1 Tamata ovi fiang ini bira metan rivun, eka mryenar ma lolin afa ovi mane ufalak ini. Byakar ma fyaktanit, tevek mia veka mtyuan sian dawan ilaꞌa. 2 Bira metan ra veka rakvisal ovu ngafat ra veka raꞌan munuk bira kadaravit ra. 3 Bira masa ovu perak ra veka rarawan munuk, ovu vali bira masa ovu perak i rarawan yai veka rfaturu ne, myotu salasilan roak ovu bira metan ra. Afa avyai veka rotu ma Ubu nukun mia naꞌa yafu ralan. Mia byakar, tevek naꞌut inyai, na amar ra mane rlia roak, naꞌuk mtyafal ma misdovuk watan bira metan ra naꞌa lanit ivavan ini.*5:3 Tamata kaꞌi ra inar ma rtafal ilaꞌa rira metan ra. 4 Mia myeang tamata ovi rkarya naꞌa bira vaꞌi ra ma wol byahir rira kadi ra. Eka mryenar rira maruhuk ra! Tamata avyai rafwak ma rera lablobang ma rfalak ne, “Duilaꞌa, mrenar ami o!” Ira rafwak wean inyai verin Ubilaꞌa i nfareta akataka munuk. 5 Mia mkyaꞌi roak ovu myotu aꞌuk inabira lolin, ma fyatemang roak lanit ivavan ini ihin a. Mia weabira afwatan ovi rfawatak ma ngbabal roak ira, naꞌuk wol rkaꞌa ne, tamata ovi rfawatak ira mane rfedan ira ma raꞌan.†5:5 Wol rkaꞌa vali ne, Ubu veka nukun ira. 6 Mia vali myukun ma fyedan tamata ovi rira vavaꞌat ra rmalola, ovu tamata ovi wol bisma rangal nala mia.

7 Terang a valing averi, mtyahang ralabira ra ovu mnyaban watan amar i Duilaꞌa veka nma.‡5:7 Ubu veka nukun tamata ovi rotu susa tamata ovi rorang Yesus. Eka msyiꞌik tamata ovi rotu vaꞌi ra. Ira rnaban watan ma daꞌut nma ma ravuri-rava, ovu rnaban daꞌut ewal ma notu ma rira afamtahan ra ihirira. Afa yai nfaturu ne, rtahang nal ralarira ra. 8 Ba mia vali musti mnyaban ovu mtyahang ralabira ra. Myorang ovu ralabira urun, tevek amar i Duilaꞌa veka nma sarseri roak.

9 Terang a valing averi, deka mifngamuꞌur ovu deka msyifasala mia, boma Duilaꞌa deka nukun mia. Ia i veka nukun mia sarseri mane nma roak.

10 Terang a valing averi, mingnanang nabi ovi lan ana, rfamalik roak Ubu Ni vaivatul ra. Ira rtuan susa rivun, naꞌuk rtahang nal ralarira ra. Ni lolin a, mia musti myot-orang vali rira afa ovi rotu ra. 11 Ita tfalak ne, tamata ovi rtuan susa rira vavaꞌat ra malinan, tevek rtahang nal ralarira ra ma rorang Ubu. Mia mryenar roak Ayub. Duilaꞌa naflahar ia, tevek ntahang nal ralan naꞌa ni susa i dawan urun a. Ba mia mkyaꞌa roak ne, Duilaꞌa Ni silobang a dawan urun, ovu nfaturu Ni silobang a verin Ni tamata ra.

12 Terang a valing averi, nlia tali afa ovi beti ufalak verin mia yai, na deka mifwaba. Deka myala lanit ratan te lanit ivavan ini, te afa liak vali ma al mifwaba. Ni lolin a, fyalak watan ne, “Oꞌu, yaꞌa veka otu,” te fyalak watan ne, “Wahal, yaꞌa wol otu.” Ba myotu lahir afa ovi fyalak roak yai, boma Ubu Ni inukun a deka nkena mia.

13 Tali bir tinemun, na wean i tamata isa ntuan susa, na fyalak verin ia ma naflurut verin Ubu. Wean i tamata isa inan lolin, na fyalak verin ia ma ndedang ma nfadawang Ubu. 14 Wean i tamata isa ntali bir tinemun nawar ia, na nfalak ma dawan kareda ovi reluk penatua§5:14 Msiꞌik Kisah 11:30. rma ma raflurut verin ia, ovu rala Duilaꞌa naran ovu Ni ngrebat a, beti raꞌung ngul naꞌa tenan a. 15 Ba tamata ovi raflurut ovu ralarira urun, na Ubu veka notu ma tamata i nawar ia yai lolin ewal ia. Ba wean i notu salasilan, na Ubu veka naꞌi vatuk ni salasilan ra. 16 Ba mia kaꞌi mtyorung ma fyalak bira salasilan ra ovu isa naflurut verin isa, boma lolin mia. Tamata ovi rira vavaꞌat ra rmalola, wean i raflurut, na rira falurut yai ni ngrebat a dawan urun.

17 Eka mingnanang nabi Elia. Ia tamata watan ia wean ita, naꞌuk naflurut ovu ralan urun ma daꞌut wol nsuta. Ba daꞌut wol nsuta lanit ivavan ini, ti naran varat itelu vulan inean. 18 Ba naflurut ewal ma daꞌut nsuta, ma lanun a notu ma afamtahan ra ihirira.

19 Terang a valing averi. Tali bir tinemun, na wean i tamata isa nban-talik roak lingaꞌan i kena, na ni lolin a tamata boku rsurak ia ma nahil ma ntalik tali ni salasilan ra, ma norang ewal Ubu. 20 Eka mingnanang vaivatul ini: Tamata iki watan notu ma tamata salasilan isa nahil, ma norang ewal roak Ubu Ni lingaꞌan a, na ia nala roak tamata yai tali matmatan, ovu Ubu veka naꞌi vatuk ni salasilan rivun yai. Surat i ususan ini, lawan watan ini.