1 ندٜنّٛ اٛنْ نَنْدِي اٜ يِمْٻٜ مَيْٻٜ، نغَمْ حَکّٜىٰجِ مٛوطٛنْ اٜ وَݧُکِ کٛ اَللَّه وِعِ؞ 2 اٜ شَرٜلْ نغٜلْ اٛنْ تٛکَّ طَتٜ دُونِيَارُ کَلُّطٜ؛ اٛنْ تٛکَّ شٜيْطَنْ لَامِيطٛ غِنِّ؞ کَنْکٛ وٛنِ تٛکِّنٛووٛ ٻٜرْطٜ غَݧُٻٜ تٛکَّ کٛ اَللَّه وِعِ؞ 3 غٛونغَ، نٛنْ نغِکُّ مٜىٰطٜنْ وَعُنٛو:‏ اٜنْ نغَطَ کٛ نغِطّٜنْ، اٜنْ تٛکَّ کٛ ٻَلِّ مٜىٰطٜنْ اٜ ٻٜرْطٜ مٜىٰطٜنْ نغِطِ؞ اٜنْ دَݧِرَامَ نغِکُّ کَلُّطُمْ بٛ حٛرِيٻٜ ندٜرْ دُونِيَارُ، مٛنّٜرٜ اَللَّه بٛو اٜ دٛوْ مٜىٰطٜنْ؞ 4 اَمَّا اَللَّه اٛ کٜوْطٛ يُرْمٜىٰندٜ؞ يِدّٜ ندٜ اٛ يِطِعٜنْ ندٜ مَوْندٜ؞ 5 کٛو ندٜ اٜنْ نَنْدِ اٜ مَيْٻٜ نغَمْ حَکّٜ مٜىٰطٜنْ، اٛ حٛکِّيعٜنْ يٛنْکِ ندٜرْ اَلْمَسِيحُ؞ يِدّٜ مَاکٛ وَطِ کِسُطٜنْ؞ 6 اٛ اُمِّدِنِيعٜنْ اٜ يٜىٰسُ اَلْمَسِيحُ دَغَ مَيْدٜ، اٛ جٛوطِدِنِعٜنْ اٜ مَاکٛ تٛنْ دٛوْ؞ 7 اَللَّه وَطِي طُعُمْ نغَمْ اٜ جَامَنُوجِ غَرَيْطِ اٛ حٛلَّ يِدّٜ مَاکٛ ندٜ وَلَا کٜىٰرٛلْ نغَمْ کٛ يٜىٰسُ اَلْمَسِيحُ وَطِ؞ 8 اٛنْ کِسِي نغَمْ يِدّٜ اَللَّه بَرْکَ حٛولَاکِ يٜىٰسُ؞ نَاع اٛنْ کِسُ نغَمْ غٛطُّمْ طُمْ نغَطّٛنْ، اَمَّا طُمْ شَاحُ اَللَّه، 9 نَاع نغَمْ کُوطٜ مٛوطٛنْ، نغَمْ تٛع غٛطّٛ مَوْنِنَ حٛورٜ مُوطُمْ؞ 10 اَللَّه وَرْتِرِيعٜنْ کٛ نغٛنْطٜنْ جٛونِ، بَرْکَ يٜىٰسُ اَلْمَسِيحُ اٛ تَغِتَکٜعٜنْ نغَمْ کُوٜنْ کُوطٜ بٛطّٜ طٜ اٛ يِطِ نغَطٜنْ دَغَ اَرَنْدٜ؞

11 نغَمْ مَاجُمْ، شِفْتٛرٜىٰ نٛ مبَانٛوطٛنْ؞ اٛنٛنْ نَاع اٛنْ يَحُودَنْکٛعٜنْ دَغَ دَݧْنغٛلْ، کَمْٻٜ نٛدِّرٛوٻٜ کٛعٜ مَٻّٜ ‏«‏نَادَاٻٜ،»‏ اٜ ٻٜ نٛدِّرَعٛنْ ‏«‏ٻٜ نَادَاکَ؞»‏ رَا بٛو نَادُکِ کِنْ طُمْ کِ ٻَنْدُ تَنْ، کِ طُمْ وَارَتَ جُوطٜ؞ 12 شِفْتٛرٜىٰ اٜ نغٜلْ تٛنْ شَرٜلْ اٛنْ اَنْدَانٛ اَلْمَسِيحُ، اٛنْ نغَلَا ندٜرْ يِمْٻٜ ٻٜ اَللَّه سُٻِ، اٛنْ نغَلَا ندٜرْ اَلْکَوَلْ نغَلْ اَللَّه وَطِ، اٛنْ نغَلَا کَمُّندٜ، اٛنْ نغَلَا اَللَّه ندٜرْ دُونِيَارُ؞ 13 اَمَّا جٛونِ اٛنٛنْ غٛطِّتِيٻٜ اَللَّه ندٜنّٛ، بَرْکَ پِيپَمْ يٜىٰسُ اَلْمَسِيحُ اٛنْ نغَدَّامَ حَادٜ مَاکٛ؞ 14 يٜىٰسُ سِرْيٛوتِرِي حَکُّندٜ يَحُودَنْکٛعٜنْ اٜ يِمْٻٜ نَاع يَحُودَنْکٛعٜنْ، اٛ وَرْتِرِيٻٜ غٛعٛ؞ اٛ اِتِّي نغَݧَاندِ شٜنْدُندِٻٜ؞ 15 مَيْدٜ مَاکٛ اِتِّي سٜمْبٜ اَتَّوْرَ اٜ دٛوکَاجِ يَحُودَنْکٛعٜنْ، نغَمْ ندٜرْ لٜݧِ طِطِ اٛ وُرْتِنَنَ حٛورٜ مَاکٛ لٜݧٛلْ غٛعٛ کٜسٛلْ؞ ندٜ اٛ وَطِ نٛنْ اٛ سِرْيٛوتِرِي لٜݧِ طِنْ؞ 16 بَرْکَ مَيْدٜ مَاکٛ دٛوْ غَافَانغَلْ، اٛ اِتِّي نغَݧَاندِ نغٛنْدِ حَکُّندٜ مَاجِ؞ مَيْدٜ مَاکٛ حَوْتِي کٛعٜ لٜݧِ طِنْ نغَرْتِي غٛعٛ؞ اٛ سٛعِّيطِ تٛ اَللَّه؞ 17 يٜىٰسُ وَرِي وَعَجِنَنِيعٛنْ حَبَرُ بٜلْطُمْ طُمْ جَمْ، اٛنٛنْ يِمْٻٜ نَاع يَحُودَنْکٛعٜنْ غٛطِّتِيٻٜ اَللَّه اٜ يَحُودَنْکٛعٜنْ غٛنْٻٜ حَادٜ مَاکٛ؞ 18 جٛونِ، بَرْکَ اَلْمَسِيحُ اٜنْ فُو، يَحُودَنْکٛعٜنْ اٜ نَاع يَحُودَنْکٛعٜنْ، اٜنْ مبَاوَيْ نجَحٜنْ تٛ ݧَاکٛ مٜىٰطٜنْ مٛ دٛوْ ندٜرْ لَاوٛلْ غٛعٛ، وَاتٛ رُوحُ اَللَّه؞

19 نغَمْ مَاجُمْ، اٛنٛنْ يِمْٻٜ نَاع يَحُودَنْکٛعٜنْ، نَاع اٛنْ حٛٻّٜ کٛو غَرْٻٜ؞ جٛونِ اٛنْ ندٜرْ لٜݧٛلْ يِمْٻٜ اَللَّه اٜ اِيَالُ مَاکٛ؞ 20 اٛنْ مَحَامَ دٛوْ فُطّٛودٜ مَادِ ندِ لِلَاٻٜ اٜ اَنَّبٛعٜنْ مَحِ، ندٜنْ يٜىٰسُ اَلْمَسِيحُ اٜ حٛورٜ مُوطُمْ وٛنِ حَيْرٜ دَرْنُندٜ مَادِ ندِنْ؞ 21 کَنْکٛ جٛغِي مَادِ ندِنْ اٛ مَوْنِنِندِ ندِ وَرْتِ وُرٛ شٜنِينغٛ نغٛ جٛومِرَاوٛ؞ 22 ندٜرْ سُمْڤٛ مٛوطٛنْ اٜ مَاکٛ، اٛنٛنْ مَا اٛنْ مَحِدَامَ اٜ فُو تٛکُّٻٜ يٜىٰسُ نغَمْ نغَرْتٛنْ وِغٜىٰرٜ تٛ رُوحُ اَللَّه جٛوطٛتٛو؞