1 شَرٜلْ کٛ اَفٛولٛسْ وٛنِ غَرِيرِ کٛرِنْتِ، بُلُسْ تٛکِّ لَاوٛلْ پِوْرُنغٛلْ ندٜرْ کٛشّٜىٰجٜ، اٛ يَحِ اَافِسَ؞ تٛنْ اٛ تَوِ وٛٻّٜ تٛکُّٻٜ يٜىٰسُ؞ 2 اٛ پَمِٻٜ، اٛ وِعِ، ‏«‏کٛو اٛنْ کٜٻِي رُوحُ اَللَّه ندٜ نغَرْتُطٛنْ تٛکُّٻٜ يٜىٰسُ؟»‏

ٻٜ نٛوتِي، ٻٜ مبِعِمٛ، ‏«‏مِنْ مٜىٰطَايِ نَنُکِ حَبَرُ رُوحُ اَللَّه؞»‏

3 اٛ وِعِٻٜ، ‏«‏اِرِ طُمٜ بَڤْتِسْمَ نغَطَنَاطٛنْ؟»‏

ٻٜ مبِعِ، ‏«‏بَڤْتِسْمَ يَحَيَ؞»‏

4 بُلُسْ وِعِ، ‏«‏يَحَيَ وَطِي بَڤْتِسْمَ تُوبُکِ؞ اٜ مٛ وِعَ يِمْٻٜ کٛولٛو غٛطّٛ غَرَيْطٛ غَطَ مَاکٛ، وَاتٛ يٜىٰسُ؞»‏

5 ندٜ ٻٜ نَنِ نٛنْ، ٻٜ نغَطَنَا بَڤْتِسْمَ ندٜرْ اِنْدٜ يٜىٰسُ جٛومِرَاوٛ؞ 6 ندٜ بُلُسْ يٛوِ جُوطٜ مُوطُمْ دٛوْ مَٻّٜ، رُوحُ اَللَّه جِڤّٛيِي دٛوْ مَٻّٜ، ٻٜ مٜتِ ندٜرْ طٜمْطٜ طٜ ٻٜ اَنْدَا، ٻٜ ڤُطِّ وَعَجِنْکِ؞ 7 طُطْکِ مَٻّٜ وَطِي يِمْٻٜ سَڤّٛ اٜ طِطٛ؞

8 بُلُسْ وَطِ لٜبِّ تَتِ اٜ مٛ وَعَجِنَنَ يَحُودَنْکٛعٜنْ ندٜرْ سُودُ دٛعَارٜ اٜ سٜمْبٜ مَاکٛ فُو، کُلٛلْ وَلَا؞ اٜ مٛ مٜدَّ اٜ مَٻّٜ، اٜ مٛ فٛوطَ حَکِّيلٛ مَٻّٜ حَا اٛ اَنْدِنِٻٜ حَبَرُ لَامُ اَللَّه؞ 9 اَمَّا ندٜرْ مَٻّٜ اٜ وٛودِ ٻٜ کٛعٜ جٛرْطٜ؞ ٻٜ نغَݧِ حٛولَاکِ يٜىٰسُ، ٻٜ مٜتِ حَالَ کَلُّکَ دٛوْ لَاوٛلْ يٜىٰسُ يٜىٰسٛ يِمْٻٜ فُو؞ نغَمْ مَاجُمْ بُلُسْ سٜنْدِرِ اٜ مَٻّٜ، اٛ حٛشِّ تٛکُّٻٜ يٜىٰسُ؞ کٛو ندٜيٜ ݧَلْندٜ اٜ مٛ اٜکِّتِنَ ندٜرْ سُودُ جَنْغِرْدٜ تِرَانُسْ؞ 10 اٛ وَطِ کَ وَطُکِ نٛنْ دُوٻِ طِطِ حَا يَحُودَنْکٛعٜنْ اٜ لٜپِّ اَاسِيَ فُو نَنِ حَالَ جٛومِرَاوٛ؞

