15
Yahudi rira dawan ra rovun Yesus nti verin Gubernur Pilatus
Matius 27:1-2,11-14; Lukas 23:1-5; Yohanes 18:28-38
1 Varverak sumatan, na Yahudi rira dawan ra rasdovu munuk ira naꞌa rira sidovung dawan. Yahudi rira dawan avyai rtali dawan mela falurut ra, dawan Yahudi ra, Yahudi rira dawan ovi rair Musa ni inukun ra, ovu rira dawan liak ra vali. Ira ranovak ma raꞌan vai isa naꞌa afa ovi mane rotu verin Yesus. Ba rkeak Yesus, beti rovun Ia rti verin Pilatus.*15:1 Pilatus tamata Roma ia. Ia neluk Gubernur ma nfareta propinsi Yudea. 2 Pilatus norat Ia ne, “Yahudi rira raja verin Oa?”
Yesus nfalak ne, “Oa kaꞌi fwalak roak yai.” 3 Ba Yahudi rira dawan mela falurut ra rmangadu Yesus naꞌa afa rivun.
4 Nata Pilatus norat ewal Yesus ne, “Wol bwalat ira? Eka mrenar ngrihi sian ovi rala al rmangadu Oa yai!” 5 Naꞌuk Yesus wol nvalat lahir, ba Pilatus ntalkaka.
6 Lokat varat naꞌut amar dawan Paskah, na tamata ra baꞌi rera verin Pilatus ma nfatalik tamata isa tali buꞌi ralan. 7 Naꞌut inyai, na tamata isa naran Barabas ovu tamata ovi rangal fareta rnaꞌa buꞌi ralan. Ira rfedan tamata naꞌut i rotu vangoa-vanga. 8 Tamata rivun rasdovu ira ma ti rera verin Pilatus, ma nfatalik tamata isa tali buꞌi ralan, wean i baꞌi notu a. 9 Pilatus norat ira ne, “Ba mtyorung ma ufatalik Yahudi rira raja ini verin mia?”
10 Pilatus nkaꞌa roak ne, Yahudi rira dawan mela falurut ra ralarira sian Yesus,†15:10 Yahudi avyai ralarira sian ma rangrova ne, tamata rivun rorang roak Yesus. ba rovun Ia verin Pilatus.
11 Naꞌuk Yahudi rira dawan mela falurut ra rtuar tamata rivun, boma rera verin Pilatus ma nfatalik Barabas verin ira. 12 Nata Pilatus norat ewal ira ne, “Ba wean inyai, na inabira ma otu afaka verin tamata i fyalak Ia ne, Yahudi rira Raja?”
13 Tamata rivun yai rafwak ma rfalak ne, “Bwaku Ia naꞌa aa walwalur!”
14 Pilatus nfalak verin ira ne, “Afakinimi? Notu sala afaka?”
Naꞌuk rafwak ma vairira dawan ilaꞌa ne, “Bwaku Ia naꞌa aa walwalur!”
15 Pilatus inan ma nfakena watan ralarira ra, ba nfatalik Barabas verin ira.‡15:15 Pilatus nbobar vali ne, tamata ra mane rotu vangoa-vanga. Nata nsinir ma Roma rira suldadu ra rasveva Yesus veki, beti nala Ia verin ira, ma veka rbaku Ia naꞌa aa walwalur.
Roma rira suldadu ra rworuk-rwak Yesus
Matius 27:27-31; Yohanes 19:2-3
16 Roma rira suldadu ra rovun Yesus rti Pilatus ni rahan fareta dawan a, beti rasdovu rira suldadu liak ra munuk. 17 Ira rala ravit blawat ungu isa ma raꞌadoru naꞌa Ia, ovu ranan aa anan ovi imarira ra ma naꞌa sabeꞌu ma rfadoku naꞌa Yesus ulun a. 18 Nata rsiklabir ma rotu ma felarira ra wean i ralang Ia ma rafwak ne, “Yahudi rira raja verin Oa, ba fara nam a blawat!”
19 Ira rsikati ira ma al rvaval Yesus ulun ovu takil isa, rafnit naꞌa Ia, ovu rsangatur naꞌa wahan ralan a ma raraning waweang Ia. 20 Ba ti ma rworuk-rwak munuk Yesus, na raling ewal ravit blawat ungu i neluk a, ma raꞌadoru ewal Ni kadaravit ra naꞌa Ia. Nata rovun Ia mane rbaku Ia naꞌa aa walwalur.
