1 Terang a valing averi, tamata ra rarenar roak ne, naꞌa bira sidovung a, na tamata ra rsifa tia ma watan ovu tamata ovi wol awarira verin ira.*5:1 Tamata ra rsifa tia ma watan ovu tamata ovi wol awarira verin ira ihin a ne, tamata ovi rsifa roak, na wol bisma rsifa ovu tamata liak. Varverun ovu vata mnelat ra wol bis rotu vali wean inyai. Urenar ne, tamata isa ntuba lahir ovu renan fareling a! Velik ne tamata boku wol rkaꞌa Ubu, naꞌuk wol tatuan afa sian i wean ini obin naꞌa rira vavaꞌat ra. 2 Velik ne mia musti myaꞌit, tevek afa i brana yai notu a, naꞌuk mia fyakaratat watan tenabira ra. Velik aba, ralabira ra musti lalau urun ovu myaling vatuk lahir tamata yai tali bira sidovung a. 3 Tevek mia mkyaꞌa roak ne, itmunuk wol tnaꞌa wan isa, naꞌuk ufikir lalawatan mia. Velik ne wol tnaꞌa wan isa, naꞌuk wean watan i unaꞌa roak bira sidovung a, ma yaꞌa ufaleka lahir inukun verin tamata i notu afa sian yai. 4-5 Wean i misdovu mia ovu ngrebat i tali dida Duilaꞌa Yesus Kristus, na fyikir watan ne, yaꞌa unaꞌa roak bira sidovung a. Ba myala Duilaꞌa Yesus Kristus naran a ma myaling vatuk tamata yai tali bira sidovung a, ma myala ia ti verin nitdawan a, boma nwi-nwa ia ma ni susa dawan ilaꞌa. Myotu wean inyai, boma ti naran amar i Duilaꞌa veka nma ewal ma nukun tamata ra, na Ia veka nala tamata yai ni roh a ma nsikat ia tali ni salasilan ra, ma ni vavaꞌat kakiwal.†5:4-5 Paulus ni maksud naꞌa ayat ini, na rala tamata i notu sian yai verin nitdawan a, boma nahil ma ntalik tali ni salasilan ra.

6 Ba wol inovan lahir ma fyakaratat tenabira ra naꞌa afa ovi sian ra. Mia wol mkyaꞌa ne ragi, velik ne koꞌu watan, naꞌuk bisma nfamela terigu ma dawan ilaꞌa. Inyai wean vali tamata i notu afa sian isa watan, naꞌuk bisma nlabir nala munuk mia. 7 Byatuk kikyai bira afa sian ovi myotu ra, tevek afa sian avyai wean lahir ragi i mnanat a. Myotu wean inyai, na mia weabira lahir roti i wol rotu ragi naꞌa, ba myerat roak, tevek Ubu Ni roak mia. Kristus neluk roak domba yanan ma nmata al nakvanak ita. Ia notu wean inyai ma neluk lingaꞌan ma Ubu naling vatuk dida salasilan ra, wean lahir domba i tamata Yahudi rfedan naꞌa rira amar dawan Paskah.‡5:7 Tamata Yahudi rotu snoba naꞌa rira amar dawan Paskah, ma rangnanang amar i uburir-nusirira ra rdir-talik Mesir, ma raꞌan roti ovi wol rfadoku ragi naꞌa, ovu vali rfedan domba. Vai mala nfalak domba i rfedan naꞌa amar dawan yai, domba Paskah. Keluaran 12:5-8 8 Ba mya ma totu snoba al tangnanang amar dawan yai, ma deka taꞌan roti i rfadoku ragi mnanat naꞌa. Inyai ihin a ne, naꞌa dida vavaꞌat ra, deka totu lahir afa ovi sian ra munuk, ovu deka tfikir sian tamata liak ra. Naꞌuk totu aꞌuk afa ovi lolin ra ovu afa ovi kena ra, ma deka tsileti lahir ovu afa ovi sian ra.§5:8 Deka taꞌan roti i rfadoku ragi mnanat naꞌa, naꞌuk taꞌan roti i wol rfadoku ragi naꞌa, ihin a ne, totu afa ovi lolin ovu afa ovi kena naꞌa dida vavaꞌat ra. Ihin vali ne, deka totu kikyai afa ovi sian ra. Keluaran 12:1-29, 13:6-8.

9 Utulis roak naꞌa ning surat lan a, ma ufalak verin mia ne, deka myotu kida ovu tamata ovi rsifa tia ma watan ovu tamata ovi wol awarira verin ira. 10 Yaꞌa wol mane ufalak ma deka myotu kida ovu tamata ovi wol rorang Ubu naꞌa lanit ivavan ini. Tamata avyai rsifa tia ma watan ovu tamata ovi wol awarira verin ira, te inar ma rtafal ilaꞌa rira metan ra ma rfikir aꞌuk tenarira ra, te rsiklabir, boma rala tamata liak rira metan ra, te rsoak nulu walut ra. Wean i mdyir-talik lahir lanit ivavan ini, beti bisma fyaroa tenabira ra tali tamata ovi wol rorang Ubu. 11 Naꞌuk inak ma ufalyawang afa ovi utulis roak verin mia naꞌa ning surat a ne, deka myotu kida ovu tamata ovi rfalak ne rorang Yesus, naꞌuk rsifa tia ma watan ovu tamata ovi wol awarira verin ira. Deka myotu kida vali ovu tamata ovi rfalak ne rorang Yesus, naꞌuk inar ma rtafal ilaꞌa rira metan ra ma rfikir aꞌuk tenarira ra, tamata ovi rsoak nulu walut ra, tamata ovi rfalak sian tamata liak ra, tamata ovi boranavut ira, ovu vali tamata ovi rsiklabir, boma rala tamata liak rira metan ra. Deka myotu kida ovu tamata ovi rfalak ne rorang Yesus, naꞌuk rotu afa sian avyai, ovu vali deka ti naran i mdyoku ma mifnaꞌan ovu ira!

12-13 Yaꞌa wol bisma ufaleka inukun verin tamata ovi wol rnaꞌa sidovung tamata ovi rorang Yesus, tevek wol ning varvara yai. Ubu aꞌuk saꞌi nfaleka inukun verin ira. Naꞌuk mia tamata ovi myorang Yesus bisma fyaleka lahir inukun verin terabir-valibira ovi rotu salasilan naꞌa bira sidovung a. Tevek rtulis roak naꞌa Surat Ralan ne, “Milaꞌing vatuk tamata ovi rotu afa ovi sian ra tali bira sidovung a.”*5:12-13 Ulangan 13:5, 17:7