1 Yesus nfalak verin Ni tamata ovi rorang Ia ne, “Naꞌut i veka uma ewal, na Ubu Ni Fareta a wean vaivatul kamkuma naꞌa vata mnelat vutu i rtaha rira damar ra, ma ti rsaꞌa brana i mane nsifa a. 2 Tali vata vutu yai, na ilima rboda, na ilima vali rira kakaꞌa dawan. 3 Vata ilima i rboda yai rtaha rira damar ra, naꞌuk wol rtaha ngul freꞌi. 4 Naꞌuk vata ilima i rbitar yai, rtaha rira ngul freꞌi naꞌa rira suran ra. 5 Ira rnaban brana i mane nsifa yai, naꞌuk mnanat i nma a, ba matarira ra waswosu roak ma rtuba.

6 Ti ma nafafruan tenan roak, na rarenar fawak isa ne, ‘Byatar kikyai! Brana i mane nsifa yai sarseri ma nma roak! Miti murin ma msyaꞌa ia.’

7 Ba vata avyai rbatar lahir ma rasusan rira damar ra. 8 Vata ovi rboda yai rera lablobang tali vata ovi rira kakaꞌa dawan yai ne, ‘Myala bira ngul kedan a verin ami, tevek mami damar ra mane rmata roak.’

9 Naꞌuk vata ovi rira kakaꞌa dawan yai rfalak verin ira ne, ‘Ami wol amala verin mia, beta ne mami ngul a wol naran ami, ovu vali verin mia. Ba miti ma fyaha ngul naꞌa wan i baꞌi rfedi ngul naꞌa.’

10 Ba vata ovi rboda yai rti ma rfaha rira ngul. Naꞌut i rti ma rfaha ngul a, na brana i mane nsifa yai nma, ba vata ovi rira kakaꞌa dawan yai rorang ia rti rahan ralan ma rotu snoba, nata falfolat a natfolat. 11 Ba vata ovi rboda yai rma ewal rahan yai, ma rafwak ne, ‘Bapa, mlobang ma bwadil falfolat a verin ami!’

12 Naꞌuk brana i mane nsifa yai nfalak ne, ‘Afa i ufalak verin mia ini, kena urun! Yaꞌa wol ukaꞌa mia!’

13 Ba wean inyai, na msyiꞌik wabira ma lolin, tevek mia wol mkyaꞌa ne, veka ewal Yaꞌa naꞌa amar ba te naꞌut inba.”

14 “Naꞌut i veka uma ewal a, na Ubu Ni Fareta wean vali vaivatul kamkuma ini. Tamata isa mane nti talik ni rahan a. Ia wol nti obin, na nasdovu ni tamata sansinir ra ma nala karya verin ira ma rasusan ni kubang ra. 15 Ia nsiduk ni kubang a verin ni tamata sansinir ra ma inovan ovu rira kakaꞌa a. Ia nala kubang masa kadut ilima verin ni sansinir isa.*25:15 Vai Yunani nfalak kubang masa ne, talanta. Talanta isa yai fyawan veran tamata ni kadi naꞌa varat vutu rahin ilima. Ia nala vali kubang masa kadut irua verin sansinir isa, beti nala kubang masa kadut isa verin sansinir isa vali. Nsiduk munuk ni kubang masa avyai, beti nfalak verin ira ma ti rfabana kubang avyai. Nata nti talik ira ma nobal. 16 Tamata sansinir i nala roak kubang masa kadut ilima yai nti ma nfabana lahir kubang yai, ma utun kubang masa kadut ilima vali. 17 Tamata sansinir i nala kubang masa kadut irua yai nti vali ma nfabana kubang yai, ma utun kubang masa kadut irua vali. 18 Naꞌuk tamata sansinir i nala kubang masa kadut isa yai nti ma nkear voat, ma noving fanfonak kubang i duan a nala verin ia.

