1 Terang a valing averi, lalan ana Ubu nala Ni tnorung mnanat verin Musa. Tnorung yai ni adat ma nfalyawang wean inba ma tamata ra rfadawang Ubu, ovu rahan ma tamata raflurut naꞌa. Rahan yai tamata ra kaꞌi rotu watan.*9:1 Ubu nala Ni inukun ra verin tamata Yahudi nahu nabi Musa. Inukun avyai bis tfalak ne, Ubu Ni tnorung mnanat (te tnorung i ula lalean). 2 Ira rotu rahan yai tali afwatan ulin ma felan a wean befak dawan, ma mela falurut ra baꞌi raraning Ubu naꞌa. Ira relak befak dawan yai naꞌut irua, ma ruang isa naꞌa muri, na isa naꞌa ulu. Ira rfanara ruang i naꞌa muri yai ne, ruang i nmerat urun a. Naꞌa ruang yai, na rfadoku damar wan ovu meja ma baꞌi rfadoku roti ovi rala ma reluk rira persembahan verin Ubu. 3 Naꞌa ruang i nmerat urun yai ralan a, na rfakloꞌi maloli dawan amafal isa ma nteri ruang i naꞌa ulu a. Ira rfanara ruang i naꞌa ulu yai ne, ruang i nmerat rahi lia munuk a.†9:3 Naꞌa befak dawan yai, na rfakloꞌi maloli dawan amafal irua. Isa neluk falfolat ma Yahudi rira mela falurut ra rahu inyai. Isa vali nteri ruang i naꞌa ulu ovu ruang i naꞌa muri. 4 Naꞌa ruang i nmerat rahi lia munuk yai, na rfadoku wan i baꞌi rasnuri afa ovi umarira ra voan lolin. Wan yai rotu tali masa. Vatvatat‡9:4 Tamata ra rala masa ma rsoka munuk lahir naꞌa vatvatat yai, ma nfaturu ne, Ubu nanaꞌa ovu Ni tamata ovi rorang Ia, fruarira ra. isa naꞌa vali ruang yai. Rfanara vatvatat yai ne, vatvatat tnorung. Ira rala masa ma rsoka munuk lahir naꞌa vatvatat yai. Vatvatat yai nsaꞌa vatu nglavar irua i rtulis inukun vutu ovi Ubu nala verin Musa, ovu suran masa i nsaꞌa afamtahan i naran manna, ovu vali Harun ni takil i naftuvul roak a.§9:4 Keluaran 16:33, 25:10-16, 30:1-6; Bilangan 17:8-10; Ulangan 10:3-5; Wahyu 11:19 5 Naꞌa vatvatat yai ratan a, na rfadoku walut irua naꞌa. Walut irua yai nararira kerub, ovu felarira ra wean Ubu Ni sansinir ovi rtali lanit ratan a ma rfaturu ne, Ubu nanaꞌa inyai, ovu vanan i nfitik nyadat. Kerub irua yai manirira ra ratvelar watan naꞌa vatvatat yai nulan a. Ira rfanara nulan yai ne, wan i Ubu naꞌi vatuk salasilan ra. Naꞌuk fiang ini wol bisma amfamalik munuk afa ovi ma lyawan verin mia.

