Matius ni kitab i nfamalik Ubu Ni Ivar Lolin a
Tbas afa ovi veki
Matius ini ntali Yesus Ni tamata vutu rahin irua ovi rorang Ia (Matius 9:9-13). Ia ntulis kitab ini ma nfamalik Ubu Ni Ivar Lolin naꞌa Yesus. Naꞌa kitab ini, na Matius nfamalik ne, naꞌut lalan ana, Ubu notu tnorung roak ne, Raja i ntevut dida salasilan ra, inyai Yesus. Naꞌa kitab ini, na Matius ntulis ma rivun ne, “Yesus ubun nusin Raja Daud.” (1:1; 9:27; 12:23; 15:22; 20:30-31; 21:9, 15; 22:41-45). Matius nfamalik ma rivun vali naꞌa nabi rira afa ovi rfalak roak tali lalan a, ma Yesus nfakena afa avyai naꞌa Ni vavaꞌat a (Matius ntulis roak na'a pasal ovi: 1:22-23; 2:5-6, 15, 17-18, 23; 3:3; 4:14-16; 8:17; 12:17-21; 13:35; 21:4-5, 16; 26:31; 27:9-10).
Naꞌa kitab ini, na Matius ntulis afa ilima ovi Yesus nair ma blawat. Ia ntulis vali Yesus Ni karya ovi notu ra.
Kitab ini ihin a
Tomu urun, naꞌa i rarali Yesus, ovu betfasa ma nfabana Ni karya a. (pasal 1—4)
Yesus nair tamata rivun naꞌa vuar ratan. (pasal 5—7)
Tomu urun naꞌa i Yesus notu mujizat ra ma tamata ra rtalkaka, ovu rfaturu Yesus Ni ngrebat a. (pasal 8:1—9:34)
Yesus nair lan Ni tamata ovi rorang Ia, beti nsinir ira ma ti rfamalik Ubu Ni Ivar Lolin. (pasal 9:35—11:1)
Yesus nair vaivatul kamkuma i nfamalik naꞌa Ubu Ni Fareta, te wean inba ma Ubu nfareta tamata ra wean lahir Raja. (13:1-52)
Tomu urun naꞌa i Yesus Ni afa ovi notu ra naꞌa ahu ovi rnaꞌa propinsi Galilea, ovu Ni karya i nban-muri lalean naꞌa Galilea. (pasal 13:53—17:27)
Yesus nair Ni tamata ra naꞌa afa ovi rotu ra, ma inovan ovu tamata ovi rorang Ia. (pasal 18)
Tomu urun naꞌa i Yesus Ni banbanan ma nti Yerusalem. Naran Yerusalem, na Yahudi rira dawan ra rlabir teman (mencobai naꞌa vai Mala) Yesus, ma Ia nala vaivatul kamkuma ra ma nangrihi verin ira. (pasal 19—23)
Yesus nfamalik afa ovi veka rvotuk naꞌa amar ovi veka rma. (pasal 24—25)
Tomu urun naꞌa i tamata ra rfedan Yesus ovu nvaꞌat ewal tali matmatan. (pasal 26—28)
1
Yesus Kristus ubun a nusin ra
Lukas 3:23-38
1 Naꞌa daftar ini, na rtulis Yesus Kristus ubun a nusin ra. Yesus ubun a nusin tali Raja Daud i ubun a nusin Abraham. 2 Tali Abraham ti naran Daud, na Yesus ubun a nusin ra nararira ra wean ini: Abraham yanan Ishak, Ishak yanan Yakub, Yakub yanan verin Yehuda, novun aꞌan a warin ra. 3 Yehuda awan verin Tamar, yanarira verin Peres ovu Zerah. Peres yanan Hezron, na Hezron yanan Ram. 4 Ram yanan Aminadab, Aminadab yanan Nahason, Nahason yanan Salmon. 