1 ندٜنْ مَوْطٛ مَوْٻٜ اَرْدِيٻٜ دِينَ پَمِ اِسْتِفَانُسْ وِعِ، ‏«‏کٛ ٻٜ مبِعِ دٛوْ مَاطَ طُمْ غٛونغَ؟»‏

2 سٜيْ اِسْتِفَانُسْ وِعِ، ‏«‏بَنْدِرَاٻٜ اَمْ اٜ دَݧٛوٻٜ اَمْ، نَنٜىٰ کٛ مبِعَيْمِ!‏ اَللَّه جٛومُ مَنْغُ وَنْغَنِي مَامَ مٜىٰطٜنْ اِبْرَاهِمْ شَرٜلْ کٛ اٛ وٛنّٛو لٜيْدِ مٜسٛفٛتَامِيَ، کٛ اٛ جٛوطٛو لٜيْدِ حَرَنْ؞ 3 اَللَّه وِعِمٛ، ‏‹‏وُرْتَ لٜيْدِ مَاطَ اٜ يِمْٻٜ مَاطَ، نجَحَا لٜيْدِ ندِ کٛلَّيْمَامِ؞›‏ 4 ندٜنْ اِبْرَاهِمْ وُرْتِي لٜيْدِ کَلْدِيَ، اٛ يَحِ اٛ جٛوطِي ندٜرْ لٜيْدِ حَرَنْ؞ غَطَ مَيْدٜ ݧَاکٛ مَاکٛ، اَللَّه اُمِّنِمٛ طٛنْمَا يَارِمٛ ندٜرْ لٜيْدِ ندِ نجٛوطِيطٛنْ جٛونِ؞ 5 اَللَّه حٛکَّايِمٛ ندٛنُ لٜيْدِ ندِنْ کٛو يَاٻَندٜ وٛعٛيْرٜ، اَمَّا اٛ وَطَنِيمٛ اَلْکَوَلْ حٛکُّکِمٛندِ، ندِ وَرْتَ ندِ مَاکٛ، کَنْکٛ اٜ ٻِٻّٜ مَاکٛ، کٛو ندٜ اٛ وَلَا ٻِطّٛ اٜ شَرٜلْ نغٜلْ؞ 6 طُعُمْ وٛنِ کٛ اَللَّه وِعِمٛ، ‏‹‏ٻِٻّٜ ٻِٻّٜىٰجِ مَاطَ نجَحَيْ لٜيْدِ وٛٻّٜ؞ يِمْٻٜ لٜيْدِ ندِنْ نغَرْتِرَٻٜ مَشُّٻٜ، ٻٜ تٛرَّٻٜ دُوٻِ 400؞ 7 اَمَّا مِ تٛرَّيْ ٻٜنْ طٛنْ يِمْٻٜ غَرْتِرْٻٜ ٻِٻّٜ ٻِٻّٜىٰجِ مَاطَ مَشُّٻٜ؞ غَطَ مَاجُمْ ٻٜ مبُرْتٛتٛ لٜيْدِ ندِنْ ٻٜ مَوْنِنَيَمْ ندٜرْ لٜيْدِ ندِعِ؞›‏ 8 ندٜنْ اَللَّه وَطَنِ اِبْرَاهِمْ اَلْکَوَلْ؞ نَادُکِ وٛنِ کٛ حٛلَّتَ اٛ جَٻِي اَلْکَوَلْ نغَلْ؞ ندٜ اِبْرَاهِمْ دَݧِ اِشِيَاکُ، غَطَ بَلْطٜ جٛوٜىٰتَتِ اٛ نَادِمٛ؞ نٛنْ اِشِيَاکُ مَا نَادِ يَاکُبُ؞ يَاکُبُ مَا نَادِ ٻِٻّٜ مُوطُمْ سَڤّٛ اٜ طِطٛ، کَمْٻٜ نغٛنِ مَامَعٜنْ مٜىٰطٜنْ؞

