Ɗerewol Piyer Ɗiɗaɓol
Haala Puɗɗirka
Binnuɗo ɗerewol ŋol ɗo innii hoore mum Simon Piyer, lilaaɗo Yeesu Almasiihu.
O laatake seedeejo ji'uɗo no yeeso Yeesu waylitorii, o nanii bo daane Alla ƴiwune diga dow. O siwtorii no Yeesu waɗii annabaaku dow maayde makko, kanko Piyer.
Piyer batay ɓe o winnani, o batay bo to o woni o winniri ɗerewol ŋol. Amma goonɗinɓe Yeesu hande makko o winnani. Ɗum nandi bo hande Piyer winnii ɗerewol ŋol der goonki mum sakitiinehi. O batanii ekkitinol makko ŋol o janŋinnoo. O batanii bo janŋinooɓe fewrekuuɓe warooɓe gam biisa ko o ekkitini.
Ko ɗerewol ŋol tiitii woni, finningo hakkillo ɓe o winnani faa ɓe ciwtora ko o janŋini ɓe. Der ɗerewol ŋol, Piyer hollii kiita desaniika janŋinooɓe pewe, o batanii bo munyal Alla mo yiɗaa baa gooto halka, amma himɓe fu wittaa to makko, tuuba. O heennyitirii ɗerewol makko e waggingo wuurooɓe ko Dewtere bati.
Tokkontirki haalaaji
1. Cannooje, 1.1-2
2. Noddoore goonɗinɓe, 1.3-21
3. Ekkitinooɓe fewrekuuɓe, 2.1-22
4. Wittoyki Yeesu Almasiihu, 3.1-16
5. Haalaaji cakitiiɗi, 3.17-18
1
Sannoore
1 Ɗerewol ŋol ƴiwii e am min Simon Piyer. Mii laatii jaggiiɗo e lilaaɗo Yeesu Almasiihu. Mi sannii on, onon heɓuɓe goonɗinki geeti hande ki amen, gam sabbu foonnitaare Alla men, tawaane der Yeesu Almasiihu, kisinoowo. 2 Alla ɗuuɗinana on moƴƴere e jam gam oon anni mo, kanko e Joomiraawo meeɗen Yeesu.
Hulugo Alla
3 Baawɗe Alla hokkii en huune fu ko haanani en buuriren, e no haani goniren e kulol Alla. Baawɗe ɗen wallii en annugo Alla nodduɗo en kawten der tedduŋal mum, e geetaaku mum. 4 Diga e baawɗe ɗen keɓuɗen moƴƴereeji mawɗi, tedduɗi, ɗi gaɗanaɗen alkawal mum. O waɗii ɗum gam kawton e makko, nandon mo, gam daɗon suunooji duuniyaaru kalkooji. 5 Gam huune ɗum, tinnee, ɓeydee dow goonɗinki mooɗon geetaaku, dow geetaaku, annal, 6 dow annal, nantaare, dow nantaare, tinnaare, dow tinnaare, kulol Alla, 7 dow kulol Alla, banniraagu, dow banniraagu, yidde. 8 To huune ɗum fu oon jogii ɗum no wooɗi, ko e ɗum ɓeydo der mooɗon, ɗum wallan on ɓeydaago yeeso yeeso der annugo mooɗon Joomiraawo meeɗen Yeesu Almasiihu. 9 Neɗɗo mo huune ɗum jacci, laati nun bumɗo, o yi'ataa, gam o yeggitii no Alla laaɓini mo diga e hakkeeji makko jawtuɗi.
10 Gam majjum banniraaɓe am, tinnee no baawirɗon fu, gam tabbitinon noddoore ne Alla noddi on, e cuɓol ŋol o suɓi on. Gam to on gaɗii ɗum on janataa der ko halli abada! 11 Hande non Alla maɓɓitiranta on mammam dammugal Laamaare tabitiine, ne Joomiraawo meeɗen Yeesu Almasiihu kisinoowo en.
12 Kanjum acci wakkati fu mii siwtora on huune ɗum, baa no oon anni ɗum, heɓa cemmiɗon der gooŋa ka jaɓuɗon. 13 Mii miili, eɗum foonnitii, mi finnina hakkillooji mooɗon faa ciwtoron ɗum to emii wuuri. 14 Gam mii anni mi ɓooyataa e duuniyaaru ɗo kade, hande no Joomiraawo meeɗen Yeesu Almasiihu anninirinmi ɗum.
15 Amma mi waɗan ko baawumi fu, gam to mi yawti, baawon ko siwtori kujje ɗee wakkati fu.
Tedduŋal Almasiihu
16 E haalaaji ɗi himɓe tafi bane men anniniri on wittoygo Joomiraawo meeɗen Yeesu Almasiihu e baawɗe, amma men ceedike e gite amen manŋu makko! 17 Alla Baaba hokkii mo tedduŋal wakkati daane ne tedduŋal seedanii mo wi'i: «Oo ɗo nun laatii Ɓiyam jiɗaaɗo, mo belirmi ɓerne.» 18 Menen e ko'e amen men nanii daane nen diga dow kammu, gam emen gondunoo e makko dow waanne seniine.
19 Ɗum ɗon fu ɓeydanii men tabbitingo ko annabiiɓe batunoo. On gaɗii ko wooɗi no gattuɗon hakkillooji mooɗon dow makka, gam haala maɓɓe e nandi hande fitilleel jalboowel der niwre, e hande hoodere fajiri*Hoodere fajiri woni Almasiihu, jaynoowo der ɓerɗe goonɗinɓe ɗum. Daaru dewtere Kollitinki 22.16 jalboore der ɓerɗe mooɗon faa de fajiri waɗi, 20 Aran, annitee no walaa baawoowo ko faamini ko winnaa der dewte annabiiɓe e annal hoore mum. 21 Hande non, walaa mo meeɗi ko heɓi haala annabaaku e sago hoore mum, amma Ruuhu Ceniiɗo nun waɗata himɓe e bata haala Alla.
*1:19 Hoodere fajiri woni Almasiihu, jaynoowo der ɓerɗe goonɗinɓe ɗum. Daaru dewtere Kollitinki 22.16