5 Salmon awan verin Rahab, yanarira verin Boas. Boas awan verin Rut, yanarira verin Obed. Obed yanan Isai. 6 Isai yanan verin Daud i notu raja naꞌa Israel. Daud awan verin Batsyeba, yanarira verin Salomo. Lan a Batsyeba nsifa vali ovu Uria. 7 Salomo yanan Rehabeam, Rehabeam yanan Abia, Abia yanan Asa. 8 Asa yanan Yosafat, Yosafat yanan Yoram, Yoram yanan Uzia. 9 Uzia yanan Yotam, Yotam yanan Ahas, Ahas yanan Hizkia. 10 Hizkia yanan Manasye, Manasye yanan Amon, Amon yanan Yosia. 11 Yosia yanan verin Yekhonya novun aꞌan a warin ra. Naꞌut inyai, na tamata Babel ra rkiwal Israel ra ma ti rnaꞌa Babel. 12 Naꞌut i tamata Babel ra rkiwal Israel ra ma ti rnaꞌa roak Babel, beti Yekhonya yanan verin Sealtiel, Sealtiel yanan a Zerubabel. 13 Zerubabel yanan Abihud, Abihud yanan Elyakim, Elyakim yanan Azor. 14 Azor yanan Zadok, Zadok yanan Akhim, Akhim yanan Eliud. 15 Eliud yanan Eleazar, Eleazar yanan Matan, Matan yanan Yakub. 16 Yakub yanan verin Yusuf i awan verin Maria. Maria ini yanan Yesus i rfanara vali Ia ne Kristus, Raja i ntevut dida salasilan ra.
17 Ba Yesus ubun a nusin ovi beti tbas yai: Tali Abraham ti naran Daud, na tuvu nkati tuvu ti naran vutu rahin ifaꞌat. Tali Daud ti naran naꞌut i tamata Babel ra rkiwal Israel ra ma rti Babel, na tuvu nkati tuvu ti naran vutu rahin ifaꞌat vali. Tali naꞌut i rnaꞌa Babel ti naran i rarali Kristus, Raja i ntevut dida salasilan ra, na tuvu nkati tuvu ti naran vutu rahin ifaꞌat vali.
Rarali Yesus Kristus
Lukas 2:1-7
18 Yesus Kristus Ni tomu mngaꞌun a naꞌut i rarali Ia wean ini. Ia renan naran Maria. Maria ini irua Yusuf raꞌan vai isa roak mane rsifa. Ira wol rsifa obin, naꞌuk Maria nbarlewan roak, tevek ngrebat tali Ubu Ni Roh. 19 Yusuf ni vavaꞌat nmalola, ovu wol inan ma nfamaꞌit Maria naꞌa tamata rivun waharira ralan a, ba nanovak mane ntalik fanfonak watan ia. 20 Naꞌuk ti ma Yusuf nanovak munuk wean inyai ma ntuba, na Duilaꞌa Ni sansinir isa ntali lanit ratan nma ma nfavotuk ia verin Yusuf naꞌa ni mifi a. Ia nfalak ne, “Yusuf, Daud ubun a nusin oa, deka ralam raruan ma mala Maria ma neluk awam, tevek kasikoꞌu yanat i naꞌa evun ralan yai ntali Ubu Ni Roh a.
21 Maria veka nrali kasikoꞌu brana isa, ma oa ki fwanara ia ne Yesus, tevek Ia veka nsikat Ni tamata ra tali rira salasilan ra.” 22 Afa avyai rvotuk munuk roak, boma rfakena afa ovi lan a Duilaꞌa nfalak verin Ni nabi a ma ntulis ne,* 1:22 Ubu Ni nabi yai naran Yesaya (msiꞌik Yesaya 7:14). 23 “Vata mnelat isa veka nbarlewan ma nrali kasikoꞌu brana isa, velik ne wol ntuba ovu brana obin. Tamata ra veka rera Ia ne Imanuel, ihin a naꞌa vai Ibrani ne, ‘Ubu novun ita.’ ”
24 Ti ma Yusuf nbatar, na not-orang afa ovi Duilaꞌa Ni sansinir yai nfalak verin ia. Ia nala Maria ma neluk awan, 25 naꞌuk irua wol rtuba isa ti naran i nrali kasikoꞌu brana yai. Ti ma nrali ia, na Yusuf nfanara kasikoꞌu yai ne, Yesus.