9 ‏«‏مَامَعٜنْ مٜىٰطٜنْ نَنِ لَوْلِيرُ اِسُفُ، ٻٜ شٛورِمٛ اٛ وَرْتِ مَشُّطٛ ندٜرْ لٜيْدِ مَسَرْ؞ اَمَّا اَللَّه اٜ وٛنْدِ اٜ مَاکٛ، 10 حِسْنِمٛ دَغَ تٛرَّاجِ فُو، حٛکِّمٛ فَامُ حَا فِرعَوْنَ لَامِيطٛ مَسَرْ اَنْدِ کَ مَاکٛ؞ فِرعَوْنَ وَرْتِرِمٛ مَوْطٛ ندٜرْ لٜيْدِ مَسَرْ حَا دٛوْ وُرٛ مُوطُمْ فُو؞ 11 سٜيْ وٜىٰلٛ کَلُّنغٛ وَطِ ندٜرْ لٜيْدِ مَسَرْ اٜ لٜيْدِ کَنْعَانَ فُو؞ نغٛ تٛرِّ يِمْٻٜ حَا مَامَعٜنْ مٜىٰطٜنْ ندُلِّ کٛ ݧَامَتَ؞ 12 ندٜ يَاکُبُ نَنِ اٜ وٛودِ ݧَمْندُ ندٜرْ لٜيْدِ مَسَرْ، اٛ لِلِ مَامَعٜنْ مٜىٰطٜنْ تٛنْ؞ اَرَنْدٜ ٻٜ نجَحِ ٻٜ نغَرْتِ، سٜيْ ٻٜ شٛعِّي کَدِنْ؞ 13 اٜ يَادُ مَٻّٜ طِطَوْرُ، اِسُفُ حٛلِّٻٜ اٛ سَکِرَاوٛ مَٻّٜ؞ فِرعَوْنَ بٛو اَنْدِ بَنْدِرَاٻٜ اِسُفُ؞ 14 ندٜنْ اِسُفُ لِلِٻٜ ٻٜ نغَدّٛيَ ݧَاکٛ مَاکٛ يَاکُبُ اٜ وُرٛ مُوطُمْ فُو؞ طُطْکِ مَٻّٜ وَطِي يِمْٻٜ 75؞ 15 سٜيْ يَاکُبُ يَحِ لٜيْدِ مَسَرْ؞ اٛ مَايِ تٛنْ، کَنْکٛ اٜ مَامَعٜنْ مٜىٰطٜنْ؞ 16 ٻٜ نجَارَا شٜىٰکٜمْ، ٻٜ اُوَا تٛنْ ندٜرْ يٜنَاندٜ ندٜ اِبْرَاهِمْ سٛودُنٛو تٛ ٻِٻّٜ حَمٛرْ اٜ اَجُرْفَارِ؞

17 ‏«‏ندٜ اَلْکَوَلْ نغَلْ اَللَّه وَطَنِ اِبْرَاهِمْ ٻَدِي حٜىٰوُکِ، يِمْٻٜ اِبْرَانِيَنْکٛعٜنْ طُوطِ ندٜرْ لٜيْدِ مَسَرْ؞ 18 اٜ شَرٜلْ نغٜلْ غٛطّٛ وَرْتِ لَامِيطٛ لٜيْدِ مَسَرْ مٛ اَنْدَا اِسُفُ؞ 19 لَامِيطٛ اٛنْ حَلَّنِ لٜݧٛلْ مٜىٰطٜنْ، اٛ تٛرِّ مَامَعٜنْ مٜىٰطٜنْ اٛ دٛولِٻٜ ٻٜ کُبِنَ ٻِکّٛيْ مَٻّٜ نغَمْ کٛيْ مَايَ؞ 20 ندٜرْ شَرٜلْ نغٜلْ مُوسَ دَݧَا، اٛ ٻِنْغٜلْ بٛنْغٜلْ نَاع سٜطَّ؞ نغٜلْ رٜىٰنَا ندٜرْ وُرٛ ݧَاکٛ مَاغٜلْ لٜبِّ تَتِ؞ 21 ندٜ نغٜلْ حُبِنَا، ٻِي فِرعَوْنَ دٜبّٛ حٛشِّنغٜلْ، وَرْتِرِنغٜلْ ٻِنْغٜلْ مُوطُمْ؞ 22 سٜيْ طُمْ جَنْغِنِ مُوسَ اٛنْ اَنْدَلْ مَسَرَنْکٛعٜنْ فُو، اٛ وَرْتِ بَوْطٛ حَالَ اٜ کُوطٜ؞

