Paulus ni surat verin tamata ovi rorang Yesus rira sidovung naꞌa kota Kolose
Tbas afa ovi veki
Kota Kolose nanaꞌa propinsi Asia Koꞌu, ovu wol raroa tali kota Efesus. Paulus nkarya varat irua teran naꞌa Efesus ma nfamalik Ubu Ni Ivar Lolin a. Tamata ovi rorang Yesus, boku tali Efesus rti Kolose ma rfamalik Ubu Ni Ivar Lolin a, ma tamata Kolose boku rorang Duilaꞌa Yesus. Ti ma taꞌun ifira nelak roak, na Paulus ntulis surat ini verin tamata ovi rnaꞌa Kolose. Naꞌut inyai, na ia nanaꞌa buꞌi ralan, tevek nfamalik Ubu Ni Ivar Lolin a.
Naꞌa Paulus ni surat ini, na ia nfangnanang tamata Kolose ra naꞌa guru siklabir ovi rair afa ovi wol kena ra. Guru siklabir avyai rfalak ne, wean i inadida ma Ubu nsikat ita tali dida salasilan ra, ma dida vavaꞌat kakiwal, na wol mane torang watan Yesus, naꞌuk ita musti tsangatur ma traning vali afa ovi rira ngrebat ma rfareta naꞌa lanit ratan ovu lanit ivavan a. Afa avyai wearira Ubu Ni sansinir ra tali lanit ratan. Guru siklabir avyai rkiwal vali ita ma musti rsunat ita, ma tot-orang agama Yahudi rira inukun ra. Ira rfalak vali ne, musti tot-orang vali afa liak ovi Yahudi rira inukun ra rfalak a. Paulus nfangnanang tamata Kolose ra, ma deka rorang afa sala avyai. Ia nfalak verin ira ne, wean i torang watan Yesus, na inyai naran roak, tevek Ia bisma nsikat tamata ra tali rira salasilan ra, ma rira vavaꞌat kakiwal. Afa ovi guru siklabir avyai rair ra, inyai afa ovi wol kena ra, tevek ira wol rfamalik Yesus ma nlia tali afakataka munuk.
Surat ini ihin a
1. Paulus ni vaivatul ovi rban-ulu a. (1:1-2)
2. Paulus nfalak fara weninyai verin Ubu, ovu naflurut verin tamata Kolose ra. (1:3-14)
3. Kristus Ni ngrebat nlia munuk afa ovi rnaꞌa lanit ivavan a ovu naꞌa lanit ratan. (1:15-23)
4. Paulus ni karya ma nfamalik Ubu Ni Ivar Lolin a. (pasal 1:24—2:5)
5. Vaivatul ovi penting urun a: Ita dida vavaꞌat ra musti inovan ovu tamata ovi rorang Yesus rira vavaꞌat ra. (2:6-7)
6. Deka myorang afa ovi tamata rair ra, wean i wol inovan ovu dida inorang verin Yesus. (2:8-23)
7. Tvatuk dida vavaꞌat mnanat a ma tvaꞌat ovu dida vavaꞌat ngorvaꞌan a. (3:1-17)
8. Snurak verin vata ovu brana ovi rsifa roak a, verin kasikoꞌu ra ovu renarir-yamarira ra, ovu vali verin tamata sansinir (budak) ra ovu duarira ra. (pasal 3:18—4:1)
9. Snurak naꞌa dida falurut ra ovu naꞌa dida afa ovi totu ra verin tamata ovi wol rorang Yesus. (4:2-6)
10. Paulus ni salam a ovu ni vaivatul ovi rban-muri ra. (4:7-18)
1
Paulus nala salam verin tamata ovi rorang Yesus naꞌa kota Kolose
1-2 Terang a valing averi naꞌa kota Kolose, myorang urun Kristus, ovu bira vavaꞌat isa roak ovu Ia, ovu myot-orang lalawatan afa ovi nfalak ra. Surat ini ntali yaꞌa, Paulus. Ubu nfili yaꞌa ma eluk rasul verin Kristus Yesus, tevek ralan nfalak wean inyai. Terad i Timotius nanaꞌa ini ovu yaꞌa. Uflurut verin Yamadida Ubilaꞌa ma fara nala Ni rala lolin verin mia, boma bira vavaꞌat ra malinan watan.
3 Lokat amar i amaflurut verin mia, na amfalak fara weninyai lalawatan verin Ubu i Yanan a verin dida Duilaꞌa Yesus Kristus. 4 Amfalak fara weninyai verin Ubu, tevek amrenar roak ne, myorang Yesus Kristus ovu mlyobang munuk tamata ovi rorang Ia. 5 Mia myorang Ubu ovu mlyobang tamata ra, tevek fyakloꞌi aꞌuk bira vavaꞌat ra verin Ia. Myotu wean inyai, tevek fyakloꞌi bira vavaꞌat ra naꞌa afa ovi Ubu nfadoku verin mia naꞌa lanit ratan, ovu veka bira vavaꞌat kakiwal naꞌa inyai. Mia mryenar lan roak afa avyai tali tamata ovi rfamalik Ubu Ni Ivar Lolin a. Ubu Ni Ivar Lolin yai kena lahir. 6 Ivar Lolin yai nbana obin ma veka ti nsoru wan rivun naꞌa lanit ivavan ini, ma tamata rivun rorang Yesus Kristus, ma rira vavaꞌat ra kena ovu afa ovi Ubu ralan nfalak a. Naꞌut i beti mryenar Ivar mngaꞌun yai, na mia weabira lahir ira ma myorang Yesus Kristus, ovu fyan-aran Ubu Ni rala lolin verin mia. 7 Amlobang urun mami kida Epafras i amamunuk amkarya. Epafras ini nair roak Ivar Lolin yai verin mia, ovu neluk tamata sansinir verin Kristus ma nkarya urun al nlobang mia. Ia not-orang lalawatan afa ovi Ubu nfalak ra. 8 Ia nfamalik verin ami bi amkaꞌa ne, Ubu Ni Roh nala ngrebat verin mia, tamata ovi myorang Ia ma msyilobang mia.
Paulus naflurut verin Ubu ma nala Ni ngrebat verin tamata ovi rorang Yesus naꞌa kota Kolose
9 Ba tali amar i beti amrenar bira ivar a, ma naran amar ini, na amaflurut lalawatan verin mia. Amera verin Ubu ma fara nala Ni kakaꞌa verin mia, boma mkyaꞌa lahir ne, inba kena ovu inba sala, ovu vali fyan-aran afa ovi rotu ma Ubu ralan lolin. 10 Amaflurut vali ma bira vavaꞌat ra veka kena urun ovu afa ovi Ubu ralan nfalak a, ovu vali afa ovi myotu ra rotu ma ralan a lolin watan. Fara myotu lalawatan afa ovi lolin ra, ovu bira kakaꞌa naꞌa Ubu veka ntafal vali. 11 Fara Ubu Ni ngrebat i dawan urun a nfangrebat mia, ma wean i mtyuan sian te lolin, na bira inorang a nangrebat, ovu mtyahang nal ralabira naꞌa afaka watan, ovu vali inabira lolin. 12 Uflurut vali verin mia ma fara fyalak fara weninyai verin Yamadida, tevek notu ma mtyuan afa ovi ralan nfalak roak verin mia naꞌa Ni tnorung a, ma mimunuk tamata inorang ovi veka rnaꞌa Ni Fareta i lyawan urun a.
