Paulus ni surat i ntulis lan verin sidovung tamata ovi rorang Yesus naꞌa kota Korintus
Tbas afa ovi veki
Kota Korintus lan a, kota dawan isa naꞌa propinsi Akhaya. Tamata ovi rnaꞌa Korintus, rivun ira wol rkaꞌa Duilaꞌa obin. Ira rsangatur ma raraning ubu siklabir ra, ovu rira afa rivun ovi rotu ra sian urun. Paulus ula ia ma nfamalik Ubu Ni Ivar Lolin naꞌa Korintus, ba tamata boku tali ira rorang Duilaꞌa Yesus (Kisah 18:1-11). Naꞌut i Paulus nti talik Korintus, na Apolos nma vali Korintus. Ia nban-ulu verin tamata ovi rorang Yesus rira sidovung naꞌa inyai, ovu ia nkaꞌa urun ma nangrihi (Kisah 18:24—19:1). Apolos ini nair lalawatan tamata ovi rorang Yesus naꞌa Korintus (1 Korintus 3:6).
Vulan ifira nelak roak, na tamata ovi rorang Yesus na'a Korintus rtulis surat verin Paulus. Wean inyai bi, Paulus ntulis ni surat ini. Naꞌa ni surat ini, na ia nvalat afa ovi tamata Korintus rorat naꞌa rira surat a. Ia nsurak ira, tevek rira afa ovi rotu ra wol kena ovu wol inovan roak. Ia nsurak ira, tevek wol rsiotu lolin ira naꞌa rira vavaꞌat ra. Tamata boku tali ira wol inar roak Paulus, tevek inar aꞌuk Apolos te tamata liak ovi rban-ulu verin ira (1:10-12; 3:1-6). Ia nvalat ira naꞌa afa ovi inovan verin tamata ovi rsifa roak. Naꞌa rira surat a, na rorat Paulus ne, ni lolin a deka rsifa, boma rira vavaꞌat ra rmalola te wahal? Ira rorat vali ma rkaꞌa ne, wean inba ovu vata i norang roak Yesus, na'uk awan wol norang obin, na ia bisma ntalik awan a? Afa avyai munuk Paulus nfalyawang naꞌa pasal 7.
Tamata ra rorat Paulus ma rkaꞌa ne, tamata ovi rorang Yesus bisma raꞌan afwatan ihin i rala roak ma neluk rira korban verin walut ra te wahal? Paulus nfalyawang afa yai verin ira. Paulus ntabu vali ira, tevek boku tali ira rfakaratat tenarira ra ovu yabi i ntali Ubu Ni Roh a. Paulus nsurak nair ira naꞌa afa rivun, ovu ntabu vali ira naꞌa ni surat ini.
Surat ini ihin a
1. Paulus nfalak fara weninyai verin Ubu, ovu nala salam verin tamata ovi rorang Yesus rira sidovung naꞌa Korintus. (1:1-9)
2. Paulus nsurak tamata Korintus ra, tevek rsingarahi-sikual ira, ovu vali rira afa ovi rotu ra sian urun. (pasal 1:10—6:20)
3. Paulus nala snurak verin tamata ovi rsifa roak a. (pasal 7)
4. Paulus nfalyawang naꞌa afwatan ihin i rala roak ma neluk rira korban verin walut ra. (pasal 8:1—11:1)
5. Paulus nfalyawang naꞌa vata ovi rkum-teri ulurira ra naꞌa sidovung ralan. (11:2-16)
6. Paulus nfalyawang naꞌa i raꞌan roti ovu renu anggur ma rangnanang Duilaꞌa Yesus Ni matmatan a. (11:17-34)
7. Paulus nfalyawang naꞌa yabi ovi rtali Ubu Ni Roh a. (pasal 12—14)
8. Paulus nfamalik naꞌa tamata ovi rorang Yesus, naꞌuk rmata roak, ovu rira vavaꞌat i veka nma. (Pasal 15)
9. Paulus nfalyawang naꞌa kubang i rasdovuk ma rala verin tamata kasian ra naꞌa propinsi Yudea. (16:1-4)
10. Afa ovi Paulus nera ra ovu ni salam a. (16:5-24)
1
Paulus nala salam verin tamata ovi rorang Yesus rira sidovung naꞌa kota Korintus
1-3 Terang a valing ovi mnyaꞌa kota Korintus! Mia ini sidovung tamata ovi rorang Yesus. Ubu nfili roak mia, ovu notu ma bira vavaꞌat ra rmerat urun nahu Yesus Kristus. Mia mnyaꞌa roak sidovung yai ma myeluk Ni tamata ovi rira vavaꞌat ra rmalola, tevek isa roak mia ovu Ia. Tamata ovi rorang Duilaꞌa Yesus Kristus wearira vali inyai naꞌa wan inba watan. Ita munuk dida Duilaꞌa verin Ia. Yaꞌa Paulus, ovu dida kida tamata inorang i naran Sostenes; amaflurut verin Yamadida Ubilaꞌa ovu Duilaꞌa Yesus Kristus ma fara nala Ni rala lolin a verin mia, ovu notu ma bira vavaꞌat ra malinan watan. Ubu kaꞌi nera ovu nfili yaꞌa ma eluk rasul verin Kristus Yesus, ma ufamalik Ni Ivar Lolin a, ovu utulis surat ini verin mia.