11 اَللَّه وَطِ کُوطٜ کَيْطِنِيطٜ مَوْطٜ دَغَ جُوطٜ بُلُسْ طٜ طُمْ مٜىٰطَايِ يِعُکِ؞ 12 حَا مَا لٜفٛيْ اٜ کٛلْتٜ مٜىٰمُطٜ ٻَنْدُ مَاکٛ فُو اٜ نجَارَنٜىٰ ݧَوْٻٜ، اٜ ٻٜ نجَمْطِتَ، غِنِّ مَا مبُرْتٛو ندٜرْ مَٻّٜ؞ 13 تٛو، اٜ وٛودِ وٛٻّٜ يَحُودَنْکٛعٜنْ يِيلٛتٛوٻٜ نغَمْ وُرْتِنَنْکِ غِنَّاٻٜ غِنِّ؞ وٛٻّٜ مَٻّٜ ڤٛوندِي حُوتِرْکِ اِنْدٜ يٜىٰسُ جٛومِرَاوٛ، اٜ ٻٜ مبِعَ غِنِّ طِنْ، ‏«‏ندٜرْ اِنْدٜ يٜىٰسُ مٛ بُلُسْ وَعَجِنْتَ اٜ مِنْ مبِعَعٛنْ مبُرْتٜىٰ!‏»‏ 14 ٻِٻّٜ غٛطّٛ مَوْطٛ اَرْدِيٻٜ دِينَ يَحُودَنْکٛعٜنْ بِعٜتٜىٰطٛ سِيبَ کَمْٻٜ نجٛوٜىٰطِطٛ اٜ نغَطَ نٛنْ؞

15 اَمَّا غِنّٛلْ نغٛلْ وِعِٻٜ، ‏«‏اٜ مِ اَنْدِ يٜىٰسُ، اٜ مِ اَنْدِ بُلُسْ، اَمَّا اٛنٛنْ، اٛنْ ٻٜيٜ؟»‏

16 غِنَّاطٛ اٛنْ يَنَنِٻٜ، نَوْنِٻٜ، جَالِيٻٜ حَا ٻٜ مبُرْتِي وُرٛ نغٛنْ، اٜ ٻٜ ندٛغَّ ٻٜ ٻٛرْنَاکِ ٻٜ فُو ٻٜ نَوْنٛوطٜ؞ 17 حَبَرُ مَاجُمْ سَنْکِتِي ندٜرْ يَحُودَنْکٛعٜنْ اٜ يِمْٻٜ نَاع يَحُودَنْکٛعٜنْ جٛوطِيٻٜ ندٜرْ غَرِيرِ اَافِسَ؞ کُلٛلْ نَنْغِٻٜ، ٻٜ فُو؞ اِنْدٜ يٜىٰسُ بٛو حٜٻِي مَوْنِنٜىٰکِ؞ 18 يِمْٻٜ طُطْٻٜ غَرْتُٻٜ تٛکُّٻٜ يٜىٰسُ نغَرِ مبِعِ اٜ نجَيْرِ فُو کُوطٜ کَلُّطٜ طٜ ٻٜ کُوُنٛو؞ 19 دَرْنٛوٻٜ طُطْٻٜ کَوْرِتِ طٜرٜىٰجِ مَٻّٜ، ٻٜ نغُلِطِ يٜىٰسٛ يِمْٻٜ؞ ندٜ ٻٜ لِمِ شٜىٰدٜ مَاجِ، طٜ نجَارِي شٜىٰدٜ اَجُرْفَارِ 50,000؞ 20 نٛنْ حَبَرُ يٜىٰسُ ٻٜيْدِ سَنْکِتٛرَاکِ کٛو تٛيٜ؞

21 غَطَ فِي طُمْ طٛنْ فُو، بُلُسْ سُٻِ تٛکَّ لَاوٛلْ لٜيْطٜ مَکِدٛونِيَ اٜ اَکَايَ يَاکِ اُرُشَلِيمَ؞ اٛ وِعِ، ‏«‏غَطَ مِ يَحِي تٛنْ، دٛولٜ مِ يَحَ غَرِيرِ رٛومَ مَا؞»‏ 22 سٜيْ اٛ لِلِ وَلَّيْٻٜمٛ طِطٛ، تِمٛوتِ اٜ اٜرَسْتُسْ، ٻٜ نجَحَ لٜيْدِ مَکِدٛونِيَ؞ کَنْکٛ بٛو اٛ وَالِ بَلْطٜ ندٜرْ لٜيْدِ اَاسِيَ؞