Roma rira suldadu ra rbaku Yesus naꞌa aa walwalur
Matius 27:32-44; Lukas 23:26-43; Yohanes 19:17-27
21 Naꞌut inyai, na rtuan tamata isa ntali kota Kirene, naran Simon. Simon ini yanan verin Aleksander ovu Rufus. Ia ntali ni kota mane nti Yerusalem, na suldadu ra rkiwal ia ma nvara Yesus Ni aa walwalur a. 22 Ira rovun Yesus rti wan isa naran Golgota. Vaivatul yai ihin a, “Kalkulun Wan.” 23 Rala anggur i nsileti ovu afa isa naran mur verin Yesus ma nenu, naꞌuk nafena.§15:23 Aa isa naran mur, ni ar a voan lolin urun. Ira baꞌi rsileti mur ovu anggur ma tamata nenu, boma deka nfarnuang wawaꞌuk. 24 Ba rbaku Ia naꞌa aa walwalur, nata rotu undi ma rsiduk Ni kadaravit ra.
25 Naꞌut inyai jam sembilan varverak, na rbaku Ia naꞌa aa walwalur. 26 Rtulis vali vaivatul ra naꞌa aa walwalur, ma nfalyawang ne, afakinimi rukun Ia. Rtulis ne, “Yahudi rira Raja verin Ia.” 27 Amar yai, na rbaku vali tamata ktufan irua naꞌa aa walwalur. Isa naꞌa Yesus Ni lihir mela a, na isa naꞌa Ni lihir balit a. [ 28 Ba wean inyai, boma nfakena lahir afa ovi rtulis roak naꞌa Surat Ralan a ne, “Tamata ra veka ranovak ne, tamata ktufan Ia.”]*15:28 Yesaya 53:12
29 Tamata ovi rahu inyai rarwaꞌung ulurira ra ma rfalak sian Yesus. Ira rfalak ne, “Oa fwalak ne, bisma maꞌar vatuk dida Rahan Dawan Falurut ovu fwadiri ewal ia naꞌa amar itelu! 30 Ba wean inyai, na msuta tali aa walwalur yai, boma deka mwata!”
31 Yahudi rira dawan mela falurut ra ovu rira dawan ovi rair Musa ni inukun ra rdiri vali wan yai ma rworuk-rwak Yesus. Ira rfalak ne, “Ia not-nala ma tamata liak wol rmata, naꞌuk wol not-nala ma deka nmata. 32 Wean i Israel rira raja verin Ia, ovu Ia Raja i ntevut dida salasilan ra, na eka nsuta tali aa walwalur yai, boma tsiꞌik ovu torang Ia.” Tamata ktufan irua i rbaku roak ira naꞌa aa walwalur ma rnaꞌa Yesus Ni lihir mela ovu balit yai, rfalak sian vali Ia.
Yesus nmata
Matius 27:45-56; Lukas 23:44-49; Yohanes 19:28-30
33 Naꞌut inyai lera ndirlola, na deda fafyat nsoru munuk wan yai, ti naran jam itelu.†15:33 Tafsiran boku rfalak ne, nsoru munuk wan yai ihin a ne, nsoru negara Israel. Boku vali rfalak ne, lanit ivavan munuk. 34 Ba naꞌut jam tiga lersian, na Yesus nafwak ne, “Eloi, Eloi lama sabaktani?” Yesus Ni vaivatul avyai ihin a wean ini, “O Ubu i uraning a! O Ubu i uraning a! Afakinimi muti talik Yaꞌa i?”‡15:34 Mazmur 22:1
35 Tamata ovi rdiri inyai rarenar afa i Yesus nfalak a, ba rfalak ne, “Eka tfatlina ma lolin! Ia nera nabi Elia.”
36 Ba tamata isa ti nala spons etal isa§15:36 Vaidida mnanat nfalak spons yai ne, tovu. Vai mala nfalak spons vali ne, bunga karang. Tovu te spons nvaꞌat naꞌa metin ralan. ma nsovu naꞌa anggur i nakbia. Nata nngatan teri spons yai naꞌa aa etal isa ni tutul a, ma nlauk rata verin Yesus ma nbuk, beti nfalak ne, “Tnaban veki! Eka tsiꞌik, beta ne Elia nma ma nfasuka Ia tali aa walwalur yai.”
37 Nata Yesus nafwak ma vain a dawan, na nan nakbosal lahir. 38 Naꞌut inyai vali, na maloli dawan amafal i nakloꞌi Yahudi rira Rahan Dawan Falurut ralan a namadir lahir naꞌut irua, tali ratan nsuta naran fun. 39 Dawan i nfareta Roma rira suldadu ra ndiri Yesus wahan ralan, ma nsiꞌik Ia, nata ti naran nan nakbosal, ba nfalak ne, “Kena urun, tamata ini Ubu Yanan a!”