Paulus nfalak fara weninyai verin Ubu, tevek afa ovi nala roak verin tamata ovi rorang Yesus naꞌa kota Korintus
4 Ufalak fara weninyai lalawatan verin Ubu i uraning a, tevek nala roak Ni rala lolin a verin mia. Rala lolin yai ntali afa ovi notu roak verin mia naꞌa Kristus Yesus. 5 Yaꞌa ufalak fara weninyai verin Ubu, tevek isa roak mia ovu Kristus, ba nala roak afa lolin rivun verin mia naꞌa bira vavaꞌat ra. Ia notu wean inyai, boma naꞌa afaka watan, na mia bisma fyamalik urun Ni Ivar i nfamalik Yesus, ovu vali bisma minovak nala munuk afa ovi nfalak ra verin mia. 6 Afa avyai rfaturu ne, Ivar i amfamalik roak verin mia naꞌa Kristus, nabwaꞌar urun roak naꞌa ralabira ra. 7 Ba Ubu Ni Roh nala roak yabi*1:7 Yabi naꞌa 1 Korintus ini, ihin a naꞌa vai Mala karunia. avyai munuk verin mia, boma bisma mkyarya verin Ia naꞌa Ni vaꞌi ralan a. Ba fiang ini ralabira urun al mnyaban dida Duilaꞌa Yesus Kristus Ni amar i veka nma ewal a. Ia veka nma ma tamata ra munuk rsiꞌik Ia. 8 Ia veka nfangrebat bira inorang a, ti naran amar i Duilaꞌa Yesus Kristus veka nma ewal a. Ba naꞌa amar yai, na wol bira sala roak naꞌa Duilaꞌa wahan ralan a. 9 Ubu veka nfangrebat mia, tevek Ia wol nablufang Ni tnorung i nala roak verin mia. Ia nera mia ma bira vavaꞌat isa roak ovu Yanan a Yesus Kristus. Wean inyai bi ufalak fara weninyai verin Ubu.
Sidovung tamata ovi rorang Yesus rsingarahi-sikual ira
10 Terang a valing averi! Duilaꞌa Yesus nsinir yaꞌa ma ungrihi, na ala lahir naran a ma ungrihi verin mia, boma myorang afa ovi mane ufalak verin mia ini. Era urun ma bir tinemun deka msyingarahi ma myotu bira sidovung alaling. Era vali ma mian vai isa watan naꞌa bira fikiran ra ovu afa ovi fyalak ra. 11 Terang a valing averi, ufalak wean ini, tevek vata i naran Kloꞌe ni tamata ra rma ma rfalak verin yaꞌa ne, mia msyingarahi-sikual mia ma fyalak naꞌa tamata i nban-ulu verin mia. 12 Ufalak wean inyai, tevek ira rfalak ne, tali bir tinemun, na boku rfalak ne rorang yaꞌa, Paulus. Boku rfalak ne rorang Apolos, boku vali rfalak ne rorang Petrus, ovu vali boku rfalak ne rorang Kristus.
