4
1 Mane ufalyawang wean ini: Naꞌa rahan teta isa, na rahan duan nfadoku roak ma yanan isa veka ni munuk metan ra. Naꞌuk wol varverun ia obin, ba wol ni akataka obin, wean watan tamata sansinir. 2 Tamata boku rwanar ovu rsurak a rair kasikoꞌu yai, ovu vali rsiꞌik teri ni metan ra, ti naran amar i yaman a nfadoku a. 3 Wean vali inyai verin ita. Naꞌut i weadida kasikoꞌu yai obin, na torang watan adat ovu inukun ovi rnaꞌa lanit ivavan ini, ma afa avyai rsinir tia ma watan ita, wean tamata ra rsinir tia ma watan rira tamata sansinir ra.*4:3 Tafsiran boku rfalak ne, Adat ovu inukun ovi rnaꞌa lanit ivavan ini ihin a ne, roh ovi rnaꞌa lanit ivavan ini. 4 Naꞌuk ti naran amar i Ubu nfadoku a, na Ia nsinir roak Yanan a ma nma lanit ivavan ini. Vata isa nrali Ia, ovu naꞌa Ni vavaꞌat a not-orang Musa ni inukun ra. 5 Ia nma ma nfatalik ita tali Musa ni inukun ra, boma Ubu nala vali ita ma teluk yanan ra. 6 Ubu nala roak ita ma teluk yanan ra, ba nsinir Yanan Ni Roh a ma nleal raladida ra. Ubu Yanan Ni Roh yai notu ma bis tfalak ne, “Bapa oo, Bapa!”†4:6 Teks Yunani nfalak Abba, ovu vaivatul ini ntali vai Aram, ihin a ne, Bapa. 7 Ba mia wol myeluk tamata sansinir roak, naꞌuk Ubu yanan roak mia. Ba Ubu veka nala vali verin mia afa ovi ntorung roak verin yanan ra.
Paulus ralan raruan naꞌa tamata ovi rorang Yesus rira sidovung a naꞌa Galatia
8 Terang a valing averi, lan ana, mia wol mkyaꞌa Ubu, ba mia weabira tamata sansinir verin ubu siklabir ra. 9 Naꞌuk fiang ini mia mkyaꞌa roak Ubu, te ni lolin a ufalak ne, Ubu nkaꞌa roak mia. Ba afaki notu mi myorang ewal adat ovu inukun ovi rnaꞌa lanit ivavan ini, velik ne afa avyai wol rira ngrebat ovu wol fyawar lahir? Inabira ma msyoak ewal verin adat ovu inukun avyai, ma myeluk tamata sansinir verin afa avyai? 10 Mia ivaꞌubira ma myorang agama Yahudi ni snoba ra ovu amar dawan ra naꞌa amar, vulan, ovu varat ra. 11 Yaꞌa ralang raruan naꞌa afa ovi otu roak verin mia yai, betane ning farea nleka ma lolan watan.
12 Terang a valing averi, era verin mia ovu ralang urun ma fara myot-orang afa ovi otu ra, tevek utalik roak mami adat Yahudi ma uvaꞌat wean mia, tamata ovi wol Yahudi ra.
Mia vali wol myotu sala verin yaꞌa.
13 Mia mkyaꞌa roak ne, lan ana, ning suhut a notu ma beti uti fasa ma ufamalik Ubu Ni Ivar Lolin verin mia. 14 Velik ne naꞌut inyai, na ning suhut neluk angangal verin mia, naꞌuk wol mkyasiri yaꞌa ma milaꞌing yaꞌa. Myotu ma lolin watan yaꞌa, wean watan i myotu ma lolin vali Ubu Ni sansinir i ntali lanit ratan a, ovu nlia tali inyai vali, na wean i myotu verin Kristus Yesus. 15 Ba naꞌut inyai, na inabira lolin urun, naꞌuk fiang ini inabira lolin yai nahu ba nti? Yaꞌa bis ufalak lahir ne, naꞌut inyai, na myotu afaka watan ma al mlyobang yaꞌa, ma naran i mtyorung ma mkyivul matabira ra ma myala verin yaꞌa! 16 Fiang ini minovak ne, bira sian yaꞌa, tevek ufalak afa ovi kena ra verin mia?