19 Yaꞌi mnanat roak, ba tamata sansinir itelu avyai duarira a newal ia ma nasdovu ira, ma nera ma rfamalik naꞌa i wean inba ma rfabana kubang masa ra, boma nkaꞌa ne, utur ifira. 20 Ba sansinir i nfabana kubang masa kadut ilima yai nma ma ntuan duan a. Ia nala kubang masa kadut vutu verin duan a. Nata nfalak verin duan a ne, ‘Baba, oa mala kubang masa kadut ilima verin yaꞌa. Eka msyiꞌik, utung vali kubang masa kadut ilima, ba utaha uma verin oa.’

21 Ba duan nfalak verin ia ne, ‘Mu karya a lolin buas ovu mot-orang afa ovi ufalak ra. Oa mot-nala roak afa ovi ufalak ra naꞌa varvara ovi maraan a, ba veka al vali varvara ovi aleman a verin oa. Mwa ma totu snoba, tevek inad lolin.’

22 Tamata sansinir i nfabana kubang masa kadut irua yai nma vali ma ntuan duan a. Ia nfalak verin ia ne, ‘Baba, oa mala kubang masa kadut irua verin yaꞌa. Eka msyiꞌik, utung vali kubang masa kadut irua ba utaha uma verin oa.’

23 Ba duan nfalak verin ia ne, ‘Mu karya a lolin buas ovu mot-orang afa ovi ufalak ra. Oa mot-nala roak afa ovi ufalak ra naꞌa varvara ovi maraan a, ba veka al vali varvara ovi aleman a verin oa. Mwa ma totu snoba, tevek inad lolin.’

24 Nata tamata sansinir i nala kubang masa kadut isa yai nma ma ntuan vali duan a ma nfalak ne, ‘Baba, yaꞌa ukaꞌa ne oa msingarova sian. Oa mala afamtahan naꞌa vaꞌi ovi wol muvuri naꞌa. Oa mnaban watan ma mala tamata liak rira karya enan ra. 25 Wean inyai bi ubobar, beta ne otu ma mu kubang a wol nleal ma mukun yaꞌa, ba uti wan isa ma ukear voat ma oving mu kubang a. Eka msyiꞌik, mu kubang a hi ini, ba al ewal verin oa.’

26 Naꞌuk duan nfalak ne, ‘Hoi, tamata ktufan! Oa bwosa sian. Oa fwalak ne, al afamtahan naꞌa vaꞌi ovi wol uvuri naꞌa, ovu unaban watan ma ala tamata liak rira karya enan ra? 27 Ba wean urun inyai, na velik aba mala ning kubang yai verin tamata ovi rfabana kubang, boma wean i ewal yaꞌa, na al-ewal ning kubang a ovu ni bunga.’

28 Nata tamata yai nfalak verin ni tamata sansinir liak ra ne, ‘Myal-ewal kubang yai tali ia ma myala verin tamata i ni kubang masa kadut vutu a.’ 29 Tevek tamata iki watan npake ma lolin afa ovi rnaꞌa roak ia, na Yaꞌa veka ala ma rivun ilaꞌa matan verin ia. Naꞌuk tamata iki watan wol npake ma lolin afa ovi rnaꞌa roak ia,†25:29 Afa ovi rnaꞌa roak ia wol ihin ne, afnitu ra. na velik ne koꞌu watan, veka ala munuk tali ia. 30 Ba byatuk vali tamata i nbosa sian yai nti murin ma naꞌa dedan ralan. Naꞌa wan yai, na tamata ra rvakar lalawatan ovu nifarira ra rsitutu ira tevek rfarnuang wawaꞌuk dawan a.”‡25:30 Dedan ralan sama ovu yafwan kakiwal. Msyiꞌik vali Matius 8:12 ni catatan kaki.