Yesus Kristus Ni ngrebat dawan lia munuk afakataka
13 Yamadida Ubilaꞌa nfatalik roak ita tali nitdawan ni ngrebat a, ma nala roak ita ma ti tnaꞌa Yanan i nlobang a, Ni Fareta a. 14 Yanan yai ntevut roak ita, ma naꞌi vatuk roak dida salasilan ra, tevek dida vavaꞌat isa roak ovu Ia. 15 Ita wol trea Ubu. Naꞌuk wean i tfan-aran Yanan ralan a, na tfan-aran roak Ubu ralan a. Ita bis tfalak ne, Yesus ula lalean Ia tali afa ovi Ubu notu ra munuk, tevek Ni ngrebat a nlia munuk.*1:15 Vai mala naꞌa ayat ini nfalak ne, Yesus anak yang sulung, ihin a ne, Yesus ula lalean Ia tali afa ovi Ubu notu ra munuk. Naꞌut i Ubu wol notu afakataka obin, na Yesus Kristus nanaꞌa lan roak. 16 Ubu nfalak ma Yanan notu afakataka munuk naꞌa lanit ivavan ini ovu naꞌa lanit ratan. Ia notu afa ovi trea ra ovu afa ovi wol trea ra. Ia notu vali ma Ni sansinir ovi rnaꞌa lanit ratan ra, roh liak ovi rira ngrebat ra, ovu vali rira fareta ra ma rira dakdokun ra rsialing ira. Ubu nfalak ma Yesus Kristus notu afakataka munuk, ma rfadawang Ia. 17 Kristus nanaꞌa lan roak naꞌut i wol akataka lahir obin. Ia nasusan akataka munuk, ma rnaꞌa watan warira ra. 18 Kristus nfareta Ni tamata ovi rorang Ia, wean lahir tamata ulun nfareta tenan a. Ia nala vavaꞌat verin tamata ovi rorang Ia rira sidovung a, ovu nvaꞌat lan roak tali matmatan ra, boma Ia aꞌuk saꞌi dawan lia munuk afakataka. 19 Tevek Ubu nfadoku roak ma Yanan Ni vavaꞌat a, ovu ralan a, ovu vali Ni ngrebat a wean lahir Ia. 20 Ubu nfadoku lahir ma tali Yanan a, na afakataka munuk naꞌa lanit ivavan ini, ovu vali naꞌa lanit ratan malinan ewal roak ovu Ia. Kristus laran nvoat naꞌa aa walwalur notu ma afakataka munuk malinan ewal ovu Ubu.
21 Lan ana, ralabira ra raroa tali Ubu. Mia myangal Ia ovu bira fikiran sian ra, ovu vali afa sian ovi myotu ra. 22 Naꞌuk fiang ini, Ia notu ma ralabira ra malinan ewal ovu Ubu, tevek notu ma Kristus neluk tamata ma nmata roak. Ni matmatan a notu vali ma nfamerat mia tali bira salasilan ra ma myerat urun, naꞌa amar i veka mdyiri Ubu wahan ralan a. 23 Ba wean i inabira ma wean urun inyai, na bira inorang a musti nabwaꞌar. Deka mane tamata liak rotu teri mia ma wol mnyaban afa lolin ovi Ubu ntorung roak ma veka nala verin tamata ovi rorang Yesus. Mia mryenar roak Ubu Ni Ivar Lolin i nban-soru roak, nti wan rivun naꞌa lanit ivavan ini. Ubu nfili yaꞌa, Paulus, ma ufamalik Ni Ivar Lolin a verin tamata ra.
Paulus nfamalik Ubu Ni Ivar Lolin a
24 Yaꞌa ralang lolin urun, velik ne fiang ini utuan susa, tevek ukarya ma ulobang mia. Yaꞌa veka utuan susa obin, tevek ukarya verin Kristus. Ba fiang ini utuan roak susa, tevek ukarya verin tamata ovi rorang Kristus, naꞌa afa susa ovi Kristus nfadoku ma utuan a. Ita tamata ovi torang Kristus weadida tenan a. 25 Ubu nala varvara verin yaꞌa ma ukarya verin mia, tamata ovi myorang Ia, ma ufamalik munuk Ni Ivar Lolin a verin mia. 26 Tali lalan ana, Ubu wol nfavotuk Ivar ini, naꞌuk fiang ini nfavotuk roak verin Ni tamata ovi rorang Ia. 27 Ubu inan ma nfalyawang verin Ni tamata ra naꞌa afa fanfonak i lolin urun yai. Ubu nfadoku roak ma nala Ni kalolin a verin tamata ovi wol Yahudi ra. Ivar Lolin yai ihin a ne, Kristus nleal ralabira ra, boma mkyaꞌa basil ne, veka mimunuk Ubu naꞌa lanit ratan ovu Ni lyawan i nfitik nyadat a. 28 Amfamalik Ivar Lolin naꞌa Kristus verin tamata ra munuk. Amfangnanang ovu amair ira ovu kakaꞌa dawan i Ubu nala verin ami, boma ti naran amar i amfavotuk tamata ovi rorang Kristus verin Ubu, na rira inorang nmela ma dawan roak. 29 Wean inyai, bi ukarya urun, tevek Kristus Ni ngrebat nlobang yaꞌa ma afa ovi otu ra lyawan roak.
*1:15 1:15 Vai mala naꞌa ayat ini nfalak ne, Yesus anak yang sulung, ihin a ne, Yesus ula lalean Ia tali afa ovi Ubu notu ra munuk.