1 Ami wol amtahang nala roak ralamami ra, tevek amaseak mia, ba amaꞌan vai isa roak ma amnaꞌa kota Atena watan, 2 ovu amsinir roak teradida isa naran Timotius ma nti nalola mia. Ia nkarya vali naꞌa Ubu Ni vaꞌi ralan a, ba amamunuk weamami isa watan ma amfamalik Ivar Lolin naꞌa Kristus. Amsinir ia ma ti nalola mia ovu nfangrebat ewal bira inorang a, ma myorang aꞌuk Yesus Kristus. 3 Wean inyai, boma wol tamata isa vali ni inorang a kakoꞌu, tevek afa sian ovi mtyuan a. Mia mkyaꞌa roak ne, Ubu ralan nfalak vali ma tamata ovi rorang Yesus veka rtuan susa vali, tevek rira inorang a. 4 Naꞌut i itmunuk obin, na amfalak lan roak verin mia ne, ita veka tatuan susa. Mia msyiꞌik roak ne, tatuan afa avyai. 5 Wean inyai bi usinir Timotius ma nti, boma ukaꞌa mngaꞌun ne, bira inorang a wean inba, tevek wol utahang nal ralang roak. Yaꞌa ralang raruan beta ne nitdawan nweang nala mia, ma mami karya i amfamalik Yesus verin tamata ra wol ihin akataka.

6 Ba fiang ini Timotius newal roak ia ma nfaloling ralamami ra ma nfamalik bira silobang a, ovu nfamalik vali ne, bira inorang verin Yesus nangrebat. Ia nfamalik vali ne, mia mingnanang lalawatan ami, ovu inabira ma mtyuan ami, wean vali ami inamami ma amtuan mia. 7 Amrenar ivar yai, na ralamami ra lolin watan. Velik ne tamata ra rwi-rwa ami ovu amtuan susa rivun, naꞌuk amrenar tamata ra rfamalik bira inorang verin Yesus, ba ralamami ra dawan watan. 8 Ba fiang ini ralamami ra lolin urun, tevek bira inorang verin Ubu nangrebat.

9 Ralamami lolin urun i lahir naꞌa Ubu wahan ralan a ma amfalak fara weninyai verin Ia, tevek bira inorang a nangrebat. 10 Ovan-amar amaflurut verin Ia ovu ralamami urun, boma tsituan ewal ita, ma amtafal ma amfangrebat bira inorang naꞌa Yesus Kristus.

11 Amaflurut verin Yamadida Ubilaꞌa ovu dida Duilaꞌa Yesus, ma fara nfamalola mami lingaꞌan a ma tsituan ewal ita. 12 Amera vali ma fara Ubu notu ma kaꞌi msyiotu lolin mia, ovu bira silobang ntafal verin tamata ra munuk, wean mami silobang verin mia. 13 Amera vali verin Duilaꞌa ma nfangrebat ralabira ra ma notu ma ralabira ra rmerat urun, ovu vali wol bira sala naꞌa Yamadida Ubilaꞌa wahan ralan a, naꞌut i dida Duilaꞌa Yesus nma ewal ovu Ni tamata ovi rorang Ia.*3:13 Tafsiran boku rfalak ne, Duilaꞌa Yesus veka nma ewal ovu Ni sansinir ra tali lanit ratan.