1 ندٜرْ شَرٜلْ نغٜلْ بٛو، شَاوُلُ اٜ ٻٜيْدَ تٛرُّکِ تٛکُّٻٜ يٜىٰسُ، اٜ مٛ يِطِ وَرْکِٻٜ؞ سٜيْ اٛ يَحِ تٛ مَوْطٛ مَوْٻٜ اَرْدِيٻٜ دِينَ؞ 2 اٛ تٛرِيمٛ اٛ وِنْدَنَمٛ طٜرٜوٛلْ نغٛلْ اٛ حٛلَّتَ مَوْٻٜ شُوطِ دٛعَارٜ غٛنْطِ غَرِيرِ دِمَسْکُ، وِيکِ تٛ اٛ تَوِي تٛکُّٻٜ لَاوٛلْ يٜىٰسُ تٛنْ، وٛرْٻٜ کٛو رٜوْٻٜ، اٛ نَنْغَٻٜ، اٛ حَٻَّٻٜ، اٛ يَارَٻٜ غَرِيرِ اُرُشَلِيمَ؞

3 اٜ مٛ دٛوْ لَاوٛلْ اٛ ٻَدَکٜ يٛتَّاکِ غَرِيرِ دِمَسْکُ، اٛ اَنْدَا اٛ اَنْدِتَا سٜيْ رَا جَيْنغٛلْ دَغَ دٛوْ يٜيْنَنِيمٛ فِلِيمٛ؞ 4 اٛ يَنِ اٜ لٜيْدِ، اٛ نَنِ حٛنٛنْدٜ اٜ وِعَمٛ، ‏«‏شَاوُلُ، شَاوُلُ، نغَمْ طُمٜ تٛرَّتَايَمْ؟»‏

5 شَاوُلُ وِعِ، ‏«‏مَوْطٛ، اَنْ طُمْ مٛيٜ؟»‏ حٛنٛنْدٜ ندٜنْ وِعِمٛ، ‏«‏مِنْ وٛنِ يٜىٰسُ مٛ تٛرَّتَا؞ 6 اُمَّ نَتُّ ندٜرْ غَرِيرِ؞ طُمْ وِعٜتٜ کٛ حَانِ نغَطَا؞»‏

7 حِغٛوٻٜ يَادُ مَاکٛ نَنِي حٛنٛنْدٜ ندٜنْ، اَمَّا ٻٜ نغِعَايِ کٛو مٛيٜ؞ ٻٜ ندَرِي، ٻٜ ندُلِّ کٛ ٻٜ مبِعَتَ؞ 8 شَاوُلُ اُمِّي دَرِي فٜىٰرِ غِتٜ مُوطُمْ، اَمَّا يِعَتَا؞ ندٜنْ اٛ جٛغَنَا جُنْغٛ، اٛ نَتِّنَا غَرِيرِ دِمَسْکُ؞ 9 اٛ وَطِ بَلْطٜ تَتِ اٜ مٛ وُمِ، اٛ يَرَايِ اٛ ݧَامَايِ؞

10 اٜ وٛودِ غٛطّٛ تٛکُّطٛ يٜىٰسُ ندٜرْ غَرِيرِ ندِنْ بِعٜتٜىٰطٛ حَنَانِيَ؞ جٛومِرَاوٛ نٛدِّمٛ ندٜرْ کٛيْطٛلْ، وِعِمٛ، ‏«‏حَنَانِيَ!‏»‏ اٛ وِعِ، ‏«‏نَعَمْ، جٛومِرَاوٛ؞»‏

11 جٛومِرَاوٛ وِعِمٛ، ‏«‏اُمَّ تٛکَّا لَاوٛلْ بِعٜتٜىٰنغٛلْ لَاوٛلْ ڤٛرْتِينغٛلْ، نجَحَا وُرٛ يَحُودَ، نغٜيْنَا غٛطّٛ بِعٜتٜىٰطٛ شَاوُلُ پِوٛيْطٛ غَرِيرِ تَرْسُسْ؞ نغَمْ اٜ مٛ طٛنْ وَطَ دٛعَارٜ، 12 حَا مَا ندٜرْ کٛيْطٛلْ اٛ يِعِي نٜطّٛ بِعٜتٜىٰطٛ حَنَانِيَ نَتّٛيِي، يٛوِي جُوطٜ مُوطُمْ دٛوْ مَاکٛ نغَمْ اٛ وُمْتَ؞»‏