13 Bira vaivatul avyai rotu ma wean i msyiduk Kristus tenan a tia ma watan! Afa yai wol kena lahir. Yaꞌa, Paulus, wol umata naꞌa aa walwalur ma al ukvanak mia, ovu wol rala narang a ma al rbaptis mia ovu myorang yaꞌa!†1:13 Aa walwalur ihin a, aa i rbaku Duilaꞌa Yesus naꞌa ma rfedan Ia, te naꞌa vai Mala nfalak ne, Kayu Salib. 14 Ufalak fara weninyai verin Ubu, tevek tali bir tinemun, na wol ubaptis munuk mia. Ubaptis watan Krispus ovu Gayus. 15 Ba fiang ini, wol bisma tamata isa vali ntali mia nfalak ne, yaꞌa ala narang a ma al ubaptis ia ma norang yaꞌa. 16 Yaꞌa utorung ne, ubaptis vali Stefanus ovu ni rahan teta a. Naꞌuk wol ungnanang ma lolin ne, betane nlia tali ira, na ubaptis tamata liak boku vali naꞌa inyai. 17 Yesus Kristus wol nsinir yaꞌa ma ubaptis tamata, naꞌuk nsinir yaꞌa ma ufamalik Ni Ivar Lolin. Yaꞌa wol ufamalik Ni Ivar Lolin a ovu kakaꞌa ovi rtali tamata rira afa ovi rfalak ra, tevek wean inyai, na Kristus Ni matmatan a naꞌa aa walwalur wol ni ngrebat akataka.‡1:17 Ivar Lolin ihin a ne, Ubu ntorung ma Yesus, Raja i ntevut dida salasilan ra, nma, boma ita bisma dida vavaꞌat kakiwal.
Ubu nfaturu Ni ngrebat a, Ni kakaꞌa a, ovu Ni fikiran a, nahu Yesus i nmata al nakvanak ita
18 Ba amfamalik Ivar i nfamalik Yesus Ni matmatan naꞌa aa walwalur ma al nakvanak tamata ra. Ivar yai vu watan verin tamata ovi Ubu mane nukun ira, tevek wol rorang Yesus. Naꞌuk Ivar yai nfaturu lahir Ubu Ni ngrebat verin ita, ma nsikat ita tali dida salasilan ra, ma dida vavaꞌat kakiwal. 19 Afa yai wean watan afa ovi Ubu nfalak roak naꞌa Surat Ralan ne,
“Yaꞌa veka ufasmoang tamata batbitar rira fikiran ra, ovu vali ufamwear kakaꞌa dawan tali tamata ra, boma wol rot-nala afa ovi ranovak ra.”§1:19 Yesaya 29:14
20 Ba wean inba ovu tamata batbitar ra, ovu tamata ovi rira kakaꞌa dawan a, dawan ovi rair Ubu Ni inukun ra, ovu vali tamata ovi rkaꞌa rangrihi ma uturira tamata liak rira fikiran ra? Ubu nfaturu roak ne, tamata ovi wol rorang Ia rira kakaꞌa yai wol fyawan akataka. 21 Ubu Ni kakaꞌa dawan urun ma nvolan wean ini: tamata ovi rnaꞌa lanit ivavan ini rira kakaꞌa dawan, naꞌuk ira wol rkaꞌa Ubu naꞌa rira kakaꞌa ra. Ubu nfadoku roak ma nsikat tamata ovi rorang Ia tali rira salasilan ra, nahu Ni Ivar Lolin i amfamalik roak a, ma rira vavaꞌat kakiwal. Ia notu wean inyai, velik ne tamata ovi wol rkaꞌa Ubu rfalak ne, Ivar yai vu watan. 22 Tamata Yahudi ra rera faneak veki, beti rorang afa ovi rarenar ra. Tamata Yunani ra inar ma rkaꞌa lan veki kakaꞌa dawan ovi rtali lanit ivavan ini, beti rorang. 23 Naꞌuk ami wol amangrihi wean inyai. Ami amfamalik watan Kristus i nmata naꞌa aa walwalur a. Ivar yai nfakeri lahir tamata Yahudi ralarira ra ovu vali tamata ovi wol Yahudi ra ranovak ne, Ivar yai vu watan.*1:23 Naꞌut i rtulis Surat Ralan, na wean i tamata nmata naꞌa aa walwalur, inyai nfaturu ne, tamata yai wol fyawan lahir, rfamaꞌit urun ia, ovu wol ni ngrebat akataka. Kristus yai Raja i ntevut dida salasilan ra. Ia Ni ngrebat a, utun lalawatan, ovu Ni dawan nlia munuk akataka. Naꞌuk tamata Yahudi wol rtorung lahir ne, Yesus yai Raja i ntevut tamata rira salasilan ra, tevek nmata. Ira rorang ne, Kristus wol bisma nmata. 24 Naꞌuk Ubu nera tamata boku ma rorang Ia. Tamata avyai boku Yahudi ira, ovu vali boku wol Yahudi ira. Naꞌut i rarenar Ubu Ni Ivar Lolin i nfamalik Yesus ma rorang Ia, na ira rfan-aran ne, Ia wean lahir ngrebat ovu kakaꞌa tali Ubu. 25 Tamata boku ranovak ne, Ivar i nfamalik Kristus ne, nmata naꞌa aa walwalur yai, Ivar vu watan. Velik aba, Ivar yai nlia munuk tamata rira kakaꞌa ra. Ira ranovak vali ne, afa ovi Ubu notu nahu Kristus wol ni ngrebat akataka. Velik aba, Ubu Ni ngrebat a nlia munuk tamata rira ngrebat ra.