31 “Wean i Yaꞌa, Tamata Yanan Yaꞌa, uma ovu vanang i nfitik nyadat a, na Ning sansinir ra tali lanit ratan veka rovu vali Yaꞌa ma unaꞌa wan i udoku ma ufareta, ma ukun tamata ra munuk. 32 Bangsa ra munuk veka rasdovu ira ma rdiri wahang ralan a, ma ukun ira. Yaꞌa veka usiduk ira naꞌa sidovung irua, wean tamata i baꞌi nfawatak domba notu a. Ia notu ma domba ra rnaꞌa wan isa, na bibi ra rnaꞌa wan liak. 33 Yaꞌa veka usdovu tamata ovi rira vavaꞌat ra rmalola naꞌa Ning lihir mela a. Naꞌuk tamata ovi rira vavaꞌat ra wol rmalola, veka ala ira ma ti rnaꞌa Ning lihir balit a. 34 Nata Yaꞌa Raja Yaꞌa ini veka ufalak verin ovi rnaꞌa Ning lihir mela yai ne, ‘Yamang a naflahar roak mia, ba mya ini ma mnyaꞌa Ni Fareta ralan a. Ubu nasusan roak Ni Fareta yai verin mia naꞌut i notu lanit ivavan a. 35 Tevek naꞌut i ublafar a, na myala afamtahan roak ma uan. Naꞌut i ubroa, na myala roak wear ma enu. Naꞌut i Yaꞌa wean tamata dakan, na myala roak Yaꞌa ma ti unaꞌa bira rahan. 36 Naꞌut i wol Ning kadaravit a, na myala roak ma ung eluk Yaꞌa. Naꞌut i nawar Yaꞌa, na mlyobang roak Yaꞌa. Naꞌut i unaꞌa buꞌi ralan, na mya roak ma milola Yaꞌa.’

37 Ba tamata ovi rira vavaꞌat rmalola veka rfalak verin Ia ne, ‘Duilaꞌa, naꞌut inba ma amrea ne, mublafar ma amala afamtahan ma muan. Te naꞌut inba ma amrea ne, mubroa ma amala wear ma menu? 38 Baba, ami wol amkaꞌa vali ne, naꞌut inba ma amrea Oa wean tamata dakan, ma amala Oa ti mnaꞌa mami rahan, ovu naꞌut inba ma amrea Oa wol mu kadaravit ma amala ma mung-meluk Oa? 39 Duilaꞌa, ami wol amkaꞌa ne, naꞌut inba ma nawar Oa, ovu naꞌut inba ma mnaꞌa buꞌi ralan ma ti amalola Oa?’

40 Raja Yaꞌa ini veka ufalak verin ira ne, ‘Afa i ufalak verin mia ini, kena urun! Naꞌut i myotu wean inyai verin terang a valing ovi rira kasian a dawan, na inyai wean i myotu roak verin Yaꞌa.’

41 Yaꞌa veka ufalak vali verin ovi rnaꞌa Ning lihir balit a ne, ‘Yamang a veka near nfasoba mia, ba miti vatuk mia tali ini, ma ti mnyaꞌa yafwan kakiwal. Wan yai Ubu nfadoku roak verin nitdawan ovu ni sansinir ra. 42 Inyai mia bira varvara a, tevek naꞌut i ublafar a, na wol myala afamtahan ma uan. Naꞌut i ubroa, na wol myala wear ma enu. 43 Ti ma aksa Yaꞌa wean tamata dakan, na wol myala vali Yaꞌa ma ti unaꞌa bira rahan. Naꞌut i wol Ning kadaravit ma ung a eluk Yaꞌa, na wol myala vali kadaravit verin Yaꞌa. Ti ma nawar Yaꞌa ovu unaꞌa buꞌi ralan, na wol mya ma milola vali Yaꞌa.’

44 Ba veka rfalak ne, ‘Duilaꞌa, naꞌut inba ma ami amkaꞌa ne, mublafar, mubroa te tamata dakan Oa, te amrea ne wol Mu kadaravit? Naꞌut inba ma amkaꞌa ne, nawar Oa ovu mnaꞌa buꞌi ralan ma wol amati ma amalola Oa?’

45 Ba Raja Yaꞌa ini veka ufalak verin ira ne, ‘Afa i ufalak verin mia ini, kena urun! Naꞌut i mifena ma mlyobang tamata ovi rira kasian dawan avyai naꞌa rira susa ra, na fyaturu roak ne, wol mlyobang Yaꞌa.’

46 Ba tamata ktufan ovi rnaꞌa Ning lihir balit a, veka rti yafwan kakiwal, naꞌuk tamata ovi rira vavaꞌat ra rmalola veka rira vavaꞌat kakiwal.”