1 Terang a valing averi, mane ufalak verin mia naꞌa kubang ovi inabira ma myala al mlyobang tamata ovi rorang Yesus naꞌa Yerusalem. Era ma myot-orang afa ovi ufaturu roak verin sidovung tamata ovi rorang Yesus naꞌa Galatia. 2 Lokat amar kareda, na mingnanang ma lokat mia fyadok-aling bira kubang boku tali bira karya enan ra. Fyadoku kubang avyai naꞌa bira rahan ra, ti naran i uma. Deka mnyaban ma uma, beti misdai ma misdovu bira kubang ra naꞌa isa. 3 Wean i uma aran roak, na veka usinir tamata ovi fyili roak ira, tevek mkyaꞌa ne, ira bisma rtaha kubang avyai rti Yerusalem. Yaꞌa veka ala surat verin ira ma al nfaturu ne, rfabana karya ini. 4 Ba wean i ufikir ne, ni lolin a yaꞌa ovu vali, na veka ovun ira ma amamunuk amati.

5 Terang a valing averi, yaꞌa veka ahu propinsi Makedonia, beti uti ma ulola mia. 6 Naꞌa Korintus, na yaꞌa ulolak mia amar ifira veki, te unaban ma amar ovi radridin a nbosal beti uti, boma wean uti inba watan, na bisma mlyobang yaꞌa naꞌa ning banbanan a. 7 Ba wol uti ma ulola mia obin, betane wol unaꞌa ma mnanat naꞌa inyai. Naꞌuk wean i Duilaꞌa ralan a nfalak, na inak ma unaꞌa inyai mnanat ovu mia. 8 Fiang ini unaꞌa Efesus, ba veka unaꞌa ini ti naran amar i Yahudi ra rotu rira amar dawan Pentakosta.*16:8 Naꞌa Perjanjian Mnanat naꞌa Surat Ralan, na amar dawan Pentakosta naran a naling ia. Rfanara ia ne, Snoba Karedralan Ifitu (Keluaran 34:22) ovu Snoba Fadiar (Keluaran 23:16), tevek tamata ra rdiar rira gandum ra, beti rotu amar dawan ini. Yahudi rivun tali wan rivun rti Yerusalem ma rorang amar dawan Pentakosta. Amar vutlima nelak roak tali amar i Yahudi ra rangnanang amar i rdir-talik Mesir (amar dawan Paskah), beti amar dawan Pentakosta. 9 Unaꞌa ini obin, tevek ufabana karya i Duilaꞌa nala verin yaꞌa ma tamata rivun rarenar Ni vaivatul ra, velik ne tamata rivun rangal vali yaꞌa naꞌa karya ini.†16:9 Kisah 19:1-11

10 Wean i Timotius nti ma ntuan mia, na msyiꞌik ma lolin ia boma deka ralan a kakoꞌu, tevek ia wean watan yaꞌa ma amfabana Duilaꞌa Ni karya a. 11 Ba deka msyiꞌik watan ma tamata ra tali bira sidovung yai wol ralang ia. Naꞌuk mlyobang ia, boma bisma newal ia ovu lolin watan ma ntuan yaꞌa, tevek unaban ia ovu terad a valid liak ovi veka rma vali ini. 12 Yaꞌa ufangnanang urun terad a valid i Apolos ma novun ni kida ovi rorang Yesus boku rti ma ralola mia. Naꞌuk ia nafena ma nti fiang ini. Naꞌuk amar liak, na ia veka nti ma nalola mia.

13 Mia musti msyiꞌik wabira ma lolin! Bira dardirin a naꞌa bira inorang a musti nangrebat! Deka byobar naꞌa bira inorang a, naꞌuk myorang urun ovu ngrebat i nanaꞌa ralabira ra. 14 Msyilobang mia naꞌa afa ovi myotu ra munuk. 15-16 Terang a valing averi! Mia veka mkyaꞌa roak ne, naꞌa Propinsi Akhaya, na Stefanus ovu ni rahan teta a ula lalean ira ma rorang Kristus. Ira ralarira urun ma rkarya al rlobang tamata ovi rorang Yesus. Wean inyai, bi era urun verin mia, ma myot-orang rira afa ovi rfalak ra, ovu vali tamata ovi irmunuk a rkarya. 17 Yaꞌa ralang a lolin urun naꞌut i Stefanus, Fortunatus ovu Akhaikus rma. Ira rnaꞌa ini ma rkati bir tinemun, tevek wol tnaꞌa wan isa. 18 Ira rotu ma ralang a lolin urun, wean lahir i rotu vali ma ralabira ra lolin a. Ita musti talang tamata ovi wearira avyai.

19 Tamata ovi rorang Yesus rira sidovung ra naꞌa propinsi Asia rala salam verin mia. Akwila ovu Priskila ovu vali sidovung tamata inorang i rasdovu ira naꞌa rira rahan a, rala vali salam verin mia naꞌa Duilaꞌa ovu ralarira urun, tevek bira vavaꞌat isa roak ovu Kristus. 20 Terabir-valibira ovi rorang Yesus naꞌa ini, rala vali salam verin mia. Ba lokat mia kaꞌi myala salam vali verin terabir-valibira ra ovu msyivoan mia ovu Ubu Ni Lolin a.

21 Yaꞌa Paulus ala salam verin mia. Yaꞌa kaꞌi utulis vaivatul ovi rban-muri lalean naꞌa surat ini, boma mkyaꞌa ne, aksa yaꞌa utulis surat ini. 22 Tamata ovi wol ralarira urun ma rlobang Duilaꞌa, na fara Ubu nukun ira ma rnaꞌa yafwan kakiwal. Era ma dida Duilaꞌa nma ewal.

23 Fara Duilaꞌa Yesus nala Ni rala lolin a verin mia.

24 Ulobang mia munuk tamata ovi bira vavaꞌat isa roak ovu Kristus. Kena urun. Ning surat i utulis ini, lawan watan ini.