23 ‏«‏ندٜ مُوسَ وَطِ دُوٻِ 40، اٛ يَحِ تٛ لٜݧٛلْ مَاکٛ، ٻِٻّٜ اِسْرَاعِيلَ نغَمْ اٛ يِعَ نٛ ٻٜ نغٛنْتِندِرِ؞ 24 ندٜ اٛ يِعِ غٛطّٛ مَسَرَنْکٜىٰجٛ اٜ تٛرَّ غٛطّٛ اِسْرَاعِيلَنْکٜىٰجٛ، اٛ وَلِّ اِسْرَاعِيلَنْکٜىٰجٛ تٛرّٜتٜىٰطٛ اٛنْ، اٛ فِيِ مَسَرَنْکٜىٰجٛ اٛنْ، اٛ وَرِمٛ؞ 25 اٛ ݧُمِ بَنْدِرَاٻٜ مَاکٛ اَندِتَيْ اَللَّه حُوتِرَيْمٛ نغَمْ حِسْنَٻٜ دَغَ جُنْغٛ مَسَرَنْکٛعٜنْ، اَمَّا ٻٜ اَنْدِتَايِ؞ 26 ندٜ فِنِ اٛ تَوِ اِسْرَاعِيلَنْکٛعٜنْ طِطٛ اٜ کَٻَ؞ اٛ يِطِي اٛ سِرْيٛوتِرَٻٜ، اٛ وِعِٻٜ، ‏‹‏حِغٛوٻٜ اَمْ، اٛنٛنْ اٛنْ بَنْدِرَاٻٜ!‏ نغَمْ طُمٜ کَلَّنْتٛنْ کٛعٜ مٛوطٛنْ؟›‏ 27 اَمَّا تٛرَّيْطٛ غٛعٛتٛ اٛنْ تُرْتِي مُوسَ وُتُّدُ، وِعِمٛ، ‏‹‏مٛيٜ وَرْتِرْمَا اَرْدِيطٛ اٜ کِيتٛتٛوطٛ دٛوْ اَمِنْ؟ 28 مِنْ مَا، اَ يِطِ مبَرَايَمْ نٛ مبَرْدُطَا مَسَرَنْکٜىٰجٛ کٜىٰݧَ؟›‏ 29 ندٜ مُوسَ نَنِ نٛنْ دٛغِّ يَحِ لٜيْدِ مِدِيَنْ؞ تٛنْ اٛ دَݧَنَا ٻِٻّٜ وٛرْٻٜ طِطٛ؞

30 ‏«‏غَطَ اٛ وَطِي دُوٻِ 40 تٛنْ، مَلَاعِکَاجٛ وَنْغَنِمٛ ندٜرْ طٜمْنغَلْ حِيتٜ دٛوْ لٜغّٜلْ ندٜرْ لَدّٜ، حَادٜ حٛشّٜىٰرٜ سِنَيْ؞ 31 ندٜ مُوسَ يِعِ نٛنْ طُمْ حَيْطِنِيمٛ، اٜ مٛ ٻَتّٛو نغَمْ اٛ رَارَ، سٜيْ اٛ نَنِ حٛنٛنْدٜ جٛومِرَاوٛ وِعِي، 32 ‏‹‏مِنْ وٛنِ اَللَّه مَامَعٜنْ مَاطَ، اَللَّه اِبْرَاهِمْ اٜ اِشِيَاکُ اٜ يَاکُبُ؞›‏ مُوسَ دَرِي اٜ دِوْنَ، حُلِ رَارُکِ؞ 33 جٛومِرَاوٛ وِعِمٛ، ‏‹‏اِتُّ ڤَطٜ مَاطَ، نغَمْ وِغٜىٰرٜ تٛ ندَرِطَا ندٜ شٜنِيندٜ؞ 34 مِ يِعِي تٛرَّ يِمْٻٜ اَمْ وٛنْٻٜ لٜيْدِ مَسَرْ، مِ نَنِي بٛجِّ مَٻّٜ؞ جٛونِ مِ جِڤّٛيَکٜ نغَمْ حِسْنُکِٻٜ؞ وَرْ مِ لِلْمَا لٜيْدِ مَسَرْ؞›‏

