11
Abanabushobozi bashulikwa
1 E migazi yeꞌLebanooni! Uyigulage imiryango yawe,
halinde umuliro guyiji jigiivya ibiti byawe byeꞌmyerezi.
2 E biti byeꞌshindano, mubululukage.
Si ibiti byeꞌmyerezi, kundu biryagagi bila bweneene,
haliko bikakunyuka naaho.
E migazi yeꞌBashaani! Na niinyu, mubululuke!
Kundu ulubako lwinyu lushuba luhamu bweneene, buno keera lukatemwa.
3 Yuvwi ngiisi kwaꞌbangere bagweti bagabululuka,
bweꞌndagiriro zaabo keera zasherebera.
Yuvwi na ngiisi kweꞌndare zigweti zigalunduma,
bweꞌbishungu-shungu byazo íbishuba ku ndekeera yeꞌYorodaani keera byayanuuka.
Abangere babiri
4 Rurema Nahamwitu, adetaga kwokuno: «Ugendi ba mungere weꞌkiso kyeꞌbibuzi íkishungisirwi ukugendi tongeerwa. 5 Ábali mu kizi bigula bali mu bitongeera, buzira kubona kwo bagira buligo. Na ábali mu kizi biguliisa nabo, bali mu deta: “Kongwa imwa Nahano! Buno, keera twagalaga!” Kiri naꞌbangere baabyo boonyene, ndaayo ndengeerwa babiyuvwitiiri.
6 «Kwokwo, nie Nahano nadetaga kwokuno: Kiri na naani, yabo bandu, ndagaki shubi bakejeerera. Si ngaaleka bakizi libuzibwa naꞌbatuulani baabo, balibuzibwe kiri na mwami. Ikihugo kyabo, kigashereezibwa lwoshi-lwoshi. Ndaanaye mundu ye ngalekaga kwo atoloboke mu maboko gaabo.»
7 Kwokwo nanagendi ba mungere wa yibyo bibuzi byo yabo badandaza keera balingikania gira bigendi tongeerwa. Nanayabiiraga ingoni zibiri. Ngoni nguma, nanagihamagala Bugashaane. Neꞌgindi, Buguma. Kwokwo, nanagendi langa ibibuzi. 8 Mu mwezi muguma naaho, nanayami yimula abangere baabyo bashatu.
Kundu kwokwo, birya bibuzi, ndanaki biyigenderera. Nabyo, byananjomba. 9 Kwokwo, nanabibwira: «Ndagaki genderera ukushubi ba mungere winyu. Iri mugaafwa, mufwe! Neꞌri mugayitwa, muyitwe! Neꞌbigafuuka, bilooza bikizi janganulana!»
10 Ha nyuma, nanayabiiraga irya ngoni yani Bugashaane, nanagivuna mwo kubiri. Kwokwo, kwo nꞌgayerekana kwo keera nꞌgahongola ikihango, kundu twâli mali kinywana naꞌbandu baani. 11 Ee! Ku kyekyo kyanya, lyo nayami kihongola. Ngiisi bibuzi íbiri mwoꞌbukaholwe, byanayami sobanukirwa kwo Nahano ye wambwira ukugira kwokwo.
12 Ha nyuma, nanashubi babwira kwokuno: «Iri byangamùsimiisa, mundihe ibihembo, nga kwo bingwiriiri. Kandi iri nanga, mulekage!» Kwokwo, banambaruurira ibingorongoro makumi gashatu byeꞌharija, nga mbembo yani.
13 Ha nyuma, Nahano anambwira: «Irya mbembo, ka yo iyerekiini ikishingo kyani? Aahago! Yutwo tufwaranga, utukabule umutuzi.» Kwokwo, nanatuyabiira, nanatukabula umutuzi mu nyumba ya Nahano.
14 Ha nyuma, kandi, nanatoolaga irya ngoni ya kabiri íri mu buuzibwa Buguma, nanagivunaga mwo kubiri, mu kuyerekana kweꞌkihango kyaꞌBayuda bakanywana naꞌBahisiraheeri, nakyo keera kyahongolwa.
15 Nahano anashubi mbwira: «Leero, uyigirage nga kafwa-busha koꞌmungere! 16 Kwokwo, kwo ugayerekana ngiisi kwo ngaheereza kino kihugo umungere útagahalalira ibibuzi kandi iri ibyanabuzi, kundu bikola bigagendi tongeerwa. Kiri na íbikomeresiri, atanakizi bibuka. Na íbikiri bigumaana kwakundi, atanakizi biragira. Si ikyanya agaabona íbishishiri, lyoki agakizi birya. Anakizi janganula kiri neꞌbinogosho byabyo.»
17 Yayewe imwa mungere kafwa-busha!
Si agweti agajandirira ibibuzi byage!
Aahago! Mwiꞌzibo, ingooti igayami singula ukuboko kwage,
inatumite kiri na mwiꞌsu lyage lyeꞌlulyo!
Kwokwo, yukwo kuboko kunayami nyaala.
Niꞌsu lyage lyeꞌlulyo, linayami humaala lwoshi-lwoshi!