9
Ibinyamahanga byeꞌbutambi byatwirwa ulubaaja
1 Ino ndumwa ya Nahano, iri mu hika mu kihugo kyeꞌHadiraki, na mu kaaya keꞌDamasiki. Mukuba, amasu ga Nahano gagweti gagakizi tanduula Abahisiraheeri. Na kwakundi, gali mu lola ku bandi bandu booshi.
2 Nahano anagweti aganatuma indumwa hiꞌgulu lyaꞌkaaya keꞌHamaati, ku mbande zeꞌDamasiki,
kuguma noꞌtwaya tweꞌTiiro na tweꞌSidooni.
Yutu twaya twoshi, kundu abandu baatwo balyagagi benge-benge,
halikago bagaki hanwa nyene.
3 Yako kaaya keꞌTiiro, keera kakayiyubakira inzitiro ngomu,
kanayilundiraga iharija neꞌnooro, nga lukungu mu njira.
4 Kundu kwokwo, birya bindu byamwo byoshi, Nahano agaki binyaga.
Na zirya nzitiro zoꞌkuyisiikira mwo, agazitibulira mu nyaaja.
Kalya kaaya, umuliro gugakajigiivya lwoshi-lwoshi!
5 Abandu beꞌHashikelooni, mango babonaga ngiisi kweꞌTiiro yashereera,
bagayami kanguka neꞌkyoba.
Kiri naꞌbandu beꞌGaza, naꞌbeꞌHekurooni, nabo bagayoboha, banateere umulangaaliro.
Mwami weꞌGaza, agayami yitwa.
Na mu kaaya keꞌHashikelooni, ndaaye mundu úgasigalaga mwo.
6 Mu kaaya keꞌHashidoodi, ibinyamahanga byo bigayiji katuula mwo.
Kwokwo, kwo Nahano agaamala ubwikangaate bwaꞌBafirisiti.
7 Inyama zeꞌbitugwa byo baniga, ngazinyugutula mu tunwa twabo,
kiri na íbikatangwa imweꞌmigisi.
Ngiisi ábagafuuka mu kati kaabo, bagayiji baꞌbandu baani,
nga kwaꞌBayuda nabo bali beꞌmwani.
Abafirisiti beꞌHekurooni, bagayibiika ku bandu baani,
nga kwo balya Bayebuusi bakagira.
8 Inyumba yani, nienyene ngagilaliiraga,
gira abasirikaani batayiji giteera.
Ee ma! Yabo bandu baani, ngoli babiisiri kwaꞌmasu,
hatayije ikinyamahanga íkigashubi yifunda mu kihugo kyabo.
Mwami woꞌkuleeta umutuula
9 E bandu beꞌSayuni! Mushambaalage!
E bandu beꞌYerusaleemu! Mubandage akabuuli!
Langiizi! Mwami winyu agweti agamùyijira.
Uyo mwami, ye kwaniini, anali muhimi.
Kuguma na yibyo, ali mutuudu, anashoniri ku punda.
Punda wage, akiri mwanuke.* 9.9 Mataayo 21.5; Yohana 12.15.
10 Ngamúshaagiza amagaare giꞌzibo, kuguma neꞌfwarasi zoꞌkugakulula,
halinde bitaki bonekage mu kihugo kya Hifurahimu,† 9.10 Hano Hifurahimu, buli bwami bweꞌHisiraheeri kandi iri bweꞌmbembe. kandi iri mu Yerusaleemu.
Kiri neꞌmiheto yiꞌzibo, ngagivuna-vuna.
Umwami winyu, aganywaniisa ibinyamahanga byoshi kuguma, mu kati koꞌmutuula.
Ubwami bwage, bugalyokera ku nyaaja nguma, halinde ku gindi,
bunalyokere ku lwiji Hefuraati, halinde ukuhisa heꞌkihugo kihekiiri.
Imbohe zaguluulwa
11 Nahano adetaga kwokuno: «Keera tukanywanaga ikihango,
twanakikwiza ku njira yoꞌmuko.
Kyo kitumiri ngaguluula imbohe ziinyu,
zilyokage ho zishwekiirwi mu kirimbi-rimbi kizira miiji.
12 E mbohe, mwe muki langaliiri!
Mugalukirage mu kaaya kiinyu kazitire.
Buno, namùlagaania kwokuno: Ku ngiisi malibu gwo mwâli kizi longaga,
ngola ngamùgalulira amiija ubugira kabiri.
13 Ngolaga ngakoleesa Abayuda bakizi ba nga miheto yani.
Abahifurahimu nabo, nabagira babe nga myambi yani.
E Sayuni! Ulyagagi kikalage kyoꞌmusirikaani!
Ngaatuma abandu baawe nga ngooti, gira bagendi teera Abagiriki.»
14 Nahano agahulukira ku bandu baage mu kibungu.
Irya myambi yage, agakizi givurumika nga mulavyo.
Rurema woꞌbushobozi bwoshi, agadihiriza ikibuga.
Anayiji teera abagoma nga mbuusi ngayu yeꞌkisaka.
15 Nahano woꞌbushobozi bwoshi, agakizi haliza abandu baage.
Si abagoma boohe, agabajiga, anabaminike lwoshi-lwoshi.
Yabo bagoma, bagakizi yamiza nga balaluka idivaayi,
baganayonwa umuko, gunakizi golomba,
nga muko gwiꞌtuulo úguli mu nzoozo,
gunali gwa kushangira ku tugongo twaꞌkatanda.
16 Ku yikyo kyanya, Rurema Nahamwabo agaakiza abandu baage,
nga kwoꞌmungere agweti agaakiza ibibuzi byage.
Nabo, banalangashane mu kihugo,
nga mabuye geꞌkishingo go bakalimbiisa mwoꞌlushembe.
17 Emwe! Bagaaba banonosiri ngana-ngana,
banalimbiisibwe bweneene!
Imisore yabo mitabana neꞌminyere, igaafiika bweneene,
bweꞌngano neꞌdivaayi bigaaba bikoli luguusiri.