40 Vata boku rsiꞌik afa avyai tali raroa watan. Vata avyai nararira Maria Magdalena, Salome, Maria i yanan marmuri Yakobus ovu Yoses. 41 Naꞌut i Yesus nanaꞌa propinsi Galilea, na vata avyai rorang ovu rlobang Ia. Vata liak rivun vali rorang Yesus rti Yerusalem, ma rnaꞌa vali inyai.
Yusuf i ntali ahu Arimatea nala Yesus tenan ma nfanuba Ia naꞌa van matmatan isa ralan a
Matius 27:57-61; Lukas 23:50-56; Yohanes 19:38-42
42 Naꞌa amar yai, na tamata Yahudi ra rasusan warira*15:42 Naꞌa amar i Yahudi ra rasusan warira yai, ihin a naꞌa vai Mala ne, hari Jumat. Lokat Jumat, na rasusan rira afamtahan ovu afa liak ra, boma mulai naꞌa Jumat ni ovan, na ryari roak ira., tevek ni ilyan a, na rira amar ma ryari ira. Yaꞌi laflofan roak, na 43 tamata isa naran Yusuf ntali ahu Arimatea nma mane ntuan Pilatus. Yusuf ini ndoku Yahudi rira sidovung dawan, ovu tamata ra ralang ma dawan ia. Yusuf nanaban vali ma Ubu nfareta tamata ra wean lahir Raja. Ba Yusuf nfabrahi tenan ma ti ntuan Pilatus ma nera Yesus tenan a†15:43 Naꞌa amar i ryari ira, na wol bis rkena tamata matmatan vali, ba Yusuf nkiwal ma wol naran Jumat ni ovan obin, na nala roak Yesus tenan ma naflahar ia ovu nfanuba ia naꞌa van matmatan ralan.. 44 Pilatus ntalkaka, tevek nrenar ne, Yesus nmata roak. Ba nera dawan i nfareta Roma rira suldadu ra ma norat ia ne, Yesus nmata roak. 45 Ti ma Pilatus nrenar Roma rira suldadu dawan yai nfalak ne, Yesus nmata roak, ba ntorung ma Yusuf ti nala Yesus tenan a.
46 Ba Yusuf nfaha maloli ngangiar isa ma ti nfasuka Yesus tenan tali aa walwalur, ma nkuma Ia ovu maloli yai. Nata Yusuf ti ma nfanuba Yesus tenan a naꞌa vatu i rtivan roak ia ma wean van, beti nlawar vatu dawan al nulang teri van ngoran yai. 47 Maria Magdalena ovu Maria i yanan Yoses ti rsiꞌik wan i rfadoku Yesus naꞌa.
*15:1 15:1 Pilatus tamata Roma ia. Ia neluk Gubernur ma nfareta propinsi Yudea.
†15:10 15:10 Yahudi avyai ralarira sian ma rangrova ne, tamata rivun rorang roak Yesus.
‡15:15 15:15 Pilatus nbobar vali ne, tamata ra mane rotu vangoa-vanga.
§15:23 15:23 Aa isa naran mur, ni ar a voan lolin urun. Ira baꞌi rsileti mur ovu anggur ma tamata nenu, boma deka nfarnuang wawaꞌuk.
*15:28 15:28 Yesaya 53:12
†15:33 15:33 Tafsiran boku rfalak ne, nsoru munuk wan yai ihin a ne, nsoru negara Israel. Boku vali rfalak ne, lanit ivavan munuk.
‡15:34 15:34 Mazmur 22:1
§15:36 15:36 Vaidida mnanat nfalak spons yai ne, tovu. Vai mala nfalak spons vali ne, bunga karang. Tovu te spons nvaꞌat naꞌa metin ralan.
*15:42 15:42 Naꞌa amar i Yahudi ra rasusan warira yai, ihin a naꞌa vai Mala ne, hari Jumat. Lokat Jumat, na rasusan rira afamtahan ovu afa liak ra, boma mulai naꞌa Jumat ni ovan, na ryari roak ira.
†15:43 15:43 Naꞌa amar i ryari ira, na wol bis rkena tamata matmatan vali, ba Yusuf nkiwal ma wol naran Jumat ni ovan obin, na nala roak Yesus tenan ma naflahar ia ovu nfanuba ia naꞌa van matmatan ralan.