13 اَمَّا حَنَانِيَ وِعِمٛ، ‏«‏جٛومِرَاوٛ، مِ نَنِي يِمْٻٜ طُطْٻٜ کٛکِّي حَبَرُ نٜطّٛ اٛنْ، اٜ تٛرَّاجِ طُطِّ طِ اٛ تٛرِّ يِمْٻٜ مَاطَ وٛنْٻٜ اُرُشَلِيمَ؞ 14 اٛ وَرْدِي اٜ طٜرٜوٛلْ طٛعٛ دَغَ تٛ مَوْٻٜ اَرْدِيٻٜ دِينَ، نغَمْ اٛ نَنْغَ نٛدِّرَاٻٜ اِنْدٜ مَاطَ فُو؞»‏

15 اَمَّا جٛومِرَاوٛ وِعِمٛ، ‏«‏يَحُ نغَطَا کٛ مبِيمَامِ، نغَمْ مِ سُٻِيمٛ اٛ حُوَنَيَمْ، اٛ اَنْدِنَ اِنْدٜ اَمْ يٜىٰسٛ يِمْٻٜ نَاع يَحُودَنْکٛعٜنْ اٜ لَامِيٻٜ مَٻّٜ، اٜ اِسْرَاعِيلَنْکٛعٜنْ؞ 16 مِنْ اٜ حٛورٜ اَمْ مِ حٛلَّيْمٛ دٛولٜ اٛ تٛرّٜىٰ تٛرَّاجِ طُطِّ نغَمْ اِنْدٜ اَمْ؞»‏

17 ندٜنْ حَنَانِيَ يَحِ، نَتِّ وُرٛ نغٛ شَاوُلُ وٛنِ، يٛوِ جُوطٜ مُوطُمْ دٛوْ مَاکٛ، وِعِمٛ، ‏«‏بَنْدِرَاوٛ اَمْ شَاوُلُ، يٜىٰسُ جٛومِرَاوٛ وَنْغَنْطٛمَ دٛوْ لَاوٛلْ نغٛلْ نغَرْدُطَا، اٛ لِلٛيِييَمْ نغَمْ مبُمْتَا، کٜٻَا رُوحُ اَللَّه؞»‏ 18 طٛنْ اٜ طٛنْ، غٛطُّمْ بٛ کٛٻٜ مبُرْتِي ندٜرْ غِتٜ شَاوُلُ؞ اٛ وُمْتِ، اٛ اُمِّي، اٛ وَطَنَا بَڤْتِسْمَ؞ 19 سٜيْ اٛ ݧَامِ ݧَمْندُ، اٛ حٜٻِ سٜمْبٜ؞ دَغَ طٛنْ اٛ وَالِ بَلْطٜ سٜطَّ تٛ تٛکُّٻٜ يٜىٰسُ وٛنْٻٜ غَرِيرِ دِمَسْکُ ندِنْ؞

20 طٛنْ اٜ طٛنْ شَاوُلُ فُطِّ وَعَجِنْکِ حَبَرُ يٜىٰسُ ندٜرْ شُوطِ دٛعَارٜ؞ اٛ وِعِ غٛونغَ يٜىٰسُ وٛنِ ٻِطّٛ اَللَّه؞

21 طُمْ حَيْطِنِي نَنْٻٜمٛ فُو، ٻٜ مبِعِ، ‏«‏نَاع کَنْکٛ وٛنِ تٛرَّيْنٛوطٛ کٛولِيٻٜ يٜىٰسُ وٛنْٻٜ ندٜرْ غَرِيرِ اُرُشَلِيمَ؟ نَاع اٛ وَرٛيِ طٛعٛ نغَمْ اٛ حَٻَّٻٜ اٛ يَارَٻٜ تٛ مَوْٻٜ اَرْدِيٻٜ دِينَ؟»‏

22 اَمَّا شَاوُلُ ٻٜيْدِ سٜمْبُطُکِ ندٜرْ وَعَجِنْکِ، حَا طُمْ جِيٻِ حَکِّيلٛوجِ يَحُودَنْکٛعٜنْ جٛوطِيٻٜ دِمَسْکُ فُو، نغَمْ ٻٜ کٜٻَايِ کٛ ٻٜ مبِعِمٛ ندٜ اٛ تَبِّتِنَنِٻٜ يٜىٰسُ وٛنِ اَلْمَسِيحُ؞