17 Tamata avyai inar ma myot-orang Musa ni inukun ra, naꞌuk afa ovi rotu ra wol lolin. Ira inar ma tsisala raladida, boma myorang ira ovu ralabira urun, ma deka myorang ami. 18 Lolin ma mkyarya ovu ralabira urun, wean i myotu afa ovi lolin ra. Fara mkyarya lalawatan ovu ralabira urun. Deka mane unaꞌa ovu mia beti mkyarya, naꞌuk uban-muring ana, myotu afa liak. 19 Yanak averi, ulobang mia. Ralang nwaꞌuk urun tevek mia, ba wawaꞌuk i ufarnuang ini wean lahir wawaꞌuk i vata ra rfarnuang naꞌut i mane rarali ira. Yaꞌa veka utuan susa lalawatan, nata ti naran i bira vavaꞌat a wean Kristus Ni vavaꞌat a. 20 Umaseak urun ma udoku ovu bir tinemun, boma ala vaivatul boku ma usurak ngalalahang mia ma al ufalak ralang a verin mia. Yaꞌa wol ukaꞌa roak ne, veka otu afaka vali verin mia, tevek tsifaroa ita.
Paulus nfamalik Hagar ovu Sara ma neluk vaivatul kamkuma
21 Terang a valing averi, tali bir tinemun, na boku mane myot-orang Musa ni inukun ra munuk, naꞌuk fyan-aran inukun avyai ihirira ra te wahal? 22 Musa ntulis roak naꞌa inyai ne, Abraham yanan brana irua. Isa renan a verin Abraham ni vata sansinir a naran Hagar, na isa vali renan a verin Abraham awan i naran Sara. Ia wol neluk vata sansinir.‡4:22 Abraham awan a naran Sara, yanan a naran Ishak (Kejadian 21:1-4). Abraham ni vata sansinir naran Hagar, yanan a naran Ismael (Kejadian 16:15). 23 Kasikoꞌu i renan verin vata sansinir yai rarali ia wean watan tamata biasa. Naꞌuk kasikoꞌu i renan a verin vata i wol neluk sansinir yai rarali ia, ma nfakena Ubu Ni tnorung a verin Abraham.§4:23 Sara nngerat (wol bisma yanan) ovu tuvu ilaꞌa roak ia, naꞌuk Ubu notu mujizat ma Sara nrali Ishak (Kejadian 21:1-4). 24 Tomu ini nfalyawang verin ita wean ini. Vata irua yai wean tnorung irua tali Ubu. Hagar wean tnorung i Ubu nala naꞌa vuar Sinai. Tnorung yai nkiwal tamata ra ma rtorung Ni inukun ra, ba wean vali inyai, vata sansinir yanan ra veka rnaꞌa watan sansinir.*4:24 Tnorung ntali vuar Sinai ihin a ne, tnorung i Ubu nala verin Musa naꞌa vuar Sinai (Keluaran 19:3-6). 25 Hagar yai wean tamata ovi rsoak nulu inukun ovi rala naꞌa vuar Sinai i nanaꞌa Arab. Fiang ini ia wean kota Yerusalem, ovu tamata ovi rleal inyai wean yanan ra, tevek ira wearira sansinir ra ma rsoak verin Musa ni inukun ra. 26 Naꞌuk Sara wean kota Yerusalem i nanaꞌa lanit ratan a. Ia wean yanan verin tamata ovi wol rsoak nulu Musa ni inukun ra.†4:26 Paulus nbandingkan Hagar ovu Yerusalem i naꞌa lanit ivavan ini, na Sara ovu Yerusalem i naꞌa lanit ratan, te Yerusalem ngorvaꞌan. Ita tamata inorang ra renadida verin Sara, tevek torang Ubu Yanan a Yesus Kristus. 27 Tevek rtulis roak naꞌa Surat Ralan ne,
“Fara inam lolin watan, vata i wol yanam a, ma wol mdoku rahan fasa vali obin.
Fara ralam a lolin urun ma mufwak. Oa wol fwarnuang obin vata ovi mane rarali ira rira wawaꞌuk a.