35 ‏«‏مُوسَ مٛ ٻِٻّٜ اِسْرَاعِيلَ نغَݧُنٛو مبِعِ، ‏‹‏مٛيٜ وَرْتِرْمَا اَرْدِيطٛ اٜ کِيتٛتٛوطٛ دٛوْ اَمِنْ؟›‏ کَنْکٛ وٛنِ مٛ اَللَّه لِلٛيِ، وَرْتِرِمٛ اَرْدِيطٛ اٜ جٛوفَيْطٛٻٜ دَغَ مَشُّنغَاکُ اٜ بَلَّلْ مَلَاعِکَاجٛ وَنْغَنّٛوطٛمٛ ندٜرْ لٜغّٜلْ نغٜلْ حِيتٜ؞ 36 کَنْکٛ اَرْدِيٻٜ، ٻٜ مبُرْتِي لٜيْدِ مَسَرْ؞ اٛ وَطِي کُوطٜ کَيْطِنِيطٜ اٜ اَلَامَاجِ ندٜرْ لٜيْدِ مَسَرْ اٜ ندٜرْ مَايٛ وٛطٜوٛ اٜ ندٜرْ لَدّٜ جٛرْندٜ دُوٻِ 40؞ 37 مُوسَ اٛنْ کَنْکٛ وٛنِ بِيطٛ ٻِٻّٜ اِسْرَاعِيلَ، ‏‹‏اَللَّه لِلْدٛيَيْعٛنْ اَنَّبِيجٛ بٛ اَمْ، دَغَ ندٜرْ بَنْدِرَاٻٜ مٛوطٛنْ؞›‏ 38 مُوسَ اٛنْ اٜ مٛ ندٜرْ کَوْتَلْ مَامَعٜنْ مٜىٰطٜنْ ندٜرْ لَدّٜ، اٜ مٛ وٛنْدِ اٜ مَلَاعِکَاجٛ مٜتَنْطٛمٛ دٛوْ حٛشّٜىٰرٜ سِنَيْ؞ کَنْکٛ اَللَّه حٛکِّ حَبَرُ وٛلْدٜ کٛکَّيْندٜ يٛنْکِ نغَمْ اٛ وَدَّنَعٜنْ؞

39 ‏«‏اَمَّا مَامَعٜنْ مٜىٰطٜنْ نجَٻَايِ تٛکُّکِ کٛ اٛ وِعِ؞ ٻٜ شَلَنِيمٛ، ٻٜرْطٜ مَٻّٜ شٛعِّي مَسَرْ؞ 40 ٻٜ مبِعِ هَرُونَ، ‏‹‏وَطَنْعٜنْ اَلَّاجِ اَرْدٛتٛوطِعٜنْ، نغَمْ اٜنْ اَنْدَا کٛ حٜٻِ مُوسَ بُرْتِنٛيْطٛعٜنْ لٜيْدِ مَسَرْ؞›‏ 41 ندٜرْ بَلْطٜ طٜنْ ٻٜ نغَطِ غَغٜلْ جِينَارِ، ٻٜ نغَرْتِرِنغٜلْ اَلَّح مَٻّٜ، ٻٜ کِرْسَنِنغٜلْ شَکِّرِ، ٻٜ نغَطِ حُمْتٛ نغَمْ مَوْنِنْکِ کٛ ٻٜ نغَطِ اٜ جُوطٜ مَٻّٜ؞ 42 نغَمْ نٛنْ اَللَّه وَيْلِتَنِٻٜ ٻَاوٛ، اَلِٻٜ ٻٜ مَوْنِنَ کٛودٜ، نٛنْ نٛ طُمْ وِنْدِرَا ندٜرْ دٜفْتٜرٜ اَنَّبٛعٜنْ وِعُکِ:‏

44 اِسْتِفَانُسْ ٻٜيْدِ مٜتُکِ، وِعِ، ‏«‏ندٜنّٛ مَامَعٜنْ مٜىٰطٜنْ اٜ نغٛودِ لُکُرُ تٛ طُمْ حَوْرَتَ اٜ اَللَّه ندٜرْ لَدّٜ؞ کَيْرُ حٛلَّتَ اَللَّه اٜ وٛنْدِ اٜ مَٻّٜ؞ لُکُرُ طُمْ وَطِرَامَ نٛنْ نٛ اَللَّه تِندِنِرِ مُوسَ؞ 45 مَامَعٜنْ مٜىٰطٜنْ ٻٜنْ ندٛنِ لُکُرُ طُمْ؞ ٻٜ ندِلِّدِ اٜ مَاجُمْ شَرٜلْ کٛ جٛوشُوَ اَرْدِيٻٜ؞ ٻٜ نَتِّنِطُمْ لٜيْدِ ندِ ٻٜ نجَٻِ دَغَ تٛ لٜپِّ طِ اَللَّه رِيوِ يٜىٰسٛ مَٻّٜ؞ لُکُرُ طُمْ بٛو اٜ طٛنْ حَا جَامَنُ دَوْدَ؞ 46 دَوْدَ حٜٻِ يِدّٜ اَللَّه مٛ يَاکُبُ، اٛ تٛرِي مَحُکِ سُودُ نغَمْ مَوْنِنْکِ اَللَّه اٛنْ، اَمَّا اٛ حٜٻَايِ مَحُکِندُ؞ 47 اَمَّا ٻِطّٛ مَاکٛ سُلٜيْمَانُ مَحِندُ؞