26 Terang a valing averi! Eka mingnanang naꞌut i Ubu nera mia ma myorang Yesus. Naꞌut inyai, na tamata ovi rnaꞌa lanit ivavan ini ranovak ne, tamata ifira watan tali mia rira kakaꞌa dawan, ovu tamata boku watan, tamata ra baꞌi rarenar ira, ovu vali tamata boku watan, tamata dawan ira. 27 Naꞌuk Ubu nfili tamata ovi lanit ivavan a nfalak ira ne, rboda, boma nfamaꞌit tamata ovi rira kakaꞌa dawan ra. Ia nfili vali tamata ovi tamata liak ra rfalak ne wol fyawarira, boma nfamaꞌit tamata ovi tamata ra baꞌi rsoak nulu ira. 28 Ubu nfili vali tamata ovi tamata ra wol kaꞌi ralang ira, ovu nfili tamata ovi rfalak ne, wol fyawarira ovu vali tamata ovi wol rira van akataka lahir. Ia kaꞌi notu wean inyai, boma afa ovi tamata ranovak ne, fyawarira naꞌa lanit ivavan ini veka wol fyawarira lahir. 29 Notu wean inyai, boma deka tamata isa vali nfakaratat tenan a naꞌa Ubu wahan ralan a. 30 Naꞌuk Ubu kaꞌi notu watan ma isa roak mia ovu Kristus Yesus. Tali Ia, na ita tkaꞌa Ubu Ni kakaꞌa dawan a ovu Kristus nfamerat ita, ovu notu vali ma ita bisma lolin ewal ovu Ubu, ovu vali nfatalik ita tali afa ovi sian ra. 31 Ba terang a valing averi, wean watan i rtulis roak naꞌa Surat Ralan ne, “Wean i mane tfadawang afaka watan, na tfadawang aꞌuk Duilaꞌa, tevek Ni afa ovi notu ra.”†1:31 Yeremia 9:23
*1:7 1:7 Yabi naꞌa 1 Korintus ini, ihin a naꞌa vai Mala karunia.
†1:13 1:13 Aa walwalur ihin a, aa i rbaku Duilaꞌa Yesus naꞌa ma rfedan Ia, te naꞌa vai Mala nfalak ne, Kayu Salib.
‡1:17 1:17 Ivar Lolin ihin a ne, Ubu ntorung ma Yesus, Raja i ntevut dida salasilan ra, nma, boma ita bisma dida vavaꞌat kakiwal.
§1:19 1:19 Yesaya 29:14
*1:23 1:23 Naꞌut i rtulis Surat Ralan, na wean i tamata nmata naꞌa aa walwalur, inyai nfaturu ne, tamata yai wol fyawan lahir, rfamaꞌit urun ia, ovu wol ni ngrebat akataka. Kristus yai Raja i ntevut dida salasilan ra. Ia Ni ngrebat a, utun lalawatan, ovu Ni dawan nlia munuk akataka. Naꞌuk tamata Yahudi wol rtorung lahir ne, Yesus yai Raja i ntevut tamata rira salasilan ra, tevek nmata. Ira rorang ne, Kristus wol bisma nmata.
†1:31 1:31 Yeremia 9:23