23 اٜ شَرٜلْ نغٜلْ حَوْرٜ مَوْندٜ اُمِّي ندٜرْ اَافِسَ دٛوْ لَاوٛلْ جٛومِرَاوٛ نغٛلْ بُلُسْ اٜکِّتِنْتَ؞ 24 اٜ وٛودِ غٛطّٛ بَعِلّٛ اَجُرْفَارِ بِعٜتٜىٰطٛ دِمِتِيرِيُسْ؞ اٜ مٛ وَطَ شُوطِ ڤَمَرِ طِ مَوْنِنْکِ اَلَّح مَٻّٜ طِ اَجُرْفَارِ نَنْدُطِ اٜ شُوطِ غُنْکِ مَٻّٜ دٜبُمْ بِعٜتٜىٰطُمْ اَرْتٜمِسْ؞ نَاع شٜىٰدٜ سٜطَّ اٛ حٜٻَنْتَٻٜ، کَنْکٛ اٜ ٻٜ اٛ حُودَتَ؞ 25 سٜيْ اٛ حَوْرِتِ ٻٜ اٛ حُودَتَ ٻٜنْ اٜ وٛٻّٜ غَطٛوٻٜ اِرِ کُوغَلْ نغَلْ، اٛ وِعِٻٜ، ‏«‏بَنْدِرَاٻٜ اَمْ، اٛنْ اَنْدِ کُوغَلْ نغَعَلْ اٜ وَدَّنَعٜنْ شٜىٰدٜ طُطّٜ؞ 26 کَدِمَا اٛنْ نَنِي، اٛنْ نغِعِي کٛ بُلُسْ وَطَتَ؞ اٜ مٛ سٜلْنَ يِمْٻٜ طُطْٻٜ، نَاع طٛعٛ ندٜرْ غَرِيرِ اَافِسَ تَنْ، اَمَّا حَا ندٜرْ لٜيْدِ اَاسِيَ فُو؞ اٜ مٛ وِعَٻٜ اَلَّاجِ طِ يِمْٻٜ نغَطِ اٜ جُوطٜ مَٻّٜ، نَاع طِ غٛونغَاجِ؞ 27 تٛ اٜنْ اَلْدِيمٛ نٛنْ، يِمْٻٜ مبٛنَّيْ اِنْدٜ کُوغَلْ مٜىٰطٜنْ؞ نَاع کَنْجُمْ تَنْ، طٛنْمَا ٻٜ مبٛنَّيْ اِنْدٜ سُودُ مَوْنِنْکِ اَلَّح مٜىٰطٜنْ اَرْتٜمِسْ مَوْطٛ؞ ندٜنْ ٻٜ اَلَيْ تٜدِّنْکِمٛ، کَنْکٛ مٛ جٛوطِيٻٜ لٜيْدِ اَاسِيَ اٜ دُونِيَارُ ندُعُ فُو مَوْنِنْتَ؞»‏