Naꞌuk vata i awan nti talik ia, yanan ra veka rivun lia tali vata i awan nanaꞌa.”‡4:27 Tafsiran boku rfalak ne, Vata i wol awan a, yanan ra veka rivun lia tali vata i awan nanaꞌa, na boku vali rfalak ne, vata i nngerat (wol yanan), yanan ra veka rivun lia tali vata i awan nanaꞌa. Msiꞌik vali Yesaya 54:1.
28 Terang a valing averi, Ubu yanan roak mia, tevek myorang Ni tnorung i nala verin Abraham yai. Ba mia weabira vali Ishak i rarali ia, tevek myorang Ubu Ni tnorung yai. 29 Naꞌut inyai, na kasikoꞌu i Hagar nrali ia yai wean watan tamata biasa ma nwi-nwa kasikoꞌu i Sara nrali ia, tevek ngrebat tali Ubu Ni Roh. Fiang ini wean vali inyai, ma tamata ovi rsoak nulu Yahudi rira inukun ra rwi-rwa vali ita, tamata ovi torang Ubu Ni Roh a. 30 Rtulis roak naꞌa Surat Ralan ne, “Milaꞌing vatuk vata sansinir yai ovu yanan a, tevek vata sansinir yai yanan a wol ni wahat naꞌa vata i wol sansinir yai yanan a ni metan ovi rtali yaman a.”§4:30 Ini vaivatul kamkuma, ba ihin a ne, Sara wol tamata sansinir ia ovu yanan aꞌuk Ishak i nanaꞌa tnorung i Ubu nala verin Abraham, ba deka tsoak ewal verin Musa ni inukun ra. Yesus ubun a nusin verin Abraham irua Ishak. Msiꞌik Kejadian 21:10 31 Ba terang a valing averi, ita wol renadida verin Hagar, vata sansinir yai, naꞌuk ita renadida verin Sara, vata i wol neluk sansinir.*4:31 Ita wol tsoak nulu Musa ni inukun ra, naꞌuk torang aꞌuk Yesus Kristus, ba wol tvara roak dida salasilan ra, boma bisma tdiri nala naꞌa Ubu wahan ralan.
*4:3 4:3 Tafsiran boku rfalak ne, Adat ovu inukun ovi rnaꞌa lanit ivavan ini ihin a ne, roh ovi rnaꞌa lanit ivavan ini.
†4:6 4:6 Teks Yunani nfalak Abba, ovu vaivatul ini ntali vai Aram, ihin a ne, Bapa.
‡4:22 4:22 Abraham awan a naran Sara, yanan a naran Ishak (Kejadian 21:1-4). Abraham ni vata sansinir naran Hagar, yanan a naran Ismael (Kejadian 16:15).
§4:23 4:23 Sara nngerat (wol bisma yanan) ovu tuvu ilaꞌa roak ia, naꞌuk Ubu notu mujizat ma Sara nrali Ishak (Kejadian 21:1-4).
*4:24 4:24 Tnorung ntali vuar Sinai ihin a ne, tnorung i Ubu nala verin Musa naꞌa vuar Sinai (Keluaran 19:3-6).
†4:26 4:26 Paulus nbandingkan Hagar ovu Yerusalem i naꞌa lanit ivavan ini, na Sara ovu Yerusalem i naꞌa lanit ratan, te Yerusalem ngorvaꞌan. Ita tamata inorang ra renadida verin Sara, tevek torang Ubu Yanan a Yesus Kristus.
‡4:27 4:27 Tafsiran boku rfalak ne, Vata i wol awan a, yanan ra veka rivun lia tali vata i awan nanaꞌa, na boku vali rfalak ne, vata i nngerat (wol yanan), yanan ra veka rivun lia tali vata i awan nanaꞌa. Msiꞌik vali Yesaya 54:1.
§4:30 4:30 Ini vaivatul kamkuma, ba ihin a ne, Sara wol tamata sansinir ia ovu yanan aꞌuk Ishak i nanaꞌa tnorung i Ubu nala verin Abraham, ba deka tsoak ewal verin Musa ni inukun ra. Yesus ubun a nusin verin Abraham irua Ishak. Msiꞌik Kejadian 21:10
*4:31 4:31 Ita wol tsoak nulu Musa ni inukun ra, naꞌuk torang aꞌuk Yesus Kristus, ba wol tvara roak dida salasilan ra, boma bisma tdiri nala naꞌa Ubu wahan ralan.