23 سٜيْ غَطَ بَلْطٜ طُطّٜ، يَحُودَنْکٛعٜنْ ندَرْوِ دَبَرٜ نٛ مبَرْدَتَ شَاوُلُ؞ 24 شَاوُلُ بٛو اَنْدِتِ دَبَرٜ مَٻّٜ؞ جٜمَّ اٜ ݧَلَوْمَ فُو اٜ ٻٜ ندٜىٰنَ دَمُّطٜ غَرِيرِ نغَمْ ٻٜ کٜٻَ نٛ ٻٜ مبَرِرْتَمٛ؞ 25 اَمَّا حِغٛوٻٜ مَاکٛ کٛشِّمٛ جٜمَّ، نغَطِمٛ ندٜرْ سٛمْڤٛورٜ، ٻٜ نجِڤِّنِرِمٛ يٛلْندٜ مَادِ ڤِلِيندِ غَرِيرِ ندِنْ؞

26 ندٜ شَاوُلُ وَرْتِ اُرُشَلِيمَ اٛ يِطِي نَتُّکِ تٛکُّٻٜ يٜىٰسُ، اَمَّا ٻٜ فُو ٻٜ کُلِمٛ، ٻٜ نجَٻَايِ اٛ وَرْتِي تٛکُّطٛ يٜىٰسُ اٜ غٛونغَ؞ 27 اَمَّا بَرْنَبَ يَارِمٛ تٛ لِلَاٻٜ، طِيوِتِٻٜ نٛ شَاوُلُ يِعِرِ جٛومِرَاوٛ اٜ نٛ جٛومِرَاوٛ مٜتِرَنِمٛ دٛوْ لَاوٛلْ، اٜ نٛ اٛ وَعَجِنِرِ حَبَرُ يٜىٰسُ اٜ غَرِيرِ دِمَسْکُ کُلٛلْ وَلَا؞ 28 نغَمْ نٛنْ شَاوُلُ جٛوطٛدِي اٜ لِلَاٻٜ، اٜ مٛ يِيلٛدٛو اٜ مَٻّٜ ندٜرْ غَرِيرِ اُرُشَلِيمَ، اٜ مٛ اٜکِّتِنَ حَبَرُ جٛومِرَاوٛ اٜ ٻٜرْندٜ غٛعٛ، کُلٛلْ وَلَا؞ 29 اٜ مٛ وَعَجِنَنَ يَحُودَنْکٛعٜنْ مٜتٛوٻٜ حٜلٜنَنْکٛورٜ، اٜ مٛ يٜدّٛوتِرَ اٜ مَٻّٜ، اَمَّا کَمْٻٜ اٜ ٻٜ طَٻِّتَ نٛ ٻٜ مبَرْدَتَمٛ؞ 30 ندٜ تٛکُّٻٜ يٜىٰسُ نَنِ حَبَرُ طُمْ، ٻٜ نجَارِ شَاوُلُ غَرِيرِ کَيْسَارِيَ؞ ٻٜ نَتِّنِمٛ کٛمِوَلْ ٻٜ شٛعِّمٛ تَرْسُسْ غَرِيرِ مَاکٛ؞

31 غَطَ مَاجُمْ کَوْتَلْ تٛکُّٻٜ يٜىٰسُ ندٜرْ لٜيْطٜ يَحُودِيَ اٜ غَلِيلِ اٜ سَمَارِيَ فُو کٜٻِ جٛنْدٜ جَمْ؞ رُوحُ اَللَّه وَلِّٻٜ، ٻٜ شٜمْبِطِ، ٻٜ ٻٜيْدِ کُلٛلْ جٛومِرَاوٛ، ٻٜ طُوطِ؞

32 تٛو، ندٜ بِيتُرُسْ يِيلِي ندٜرْ لٜيْدِ ندِنْ فُو، سٜيْ جِڤِّي تٛ تٛکُّٻٜ يٜىٰسُ وٛنْٻٜ غَرِيرِ لِدَّ؞ 33 طٛنْ اٛ تَوِ غٛطّٛ ݧَوْطٛ بِعٜتٜىٰطٛ اِنِيَسْ مٛ ٻَنْدُ مُوطُمْ فُو وَاتِي؞ اٛ وَطِي دُوٻِ جٛوٜىٰتَتِ اٜ مٛ فُکِّي؞ 34 بِيتُرُسْ وِعِمٛ، ‏«‏اِنِيَسْ، يٜىٰسُ اَلْمَسِيحُ يَمْطِتِنِيمَ!‏ اُمَّ تَغُّ مبٜعِّتَارِ مَاطَ!‏»‏ طٛنْ اٜ طٛنْ اٛ اُمِّي؞ 35 ندٜ وٛنْٻٜ غَرِيرِ لِدَّ اٜ وٛنْٻٜ لٜيْدِ شَرٛنْ فُو نغِعِ کٛ وَطِ، ٻٜ تُوبِ ٻٜ تٛکِّ جٛومِرَاوٛ؞