48 ‏«‏اَللَّه جٛومُ مَنْغُ جٛوطَتَاکٛ ندٜرْ شُوطِ طِ يِمْٻٜ مَحِ، نٛنْ نٛ اَنَّبِيجٛ وِعِ جٛومِرَاوٛ وِعِي،

51 اِسْتِفَانُسْ ٻٜيْدِ مٜتُکِ، وِعِ، ‏«‏اٛنٛنْ ٻٜ کٛعٜ شَاتُطٜ ٻٜ ٻٜرْطٜ کٜىٰفٜرْطٜ، ٻٜ نٛڤِّ غَݧُطِ نَنُکِ حَالَ جٛومِرَاوٛ!‏ کٛو ندٜيٜ اٛنْ کَٻْدَ اٜ رُوحُ اَللَّه نٛنْ نٛ مَامَعٜنْ مٛوطٛنْ نغَطُنٛو؞ 52 مٛيٜ اَنَّبِيجٛ وٛنِ مٛ مَامَعٜنْ مٛوطٛنْ تٛرَّايِ؟ حَا مَا ٻٜ مبَرِي وِعُنٛوٻٜ اَادِلِيجٛ اٛنْ وَرَيْ؞ جٛونِ اٛنٛنْ اٜ کٛعٜ مٛوطٛنْ اٛنْ ݧَامِي اَمَانَ مَاکٛ، اٛنْ مبَرِيمٛ؞ 53 اٛنٛنْ اٛنْ کٜٻِي اَتَّوْرَ دَغَ جُوطٜ مَلَاعِکَعٜنْ دَغَ ندٜنّٛ، اَمَّا اٛنْ تٛکَّايِطُمْ؞»‏

54 ندٜ کَوْتَلْ مَوْٻٜ يَحُودَنْکٛعٜنْ نَنِ حَالَ کَنْ، ٻٜرْطٜ مَٻّٜ مٜتِّ ٻٜ ندَرِي اٜ ٻٜ ݝَتّٛو؞ 55 اَمَّا کَنْکٛ، اٜ مٛ حٜىٰوِ رُوحُ اَللَّه، اٛ تِجِّي دٛوْ اٛ يِعِ تٜدُّنغَلْ اَللَّه، اٛ يِعِ يٜىٰسُ اٜ دَرِي اٜ جُنْغٛ اَللَّه ݧَامٛ؞ 56 اٛ وِعِ، ‏«‏رَا!‏ اٜ مِ يِعَ دٛوْ اٜ مَٻِّتِي، ٻِي نٜطّٛ اٜ دَرِي اٜ جُنْغٛ اَللَّه ݧَامٛ؞»‏

57 سٜيْ ٻٜ فُو ٻٜ نغُلِّ سٜمْبٜىٰ، ٻٜ شُکِّ نٛڤِّ مَٻّٜ؞ طٛنْ اٜ طٛنْ، ٻٜ مَکِّيمٛ، ٻٜ نَنْغِمٛ، 58 ٻٜ مبُرْتِنِمٛ غَرِيرِ، ٻٜ کُبٛرِيمٛ اٜ کَاپٜ، ٻٜ ٻٛرْتِي کٛلْتٜ مَٻّٜ ٻٜ ندٜسِطٜ تٛ غٛطّٛ کَيٜىٰجٛ بِعٜتٜىٰطٛ شَاوُلُ نغَمْ ٻٜ کُبٛومٛ بٛطُّمْ؞ 59 اٜ ٻٜ کُبٛرٛومٛ کَاپٜ، کَنْکٛ بٛو اٜ مٛ وَطَ دٛعَارٜ اٜ مٛ وِعَ، ‏«‏يَا يٜىٰسُ جٛومِرَاوٛ، جَٻُ يٛنْکِ اَمْ!‏»‏ 60 ندٜنْ اٛ دِشِّي، اٛ وُلِّ اٜ سٜمْبٜ اٜ مٛ وِعَ، ‏«‏يَا جٛومِرَاوٛ، تَاع يٛوَنْٻٜ طُعُمْ حَکّٜ!‏»‏ ندٜ اٛ وِعِ نٛنْ، اٛ مَايِ؞