Ikitaabo kyoꞌ
Lwimbo Lwija Lwa Sulumaani
Indangiriro
Yiki kitaabo kikayandikwa na mwami Sulumaani, nga kwo tuli mu bona itwe lyakyo. Kiri mu yerekana ngiisi kwo mwami âli kundiini bweneene noꞌMushulaami-kazi. Mu siku ízikalenga, abandu bingi bâli kizi deta kwoꞌrukundo mwene yulwo, luli mu yerekana urukundo úluli ha kati ka Rurema naꞌBahisiraheeri, kandi iri ha kati ka Kirisito niꞌshengero.
Bwo yiki kitaabo kidesiri hiꞌgulu lyoꞌrukundo ha kati koꞌmushosi noꞌmukazi, kyo kitumiri kitali mu yami deta ku bweranyange, si kiri mu sooka-sooka, mu kushushirania urukundo ku biti, na ku bitumbwe, na ku tunyuni.
Yiki kitaabo, abanabwenge bingi bali mu kitengeka mwo kushatu: (a) ikyanya kyoꞌkutiza (1.1–3.5); (b) ubugeni bwonyene (3.6–5.1); (c) ukukizi kundana kwoꞌmushosi na mukaage. Ulya mukazi ali mu yoboha kwo hali ikyanya angahandulwa ku yiba. Si yiba akamúbwira ku bweranyange kwo amúkuuziri ngana-ngana (5.2–8.14).
Yiki kitaabo, kiyerekiini ngiisi kwoꞌmushosi noꞌmukazi bakwiriiri bakizi kundana ku njira nyeeru. Yiryo igambo, liri mu boneka mu 2.7, noꞌkushubi detwa mu 3.5, na mu 8.4: «E banyere beꞌYerusaleemu, namùyinginga maashi, kwiꞌziina lyeꞌnzobe, neꞌlyaꞌkasa, mutakolwe mbu muyivyule mwoꞌlulungumizi, neꞌkihe kyalwo kitazi hika.»
Íbiri mwo ku bwofi
a) Ukutiza (1.1–3.5)
b) Ubugeni (3.6–5.1)
c) Ukukundana kwoꞌmushosi na mukaage (5.2–8.14)
1
1 Luno lwimbo, luli lwa Sulumaani. Luli lwija ngana ukuhima izindi nyimbo zooshi.
Imiganuulo ya ábakundiini
Umunyere
2 «Bwangabiiri bwija ukizi nnyunyuguta.
Mukuba, urukundo lwawe luli lununu bweneene, ukuhima idivaayi.
3 Amalaasi gaawe gagweti gagahuumura bwija ngana-ngana.
Iziina lyawe ligweti ligasimiisa, ngaꞌmalaasi geꞌkishingo.
Aaho! Utagangaanwe, bwaꞌbanyere booshi bakuvunikiiri.
4 Ngwatiraga ku kuboko gira tugendanwe. Tuvwaruke duba.
E mwami, undwalage mu kisiika kyawe.»
Abaabo banyere beꞌYerusaleemu
«E mwami, tugweti tugakushambaalira.
Urukundo lwawe tugakizi luhuuza ukuhima idivaayi.»
Umunyere
«Balya banyere, ndaabyo íbyangababuza kwo batakuvunikire.»
5 «E banyere beꞌYerusaleemu, ndi mwiru-mwiru. Ninanonosiri ngana-ngana.
Ee! Ndi mwiru, ngaꞌmaheema geꞌKedaari.
Ndi mwiru-mwiru nga mirondo yoꞌkusiika, íri ku kajumba ka Sulumaani.
6 «Kundu ndyagagi mwiru, haliko mutambenekere.
Siꞌzuuba lyo litumiri ndi mwiru ziriri.
Beene witu, bâli gweti bagandakarira,
banambwira kwo ngizi kuya-kuya indalo zaabo zeꞌmizabibu.
Kyanatuma ndakalonga ikihe kyoꞌkuyilanga nienyene.
7 «Si we ndi ku mutima! Aaho! Umbwirage ho ugweti ugaragirira ibibuzi byawe.
Unambwire hayi ho ugabiluhuusa kalenge-renge.
Aahago! Kituma kiki nangagendi jeba-jeba,
mu kuyiji kuloogeza mu kiso kyaꞌbiinyu?»
Umushosi
8 «Yewe! We nonosiri ngana-ngana, ukuhima abakazi booshi.
Neꞌri utangamenya áhali iheema lyani, ugirage ukulikire umukulubuzo gweꞌbibuzi,
unagendi ragirira ibyanahene byawe hoofi naꞌmaheema gaꞌbangere.
9 «E mukundwa, uli mu genda uganooka-nooka,
nga mabuguma geꞌfwarasi íziri mu bulula igaare lya Faraho.
10 Lolaga! Amahereeni galimbisiizi amatama gaawe.
Niꞌgosi lyawe lilimbisiibwi noꞌbungeni-ngeni.
11 Tugaki kutulira imbete zeꞌnooro za ku matwiri.
Zigaaba ndimbiise bwija neꞌmigwaso yeꞌharija.»
Umunyere
12 «Mwami wani akoli gwejiiri ku ngingo.
Naꞌmalaasi gaani, gali mu huumura bwija.
13 Umukundwa wani ali ngiꞌfumba lyoꞌmubadu úgugweti gugahuumura bwija.
Emwe! Aluhuusiri mu mabeere gaani.
14 Uyo mukundwa ali nga twaso
útugweti tugayasa mu ndalo zeꞌmizabibu i Heni-Gedi.»
Umushosi
15 «E mukundwa, unonosiri ngana-ngana.
Emwe! Amasu gaawe galangashiini ngaꞌmasu geꞌngunde.»
Umunyere
16 «E mukundwa, naawe kwakundi unonosiri.
Ku kasiisa, uli mu simiisa ngana.
Ubweyo bubishi, ye gaaba ngingo yitu.
17 Inguliro zeꞌnyumba yitu, biri biti byeꞌmyerezi, kwo biri mu huumura bwija.
Na byeꞌdaari lyayo, biri byeꞌmiberoshi.»