Ɗerol Yahaaya aranol
Habaru dow ɗerol ngool
Heewɓe no mbi'a ko Yahaaya ɓii-Jebede, aahiijo Iisa *Almasiihu, winndi ɗerol ngool yahde he goonɗinɓe Iisa *Almasiihu ɓe torra sankitii, tawaaɓe nder nokkuuje feere-fereeje.
Nder wakkati oo ekkintinooje gom bi'ooje ko Iisa hanaa *Ɓii-Alla cankitaama hakkune goonɗinɓe amma Yahaaya holli ko ɗe kanaa goonga (1 Yahaaya 5.6-12).
Daliila gaɗɗo, o winndani ɓe ɗerol ngool woni : Arannde nii o semmbinɗina ɓe, ɓe njooɗo nder kawtal maɓɓe he Alla daliila Iisa *Almasiihu. Ɗiɗaɓel, o ekkintina ɓe no ɓe anndirta ekkintinol fewrewol, bonnoowol kawtal goonɗinɓe Iisa *Almasiihu.
Nder ɗerol ngool, o wi'ii goonɗinɓe Iisa *Almasiihu ngiɗodira hakkune mum'en hano no Alla hiɗiri ɓe.
Ko winndaa nder ɗerol ngool :
Haala kokkooha mbuurnam (1.1-4)
Jeyngol e nimre (1.5–2.29)
Ɓiɓɓe Alla e ɓiɓɓe Seyɗan (3.1-24)
Koree ruuhu fuu (4.1-6)
Giɗɗo Alla fuu no haani hiɗa banndum (4.7-21)
Goonɗinol kokkoowol jaalorgal nder duuniyaaru (5.1-21)
1
Haala kokkooha himɓe mbuurnam
1 Mi winndani on ngam haalande on dow gonnooɗo ɗon illa fuɗɗorde.* 1.1 Gonnooɗo ɗon illa fuɗɗorde woni Iisa. Daaru Yahaaya 1.1-18. Min nanii haala makko, min ngi'irii mo gite amin, min ƴeewi mo, min meemirii mo juuɗe amin. Kanko woni haala kokkooha mbuurnam. 2 Mbuurnam ɗam wannginaama, min ngi'ii ɗam : Miɗen ceedanoo ɗam. Mbuurnam nduumiiɗam ngonnooɗam to *Baabiraawo, ɗam min mbannginanaa. 3 Ndenne, ko min ngi'ii he ko min nani, min kaalanta on, onon duu, faa kawton he amin nder kawtal *Baabiraawo he Ɓiyum Iisa *Almasiihu. 4 Miɗen mbinndana on ɗum, heɓa belɗum amin huuɓa.
Alla no jeyngol
5 Habaru mo min narrii *Almasiihu, mo min kaalanta on nii : Alla no jeyngol non, nimre fuu takkaaki mo. 6 Nde nii en mbi'ii eɗen nder kawtal makko, dey eɗen ndilla nder nimre, en penii, goonga tawaaka nder golle meeɗen. 7 Amma nde nii eɗen ndilla nder jeyngol hano no Alla he hoore mum wontiri nder maggol nii, ndenne enɗam naatii hakkune meeɗen. Ƴiiƴam Ɓiyiiko, Iisa *Almasiihu duu no lamnan en he hakke fuu.
8 Nde nii en mbi'ii en ngalaa hakke fuu, en kiilii ko'e meeɗen, goonga fuu tawdaaka he meeɗen. 9 Amma se en njardake, en mbanngini yeeso Alla dow hakkeeji meeɗen, ngam o kolniiɗo, dartiiɗo, o yaafoto en, o lamna en he hakke fuu. 10 Nde nii en mbi'ii en ngaɗaay hakke, en ngaɗii mo penoowo, haala makko naataay ɓerɗe meeɗen.