36 ندٜرْ غَرِيرِ جٛفَّ بٛو اٜ وٛودِ غٛطّٛ دٜبّٛ تٛکُّطٛ يٜىٰسُ بِعٜتٜىٰطٛ تَبِيتَ؞ ﴿مَعَنَ تَبِيتَ ندٜرْ حٜلٜنَنْکٛورٜ وٛنِ دٛوکَسْ، وَاتٛ لٜلْوَ؞﴾اٜ مٛ حُوَ کُوطٜ بٛطّٜ، اٜ مٛ وَلَّ ٻٜ نغَلَنَا؞ 37 ندٜرْ بَلْطٜ طٜنْ اٛ ݧَوِ، اٛ مَايِ؞ ٻٜ لٛوتِمٛ، ٻٜ ڤُکِّنِمٛ ندٜرْ سُودُ دٛوْ؞ 38 غَرِيرِ جٛفَّ وٛطِّدَا اٜ غَرِيرِ لِدَّ؞ نغَمْ مَاجُمْ ندٜ تٛکُّٻٜ يٜىٰسُ نَنِ بِيتُرُسْ اٜ تٛنْ، ٻٜ لِلِ وٛرْٻٜ طِطٛ نجَحِ تٛرِيمٛ اٛ وَرَ تٛ مَٻّٜ جَوْطُمْ؞ 39 بِيتُرُسْ اُمِّي، يَادِ اٜ مَٻّٜ؞ ندٜ اٛ وَرِ، ٻٜ پٜنْتِنِمٛ سُودُ دٛوْ؞ رٜوْٻٜ ٻٜ وٛرْٻٜ مُعّٜنْ مَايِ فُو ٻَدِّيمٛ، ٻٜ ندَرِي اٜ ٻٜ مبٛيَ، اٜ ٻٜ کٛلَّمٛ تٛغّٛوجٜ اٜ غٛطّٜ کٛلْتٜ طٜ دٛوکَسْ ݧٛوتَنِٻٜ کٛ اٛ وٛنْدُنٛو اٜ مَٻّٜ؞ 40 سٜيْ بِيتُرُسْ وُرْتِنِ يِمْٻٜ فُو ندٜرْ سُودُ ندُنْ، اٛ دِشِّي اٛ وَطِ دٛعَارٜ؞ غَطَ مَاجُمْ اٛ وَيْلِتِي اٛ رَارِ ٻَنْدُ ندُنْ، اٛ وِعِ، ‏«‏تَبِيتَ، اُمَّ!‏»‏

سٜيْ تَبِيتَ فٜىٰرِ غِتٜ مُوطُمْ؞ ندٜ اٛ يِعِ بِيتُرُسْ بٛو، اٛ اُمِّي اٛ جٛوطِي؞ 41 سٜيْ بِيتُرُسْ نَنْغِ جُنْغٛ مَاکٛ، اُمِّنِمٛ؞ غَطَ مَاجُمْ اٛ نٛدِّ رٜوْٻٜ ٻٜ وٛرْٻٜ مُعّٜنْ مَايِ اٜ کٛولِيٻٜ يٜىٰسُ ٻٜنْ، اٛ حٛلِّٻٜ تَبِيتَ اٜ فٛوفَ؞ 42 حَبَرُ طُمْ نَنَامَ ندٜرْ غَرِيرِ جٛفَّ فُو، حَا طُطْٻٜ کٛولِي جٛومِرَاوٛ؞ 43 بِيتُرُسْ بٛو وَطِي بَلْطٜ طُطّٜ اٜ مٛ جٛوطِي ندٜرْ غَرِيرِ جٛفَّ تٛ وُرٛ ڤِيٛووٛ لَرٜ بِعٜتٜىٰطٛ سِيمَنْ؞