1 Ti ma Ubu Ni sansinir tali lanit ratan i ni ngrebat dawan yai nangrihi munuk, na urenar afa ngoan dawan isa ma wean tamata rivun ilaꞌa vairira naꞌa lanit ratan ma rfalak ne,

3 Tamata rivun avyai rfalak ewal vali ne,

4 Ba fareta dawan vutrua rahin ifaꞌat, ovu afa ifaꞌat ovi rvaꞌat ma raling ma lolan watan ira†19:4 Ita tbas roak fareta dawan vutrua rahin ifaꞌat, ovu afa ifaꞌat ovi rvaꞌat ma raling ma lolan watan ira yai, naꞌa Wahyu 4:4, 6. yai, rsangatur ma raraning Ubu i ndoku naꞌa wan i nfareta. Ira rfalak ne,

5 Nata vai isa vali ntali wan i ndoku ma nfareta yai nfalak ne,

6 Yaꞌa urenar ewal vali afa isa ngoan a wean tamata rivun ilaꞌa vairira, ma ngoan a wean saksakan dodun ovu wean dodung nafnunur, ma rfalak ne,

9 Ubu Ni sansinir tali lanit ratan yai nfalak ewal vali verin yaꞌa ne, “Mtulis wean ini: Ubu naflahar tamata ovi rasweang ira ma rovu naꞌa Domba Yanan Ni snobsifa.” Ia ntafal vali ma nfalak ne, “Vaivatul ovi kena urun, tevek rtali Ubu.”

10 Ba usangatur lahir naꞌa Ubu Ni sansinir yai wahan ralan a, tevek mane uraning ia. Naꞌuk ia nfalak ne, “Deka motu wean inyai! Yaꞌa ini eluk sansinir vali verin Ubu, wean watan oa ovu teram a valim ovi rfamalik Ubu Ni vaivatul ra naꞌa Yesus. Ba msangatur ma mraning aꞌuk Ubu! Tevek tamata ovi rfamalik Ni vaivatul ra naꞌa Yesus, na ira rarenar lahir tali Ubu Ni Roh ma rfamalik wean nabi ra rfamalik.”*19:10 Tafsiran boku rfalyawang ayat ini ne, wean i tamata boku rfamalik Yesus, na inyai, Ubu Ni Roh nasdai roak naꞌa ralarira ra ma rfamalik Ni vaivatul ovi rarenar lahir tali Ia naꞌa Yesus.

11 Nata yaꞌa usiꞌik lanit ratan natvadil ma urea kuda ngangiar isa. Ia i ndoku kuda yai tetan ratan a naran: “Tamata i not-orang lalawatan afa ovi nfalak ra, ovu Kena Ia.” Ia nfaleka inukun verin tamata ra, ovu vali notu rihi ovu Ni musu ra, ovu ni malolan a. 12 Matan wean lahir yafongan, ovu kalulu i wean raja baꞌi raklulu, rivun ilaꞌa naꞌa ulun ratan a. Rtulis vaivatul isa naꞌa tenan a, ovu wol tamata isa nkaꞌa vaivatul yai; Ia aꞌuk saꞌi nkaꞌa. 13 Ia noru ravit blawat i rsovu roak naꞌa lara, ovu rfanara ia ne, “Ubu Ni Vaivatul ra.”†19:13 Ubu Ni Vaivatul ra nfaturu lahir Yesus. 14 Suldadu ovi rnaꞌa lanit ratan rorang Ia. Ira rata rdoku kuda ngangiar sasan lokat ira, ovu vali lokat ira roru ravit marmerat. Ravit avyai rotu tali maloli masmasa ngangiar i naran lenan. 15 Nahin blawat i namneran urun ntali vavan ralan nma murin. Ia veka nala nahin blawat yai al nfaleka munuk bangsa ra, ovu veka nfareta ira ovu takil tmaꞌan. Ia veka nramat anggur i nfaturu Ubu Ni ngrova a naꞌa wan i baꞌi raramat anggur naꞌa. Ia nukun orang lahir afa ovi Ubu nfalak ma notu ra, ma al nfaturu Ubu Ni ngrebat i nlia munuk a. Ia veka nfaturu Ni ngrova a ma al nukun tamata ovi rotu afa ovi sian ra. 16 Naꞌa Ni ravit blawat a ovu naꞌa sahin a, rtulis nara ini, “Ia neluk Raja verin raja ra munuk, ovu Duilaꞌa Ia verin dua ra munuk.”

17 Nata usiꞌik Ubu Ni sansinir isa ntali lanit ratan ndiri lera ratan a. Ia nafwak ma vain a dawan urun, ma nfalak verin manut nangan ovi roru ma karatat ira ne, “Mya ma misdovu mia naꞌa ini, ma myovu vali snoba dawan i Ubu notu a. 18 Mya, boma mian raja ihirira ra, ovu vali tamata ovi rfareta suldadu ra ihirira ra. Mya ma mian vali suldadu ovi rangrebat urun ihirira ra, ovu vali rira kuda ra ihirira ra. Mia veka mian vali tamata ra munuk ihirira ra, velik ne tamata avyai koꞌu te dawan ira, tamata sansinir te wol tamata sansinir ira.”

19 Ubu Ni sansinir yai nfalak munuk wean inyai, beti usiꞌik vali afwatan sian‡19:19 Msiꞌik vali Wahyu 13:1-10, 17:11-14. i nangal Ubu. Afwatan sian yai nasdovu munuk raja ovi rnaꞌa lanit ivavan, ovu rira suldadu ra ma rotu rihi ovu Ia i ndoku kuda tetan ratan a, ovu Ni suldadu ra vali. 20 Ba rtaha nala lahir afwatan sian yai, ovu nabi siklabir§19:20 Msiꞌik Wahyu 13:11-17 i notu faneak naꞌa afwatan yai wahan ralan a. Ni afa siklabir ovi notu ra, nlabir nala munuk tamata ovi rotu roak faneak naꞌa rearira ra, ovu vali tamata ovi rsangatur ma raraning afwatan dawan yai ni walut a. Nata rvatuk favaꞌat afwatan yai ovu nabi siklabir yai rti yafu wan i wean tahat. Yafu yai ngnea urun i lahir, tevek ngnea yai ntali belerang. 21 Ba Ia i ndoku kuda yai tetan ratan a, nala Ni nahin blawat i namneran a, ntali vavan nma murin, ma al nfedan munuk afwatan yai ni suldadu ra. Ba manut nangan ra rma ma raꞌan tamata ovi rmata roak yai ihirira ra, ma evurira rveda urun i lahir.