1 تٛ غٛطّٛ مٛوطٛنْ وُلّٛيْتٛ غٛطّٛ تٛکُّطٛ يٜىٰسُ، نَاع طُمْ شٜمْتِنِيطُمْ اٛ وُلّٛيٛومٛ تٛ ٻٜ تٛکَّايِ يٜىٰسُ؟ نَاع اٜ حَانِ اٛ وُلّٛيٛومٛ تٛ تٛکُّٻٜ يٜىٰسُ؟ 2 اٛنْ اَنْدَا ݧَلْندٜ غٛعٛ يِمْٻٜ اَللَّه نغَطَنَيْ دُونِيَارُ کِيتَ؟ تٛ طُمْ اٛنٛنْ نغَطَنْتَ دُونِيَارُ کِيتَ، نغَمْ طُمٜ اٛنْ مبَاوَتَا نغَطَنٛنْ يِمْٻٜ کِيتَ دٛوْ شَطُّمْ ڤَمَرُمْ؟ 3 اٛنْ اَنْدَا اٜنْ نغَطَنَيْ مَلَاعِکَعٜنْ کِيتَ؟ تٛ طُمْ نٛنْ، اٛنْ مبَاوَيْ شِرْيٛوتِرٛنْ شِيَ فَمْفَمْتِرْکِ حَکُّندٜ يِمْٻٜ!‏ 4 نغَمْ نٛنْ، تٛ اٛنْ نغٛودِ شِيَ فَمْفَمْتِرْکِ، نغَمْ طُمٜ نجَارٛتٛنْطُمْ تٛ يِمْٻٜ ٻٜ تٛکُّٻٜ يٜىٰسُ کٛشِّ نَاع ٻٜ غٛطُّمْ؟ 5 مِ وِعُ نٛنْ نغَمْ مِ سٜمْتِنَعٛنْ؞ جٛونِ، وَلَا کٛو غٛعٛتٛ ندٜرْ مٛوطٛنْ غٛودُطٛ فَامُ بَاوَيْطٛ سِرْيٛوتِرَ کٛولِيٻٜ يٜىٰسُ؟ 6 اَمَّا کٛولِيطٛ يٜىٰسُ وُلّٛيٛو کٛولِيطٛ يٜىٰسُ، حَا يٜىٰسٛ ٻٜ کٛولَاکِ يٜىٰسُ!‏

7 وُلّٛوتِرْکِ حَکُّندٜ مٛوطٛنْ طُمْ شٜمْتِنِيطُمْ؞ نَاع طُمْ ٻُرِي مُݧٛنْ تٛ يِمْٻٜ نغَطَنِيعٛنْ کٛ وٛوطَا؟ نَاع طُمْ ٻُرِي مُݧٛنْ تٛ طُمْ پٛيْرِيعٛنْ طُمْ جَٻَنِيعٛنْ کٛ نغٛودُطٛنْ؟ 8 اَمَّا اٛنٛنْ اٜ کٛعٜ مٛوطٛنْ حَا اٛنْ نغَطَنَ وٛٻّٜ تٛکُّٻٜ يٜىٰسُ کٛ وٛوطَا اٛنْ پٛيْرَٻٜ اٛنْ نجَٻَنَٻٜ کٛ ٻٜ نغٛودِ!‏ 9 اٛنْ اَنْدَا غَطٛوٻٜ کٛ وٛوطَا نَتَّتَا لَامُ اَللَّه؟ تٛع اٛنْ نجَٻُ طُمْ مَجِّنَعٛنْ؞ غَطٛوٻٜ نجٜىٰنُ، کٛو اٜ ٻٜ نغٛودِ تٜىٰغَلْ کٛو ٻٜ نغَلَا تٜىٰغَلْ، اٜ مَوْنِنٛوٻٜ غُنْکِيجِ، اٜ غَطٛوٻٜ لُوطُ، 10 اٜ وُيْٻٜ، اٜ غٛودُٻٜ سُونٛ شٜىٰدٜ، اٜ جَرٛوٻٜ، اٜ مٜتٛوٻٜ کَلُّکَ دٛوْ وٛٻّٜ، اٜ وُيْٻٜ تٜىٰتٛوٻٜ، ٻٜ فُو ٻٜ نَتَّتَا لَامُ اَللَّه؞ 11 ندٜنّٛ نٛنْ وٛٻّٜ مٛوطٛنْ مبَعِ؞ اَمَّا جٛونِ طُمْ لٛوتِي حَکّٜ مٛوطٛنْ، اٛنْ نغَرْتِرَامَ يِمْٻٜ اَللَّه، اٛنْ نغَرْتِرَامَ اَادِلِعٜنْ بَرْکَ يٜىٰسُ اَلْمَسِيحُ جٛومِرَاوٛ مٜىٰطٜنْ اٜ رُوحُ اَللَّه؞

