌgulu lyeꞌmilala mingi, neꞌbihugo bingi, neꞌndeto nyingi, naꞌbaami bingi.»