28 ندٜ ٻٜ نَنِ نٛنْ، ٻٜرْطٜ مَٻّٜ مٜتِّ، ٻٜ نغُلِّ، اٜ ٻٜ مبِعَ، ‏«‏اَرْتٜمِسْ مٛ اَافِسَ کَنْکٛ وٛنِ مَوْطٛ!‏»‏ 29 حَکِّيلٛ يِمْٻٜ غَرِيرِ ندِنْ فُو اُمِّي، ٻٜ نجَحِ ٻٜ نَنْغِ غَايُسْ اٜ اَرِسْتَرْکُسْ، يِمْٻٜ مَکِدٛونِيَ، جَادٛوٻٜ اٜ بُلُسْ؞ ٻٜ ندَسِٻٜ، ٻٜ نجَارِٻٜ نجَيْرِ تٛ يِمْٻٜ غَرِيرِ کَوْرِتَتَ؞ 30 بُلُسْ اٜ يِطِ نَتُّکِ ندٜرْ مٛٻْتٛرْدٜ ندٜنْ، اَمَّا تٛکُّٻٜ يٜىٰسُ کَطِمٛ؞ 31 حَا اٜ وٛٻّٜ ندٜرْ مَوْٻٜ لٜيْدِ اَاسِيَ، حِغٛوٻٜ مَاکٛ، لِلٛنٛيِمٛ تٛرِيمٛ تٛع اٛ نَتَّ وِغٜىٰرٜ ندٜنْ؞ 32 اٜ شَرٜلْ نغٜلْ، حَکِّيلٛ حَوْرُتُٻٜ فُو جِيٻَکٜ؞ کٛو مٛيٜ اٜ کَ وِعَتَ، نغَمْ طُطْٻٜ ندٜرْ مَٻّٜ اَنْدَا کٛ حَوْرِتِٻٜ؞ 33 يَحُودَنْکٛعٜنْ نغَرْتِرِ اَلِجَنْدَ مٜتٛووٛ نغَمْ مَٻّٜ؞ وٛٻّٜ ندٜرْ حَوْرُتُٻٜ ٻٜنْ مبِعِمٛ اٛ مٜتَ؞ سٜيْ اَلِجَنْدَ پٜفْتِ جُنْغٛ نغَمْ ٻٜ ندٜعِّتَ اٛ مٜتَنَٻٜ؞ 34 اَمَّا ندٜ ٻٜ اَنْدِتِ اٛ يَحُودَنْکٜىٰجٛ، ٻٜ نغَطِ اَوَاجِ طِطِ اٜ ٻٜ مبِعَ اٜ سٜمْبٜ، ‏«‏اَرْتٜمِسْ مٛ اَافِسَ کَنْکٛ وٛنِ مَوْطٛ!‏»‏

35 اَمَّا ندٜ بِنْدٛووٛ غَرِيرِ ندِنْ دٜعِّتِنِٻٜ، اٛ وِعِٻٜ، ‏«‏اٛنٛنْ اَافِسَنْکٛعٜنْ، کٛو مٛيٜ اٜ اَنْدِ طٛعٛ اَافِسَ وٛنِ تٛ طُمْ رٜىٰنَتَ سُودُ مَوْنِنْکِ اَرْتٜمِسْ مَوْطٛ اٜ حَيْرٜ مَاکٛ جَنٛيْندٜ دَغَ دٛوْ؞ 36 وَلَا بَاوَيْطٛ يٜدُّکِطُمْ؞ نغَمْ نٛنْ اٜ حَانِ ڤُکِّنٛنْ ٻٜرْطٜ مٛوطٛنْ، ڤَامٜىٰ اٜ کٛ نغَطٛتٛنْ؞ 37 يِمْٻٜ ٻٜ نغَدُّطٛنْ طٛعٛ ٻٜ نغُجَّايِ کٛو طُمٜ ندٜرْ سُودُ دٛعَارٜ، ٻٜ کُطَايِ اَلَّح مٜىٰطٜنْ؞ 38 تٛ دِمِتِيرِيُسْ اٜ ٻٜ اٛ حُودَتَ اٜ نغِطِ وُلَّاکِ غٛطّٛ، سُودُ کِيتَ اٜ مَٻِّتِي، اٜ وٛودِ غَطٛوٻٜ کِيتَ، سٜيْ ٻٜ نغُلّٛيٛو تٛنْ!‏ 39 تٛ بٛو اٜ وٛودِ غٛطُّمْ کٛ نغِطّٛنْ ٻُرْطُمْ نٛنْ، سٜيْ نجَارٛنْطُمْ تٛ مَوْٻٜ غَرِيرِ طُمْ مٛعِّنٜىٰ؞ 40 حَنْدٜ اٜنْ ندٜرْ شَطُّمْ، طُمْ وُلّٛرْتٛعٜنْ اُمِّنْکِ حَکِّيلٛ؞ وَلَا بٛو کٛ کٜٻٜتٜنْ مبِعٜنْ دٛوْ حَوْرٜ اُمِّيندٜ حَنْدٜ؞ اٜنْ مبَاوَتَا کٛکّٜنْ شٜيْدَ غٜىٰتُمْ اُمِّنْطُمْ حَوْرٜ ندٜنْ؞»‏ 41 ندٜ اٛ وِعِ نٛنْ، اٛ وِعِ يِمْٻٜ ٻٜنْ شَنْکِتٛو؞