1 اٜ مِ تٛرٛو مَوْٻٜ کَوْتَلْ تٛکُّٻٜ يٜىٰسُ غٛنْٻٜ ندٜرْ مٛوطٛنْ؞ مِنْ مَا مِ مَوْطٛ ندٜرْ تٛکُّٻٜ يٜىٰسُ، بَنْدِرَاوٛ مٛوطٛنْ، شٜيْدِيطٛ تٛرَّ کَ اَلْمَسِيحُ يَرِ، کٜٻَيْطٛ غٜطَلْ مُوطُمْ ندٜرْ مَنْغُ مَاکٛ تٛ اٛ وَرْتٛيِي؞ اٜ مِ تٛرٛوعٛنْ، 2 ڤَامَنٜىٰ اٛرْندٜ اَللَّه ندٜ طُمْ تَمْبِنِعٛنْ؞ ڤَامَنٜىٰندٜ ندٜرْ بٜلْطُمْ ٻٜرْندٜ، نَاع بٛ دٛولٜ طُمْ وَطَتَعٛنْ، طٛنْمَا نَاع نغَمْ حٜٻُکِ شٜىٰدٜ، اَمَّا نغَمْ اٛنْ نغٛودِ يِدّٜ کُوغَلْ نغَلْ ندٜرْ ٻٜرْطٜ مٛوطٛنْ؞ 3 تٛع اٛنْ کٛلُّ يِمْٻٜ ٻٜ اَللَّه تَمْبِنِعٛنْ لَامُ سٜمْبٜ، اَمَّا نغَرْتٜىٰ کٛ ٻٜ اٜکِّتٛتٛو تٛ مٛوطٛنْ؞ 4 نغَمْ تٛ اَلْمَسِيحُ لَامِيطٛ وٛيْنَاٻٜ وَرْتٛيِي، اٛنْ کٜٻَيْ غِيفٛلْ مَنْغُ نغٛلْ حَا اَبَدَا؞

5 اٛنٛنْ سُکَاٻٜ، نغَطٜىٰ کٛ مَوْٻٜ کَوْتَلْ تٛکُّٻٜ يٜىٰسُ غٛنْٻٜ ندٜرْ مٛوطٛنْ مبِعِ؞ اٛنْ فُو نغَرْتٜىٰ لٜيْنٛوٻٜ کٛعٜ، مبَلِّندِرٜىٰ حَکُّندٜ مٛوطٛنْ؞ نغَمْ اَايَارٜ وِعِي، ‏«‏اَللَّه وَݧِي غٛودُٻٜ مَنْغُ حٛورٜ، اَمَّا اٜ مٛ وَلَّ لٜسْنُٻٜ کٛعٜ؞»‏ 6 نغَمْ نٛنْ، لٜسْتِنٜىٰ کٛعٜ مٛوطٛنْ يٜىٰسٛ اَللَّه مٛ بَوْطٜ، نغَمْ اٛ وَطَ کٜٻٛنْ مَنْغُ اٜ شَرٜلْ نغٜلْ اٛ يِطِ؞ 7 تَمْبِنَنٜىٰمٛ فُو کٛ وَنَّتَعٛنْ، نغَمْ اٜ مٛ فَامَنَعٛنْ؞

8 شُرٜىٰ کٛعٜ مٛوطٛنْ، نجٛوطٛوطٛنْ اٛنْ شِرْيِي؞ غَݧٛ مٛوطٛنْ شٜيْطَنْ اٜ مٛ وٛوسٛو بٛ سٜمْبِنْدُ ٻٜرْنُندُ اٜ مٛ طَٻِّتَ مٛ اٛ حَلْکَتَ؞ 9 نغَݧٜىٰمٛ، ندَرٛوطٛنْ دٛوْ حٛولَاکِ يٜىٰسُ اٜ سٜمْبٜ؞ اٛنْ اَنْدِ بَنْدِرَاٻٜ مٛوطٛنْ فُو ندٜرْ دُونِيَارُ اٜ نجَرَ اِرِ کَنْ طٛنْ تٛرَّ؞ 10 ندٜنْ غَطَ اٛنْ نجَرِي تٛرَّ شَرٜلْ سٜطَّ، اَللَّه غٛودُطٛ يِدّٜ فُو، نٛدُّطٛعٛنْ نغَمْ کٜٻٛنْ غٜطَلْ ندٜرْ تٜدُّنغَلْ مَاکٛ تَبٛتٛونغَلْ بَرْکَ اَلْمَسِيحُ، کَنْکٛ اٜ حٛورٜ مَاکٛ اٛ وَرْتِرَيْعٛنْ کٜىٰوُٻٜ، اٛ جٛطِّنَعٛنْ، اٛ سٜمْبِطِنَعٛنْ بٛ تَفَارٜ؞ 11 لَامُ تَبِّتَ تٛ مَاکٛ حَا اَبَدَا اَبَدِنْ؞ اَامِنْ؞

12 سِلْبَانُسْ وَلِّيَمْ مبِنْدَنْمِعٛنْ طٜرٜوٛلْ نغٛعٛلْ ڤَمَرٛلْ؞ اٜ يِيکِ اَمْ اٛ تٛکُّطٛ يٜىٰسُ کٛولٜتٜىٰطٛ؞ اٜ مِ يِطِ مِ سٜمْبِطِنَعٛنْ مِ وِعَعٛنْ طُعُمْ وٛنِ شَاحُ اَللَّه طُمْ غٛونغَ؞ ندَرٜىٰ دٛوْ مَاجُمْ اٜ غٛونغَ؞

13 کَوْتَلْ تٛکُّٻٜ يٜىٰسُ وٛنْٻٜ طٛعٛ بَابِيلَ، ٻٜ اَللَّه سُٻِ نٛ اٛ سُٻِرِعٛنْ، اٜ ٻٜ کٛوْنَعٛنْ؞ مَرْکُسْ مَا، ٻِطّٛ اَمْ ندٜرْ تٛکُّکِ يٜىٰسُ، اٜ حٛوْنَعٛنْ؞ 14 کٛوْنِرٜىٰ حَکُّندٜ مٛوطٛنْ کٛوْنٛلْ يِدّٜ؞

اَللَّه حٛکَّعٛنْ جَمْ اٛنٛنْ تٛکُّٻٜ اَلْمَسِيحُ فُو؞