6 Rasusan munuk roak befak dawan yai, ma afakataka rnaꞌa munuk warira ra, beti Yahudi rira mela falurut ra baꞌi rti ruang i nmerat urun yai a ma rfabana rira karya a. 7 Naꞌuk Mela Falurut Ilaꞌa aꞌuk saꞌi bisma nti ruang i nmerat rahi lia munuk yai, varat isa fasa watan. Ia musti ntaha afwatan laran i neluk persembahan verin Ubu, tevek ni salasilan ra ovu vali salasilan ovi tamata Yahudi ra rotu, naꞌuk wol rkaꞌa.*9:7 Imamat 16:2-34 8 Wean inyai bi, Ubu Ni Roh nfalyawang verin ita ne, lingaꞌan ma tati ruang i nmerat rahi lia munuk wol natvelar obin, tevek ruang i nmerat urun nanaꞌa obin. 9 Afa avyai rfalyawang ne, fiang ini afwatan ovi tamata ra rala ma reluk rira korban ovu afa liak ovi rala ma reluk rira persembahan verin Ubu, wol bisma rfamerat tamata ralarira ilaꞌa ra tali salasilan ovi rotu ra. 10 Tevek adat avyai rfamalik watan naꞌa fanaꞌan-fanenu ra, ovu afa ovi tamata rotu ma al rfamerat tenarira ra, wean rira adat a. Naꞌuk afa avyai wol rotu ma tamata ralarira ra ovu rira fikiran ra rmerat urun. Ira rorang adat avyai, ti naran i Ubu Ni tnorung ngorvaꞌan yai nma.†9:10 Ubu notu Ni tnorung mnanat (i nbana ula lalean a) ovu tamata Yahudi ra, ba ia nfalak ma Musa nala Ni inukun ra verin ira. Naꞌuk naꞌa Ni tnorung ngorvaꞌan a, na Yanan i Yesus laran nvoat ma al ntevut ita tali dida salasilan ra, boma tamata ovi rorang Ia veka rira vavaꞌat kakiwal.

11 Naꞌuk Kristus nma roak ma neluk Mela Falurut Ilaꞌa, ma nala afa ovi lolin verin tamata ra. Ia nti roak befak dawan i naꞌa lanit ratan ralan a. Befak dawan yai lolin ovu nmerat lia befak dawan i lan a Musa notu a, ovu vali wol ntali lanit ivavan ini.‡9:11 Afa lolin avyai wean ini: Yesus nma ma nsikat tamata ra tali rira salasilan ra, ma rira vavaꞌat kakiwal, ovu nala malinan verin tamata ra, ovu vali naflahar tamata ra. 12 Kristus nti ruang i nmerat rahi lia munuk ralan a, na wol ntaha bibi brana laran a, te sapi koꞌu laran a. Ia nti ruang i nmerat rahi lia munuk yai ralan a fasa watan, ma kaꞌi nala laran a ma al nakvanak dida salasilan ra, nata ti wol ni wahan. 13 Tamata Yahudi ra rangal adat tali Musa ni inukun ra, ma kaꞌi rfangra tenarira ra ovu afa ovi rotu ra. Wean inyai bi, Yahudi rira mela falurut ra rala bibi brana laran a ovu sapi brana laran a, ma rasmir naꞌa ira, boma rfamerat ira. Ira rala vali sapi vata i wol yanan obin ma rasnuri ia ma ni kyavu a, rala ma al rasmir naꞌa tamata avyai, boma tenarira ra rmerat.§9:13 Imamat 16:15-16; Bilangan 19:9, 17-19 14 Naꞌuk Kristus laran a lolin lia tali afa avyai, tevek Ubu Ni Roh i nvaꞌat kakiwal a nala ngrebat verin Ia. Wean inyai bi, Kristus kaꞌi nala tenan a ma neluk korban i nmerat urun, tevek Ia wol Ni salasilan. Ia notu wean inyai ma nfamerat raladida ilaꞌa ra tali afa ovi totu ma wol ihir akataka, boma bisma tfadawang Ubu i nvaꞌat a.

15 Ba Kristus neluk leta verin ita naꞌa Ubu Ni tnorung ngorvaꞌan yai, boma tamata ovi Ubu nera roak ira, bisma rira munuk kalolin ovi Ubu nfadoku roak naꞌa Ni tnorung a. Kalolin avyai rnaꞌa, nata ti wol ni wahan. Kristus nmata ma ntevut ira tali rira salasilan ovi rotu ma rangal Ubu Ni tnorung mnanat i nala verin Musa.

