1 بَنْدِرَاٻٜ اَمْ، ندٜ اٛنْ کٛولِي جٛومِرَاوٛ مٜىٰطٜنْ يٜىٰسُ اَلْمَسِيحُ، جٛومُ مَنْغُ، تٛع اٛنْ کٛلُّ فٜىٰرٛوتِرٛلْ حَکُّندٜ مٛوطٛنْ؞ 2 مِسَالُ، غٛطّٛ غٛودُطٛ جَبَّارٜ جِينَارِ وَرِي کَوْتَلْ مٛوطٛنْ اٜ مٛ ٻٛرْنِي کٛلْتٜ طٜ شٜىٰدٜ، ندٜنْ غٛطّٛ مٛ وَلَنَا مٛ کٛلْتٜ شٜىٰکُطٜ کَنُمْ مَا وَرِي ندٜرْ کَوْتَلْ نغَلْ؞ 3 تٛ اٛنْ کٛکِّي اٛنْ طٛنْ غٛودُطٛ رِسْکُ مَنْغُ اٛنْ مبِعِيمٛ، ‏«‏رَا جٛوطٛرْغَلْ بٛنْغَلْ، جٛوطَ،»‏ مٛ وَلَنَا اٛنْ بٛو مبِيطٛنْمٛ، ‏«‏دَرَ طَاعٜ،»‏ کٛو بٛو، ‏«‏جٛوطَ اٜ لٜيْدِ،»‏ 4 اٛنْ کٛلِّي فٜىٰرٛوتِرٛلْ حَکُّندٜ مٛوطٛنْ وٛنْ طٛنْ، اٛنْ شُٻَنَ کٛعٜ مٛوطٛنْ کٛ نغَطٛتٛنْ ندٜرْ ݧُمٛ کَلُّنغٛ؞ 5 بَنْدِرَاٻٜ اَمْ ٻٜ نغِطُمِ، نَنