2
To en jeebee kisidam
1 Gam majjum, e haani kakkilanen puy ko nanuɗen, gam to en boɗɗodee laawol. 2 Haala ka Alla hokki diga e malaykaaɓe goonɗii. Woofuɓe e saliiɓe ɗowtanaago ka fu, heɓan kiita kaa ɗo haanani ɓe. 3 To non noy daɗirten, to en jeebake kisidam mawɗam hande ɗam ɗo? Joomiraawo nun arti batango kisidam ɗam, den nanuɓe tabbitinanii en ɗam. 4 Alla semmiɗinii seedaaku maɓɓe e waɗugo maaneeji, e kaayɗiniiɗum, e kaayeefiiji feere feere. Alla hollitii ɗum bo e seennango ɓe Ruuhu Ceniiɗo hande no o yiɗiri.
Yeesu laatake neɗɗo gam hisina himɓe
5 Alla hokkay malaykaaɓe ɓe laamano duuniyaaru garoowu nu batanten. 6 Goɗɗo batii nokkun der Dewtere, wi'i:
«Ume neɗɗo laatii faa ciwtoraa ɗum?
naa ɓii-aadama ko paaleɗaa ɗum?
7 A leesinii mo wakkati seɗɗa ley malaykaaɓe,
a meelii mo tedduŋal e manŋu.
8 A yowii huune fu ley koyɗe makko✡Jabuura 8.5-7.»
No Alla yowani mo huune fu, eɗum holla no goɗɗum horaaki ko o yowanay mo junŋo. Jooni en ji'ataa taw no o yowanii mo kujje fu junŋo. 9 Amma een ji'a Yeesu leesinanooɗo wakkati seɗɗa ley malaykaaɓe, jooni o meelinaama tedduŋal e manŋu. Gam ume? Gam o toorake, o maayi. Hande non, sabbu moƴƴere Alla, o maayiranii himɓe fu. 10 Ɗum fottanii Alla taguɗo huune fu, e mo gam mum huune fu woni, yaara himɓe ɗuuɓɓe ɓe keɓa tedduŋal. Ɗum fottanii mo bo, o yottina Yeesu maɓɓitinɗo laawol kisidam, o laato kebbuɗo diga e tooraaji.
11 Gam laaɓinoowo, e laaɓinteeɓe fu ƴiwii diga e baaba gooto. Kan waɗi o sentay noddugo ɓe banniraaɓe. 12 O wi'ii:
«Mi batan banniraaɓe am inne maa,
mi maantete caka jama'aare maa✡Jabuura 22.23.»
13 O wi'ii kade:
«Mi yowan hoolaare am fu dow Alla.»
Kade bo, o wi'i:
«Mi nani, min e ɓiɓɓe ɓe Alla hokkimmi✡Esaaya 8.17-18.»
14 Hande no ɓiɓɓe woodiri ɓannu e ƴiiƴam, hande non Yeesu bo ettiri ɓannu, laatii hande maɓɓe. O waɗii ɗum gam diga e maayde makko, o halka baawɗe laamaniiɗo maayde, waato Seyɗan. 15 Diga e majjum o rinɗini laatiiɓe maccuɓe der gonki mum fu, gam ɓe kuliino maayde. 16 Gam een anni, malaykaaɓe bane Yeesu wari wallugo, amma laatiiɓe lenyol Iburahiima nun. 17 Gam majjum, e haani o nanda e banniraaɓe makko der huune fu. Hande non o laatorii hooreejo Limaamiiɓe mo enɗam, koolaaɗo der golle Alla, gam o moyta hakkeeji jama'aare. 18 Kanko e hoore makko o tooraama, o jarbaa. Gam majjum, o waawan wallugo jarbaaɓe.