12 وٛٻّٜ مٛوطٛنْ مبِعَيْ، ‏«‏طُمْ جَٻِي مِ وَطَ کٛو طُمٜ،»‏ اَمَّا اٜ مِ وِعَعٛنْ نَاع کٛو طُمٜ نَفَنْتَعٜنْ؞ طُمْ جَٻِي مِ وَطَ کٛو طُمٜ، اَمَّا مِ وَرْتَتَا مَشُّطٛ کٛو طُمٜ؞ 13 طٛنْمَا وٛٻّٜ مٛوطٛنْ مبِعَيْ، ‏«‏طُمْ وَطِي ݧَمْندُ نغَمْ رٜىٰدُ، نٛنْ مَا طُمْ وَطِي رٜىٰدُ نغَمْ ݧَمْندُ،»‏ اَمَّا شَرٜلْ اٜ وَرَ نغٜلْ اَللَّه وَرْتِرْتَ فُو طِطُمْ کٛو کٛ نَفِ؞ ٻَنْدُ وَطَاکَ نغَمْ نجٜىٰنُ، اَمَّا ندُ وَطَا نغَمْ جٛومِرَاوٛ، ندٜنْ جٛومِرَاوٛ جٜيِندُ؞ 14 اَللَّه اُمِّنِي يٜىٰسُ جٛومِرَاوٛ مٜىٰطٜنْ دَغَ مَيْدٜ، اٜنٜنْ مَا اٛ اُمِّنَيْعٜنْ دَغَ مَيْدٜ بَرْکَ بَوْطٜ مَاکٛ؞

15 اٛنْ اَنْدَا ٻَلِّ مٛوطٛنْ طُمْ جٛکّٛوطٜ ٻَنْدُ اَلْمَسِيحُ؟ تٛو، مِ حٛشَّيْ ٻَنْدُ اَلْمَسِيحُ مِ حَوْتَندُ اٜ ٻَنْدُ کَارُوَاجٛ؟ سَمْ، مِ وَطَتَا نٛنْ!‏ 16 اٛنْ اَنْدَا فُو کَوْتُطٛ ٻَنْدُ اٜ کَارُوَاجٛ ٻٜ نغَرْتِي ٻَنْدُ غٛعٛ وٛنْ طٛنْ؟ نغَمْ نٛ اَايَارٜ وِعِ، ‏«‏کَمْٻٜ طِطٛ ٻٜ نغَرْتَ ٻَنْدُ غٛعٛ؞»‏ 17 اَمَّا فُو شُمْڤٛوتِرٛووٛ اٜ جٛومِرَاوٛ، کَنْکٛ اٜ جٛومِرَاوٛ ٻٜ نغَرْتِي غٛعٛ؞

18 نغٛطِّتٜىٰ وَطُکِ نجٜىٰنُ!‏ کٛو طُمٜ حَکّٜ طُمْ نٜطّٛ وَطَتَ، طُمْ مٜىٰمَتَا ٻَنْدُ مَاکٛ، اَمَّا غَطٛووٛ نجٜىٰنُ اٜ وٛنَّ ٻَنْدُ مُوطُمْ؞ 19 اٛنْ اَنْدَا ٻَلِّ مٛوطٛنْ طُمْ وُرٛ تٛ رُوحُ اَللَّه جٛوطٛتٛو؟ اَللَّه حٛکِّيعٛنْطُمْ طُمْ جٛوطٛو ندٜرْ مٛوطٛنْ؞ نَاع اٛنٛنْ نجٜيِ کٛعٜ مٛوطٛنْ؞ 20 اَللَّه حٛکِّي ٻِطّٛ مُوطُمْ نغَمْ اٛ وَرْتِرَعٛنْ ٻٜ مَاکٛ؞ نغَمْ نٛنْ، مَوْنِنِرٜىٰ اَللَّه اٜ ٻَلِّ مٛوطٛنْ؞