16 Wean i tamata isa mane nsiduk ni metan ra, na ia notu surat kuasa verin yanan te ubun ra. Naꞌuk wean i wol nmata obin, na surat yai wol ihin akataka obin. Surat yai bisma fyawan, wean i tamata ra rkaꞌa lahir ne, tamata i notu surat yai nmata roak. 17 Tevek wean i tamata i notu surat yai nvaꞌat obin, na wol bisma rfabana surat yai obin. Wean i tamata i notu surat yai nmata roak, beti bisma rfabana surat yai. 18 Ba rfedan afwatan ovu rasmir laran a, beti bisma rfabana nala tnorung i ula lalean. 19 Lalan ana, Ubu nala Ni inukun ra verin Musa. Naꞌut i Musa nfamalik munuk inukun avyai verin tamata Yahudi ra, na ia nala bibi brana ovu sapi koꞌu lararira ra ma nsileti ovu wear. Ia nala domba vulun i navuli a ovu aa koꞌu i naran hisop anan ra, beti nsovu naꞌa lara i nsileti roak ovu wear yai. Notu wean inyai, beti nasmir naꞌa buku lalulung i ntulis Ubu Ni inukun ra naꞌa, ovu vali nasmir naꞌa tamata Yahudi ra. 20 Musa notu wean inyai, beti nfalak ne, “Yaꞌa ala lara ini ma al ufangrebat Ubu Ni tnorung verin mia ma musti myot-orang.”*9:20 Keluaran 24:6-8 21 Ia notu vali wean inyai naꞌut i nasmir lara naꞌa befak dawan i baꞌi raraning Ubu naꞌa yai, ovu afa ovi rnaꞌa munuk befak yai ralan a, ma mela falurut ra rfadawang Ubu.†9:21 Imamat 8:15 22 Musa ni inukun ra rfalak ne, labir mane naꞌa afaka watan, na musti rfamerat afa avyai ovu lara veki. Wean i lara wol nvoat, na Ubu wol naꞌi vatuk tamata rira salasilan ra.‡9:22 Imamat 17:11

23 Ba wean inyai, na afa ovi rnaꞌa befak dawan i baꞌi raraning Ubu naꞌa lanit ivavan ini, rfaturu afa ovi rnaꞌa lanit ratan. Yahudi rira mela falurut ra musti rfedan tamata ra rira afwatan ra ma reluk korban verin Ubu, ovu rala lara ma al nfamerat befak dawan i naꞌa lanit ivavan ini. Naꞌuk korban i nfamerat befak dawan i naꞌa lanit ratan, lolin lia tali inyai.§9:23 Tamata Yahudi rala rira afwatan ra verin rira mela falurut ra ma reluk rira korban. Yahudi rira mela falurut avyai rfedan afwatan avyai, beti rala lara ma al nfamerat (secara rohani) rira befak dawan, boma bisma raraning Ubu. 24 Kristus wol nti befak dawan i tamata rotu a. Befak dawan yai labir mane wean watan wan i nmerat rahi lia munuk a naꞌa lanit ratan. Naꞌuk Ia nti lahir lanit ratan, ma fiang ini ndiri Ubu wahan ralan ma naflurut verin ita. 25 Yesus wol nti lalawatan ma nala tenan a ma neluk Ni korban verin Ubu, wean Mela Falurut Ilaꞌa baꞌi notu lokat varat ma ntaha afwatan laran, ma neluk tamata ra rira korban verin Ubu. Naꞌuk Yesus Kristus nti fasa watan wan i naꞌa lanit ratan ma neluk korban verin tamata ra munuk. 26 Wean i lokat varat, na Kristus nala tenan a ma neluk korban, na inyai wean i ntuan susa lalawatan tali naꞌut i Ubu beti notu lanit ivavan a. Naꞌuk fiang ini lanit ivavan sarseri roak mane namwear. Ia nma roak lanit ivavan a fasa watan ma nala tenan a ma neluk korban, al naꞌi vatuk tamata rira salasilan ra. 27 Ubu nfadoku roak ma tamata ra rmata fasa watan, beti ti rdiri Ubu wahan ralan a ma nfaleka inukun verin ira. 28 Kristus wean vali inyai. Ia nala tenan a ma nmata fasa watan ma naꞌi vatuk tamata rivun rira salasilan ra. Ia veka nma ewal, naꞌuk wol mane nmata ma ntevut dida salasilan ra. Ia veka nma verin tamata ovi rnaban Ia, ma nsikat ira tali rira salasilan ra, ma rira vavaꞌat kakiwal.*9:28 Yesaya 53:12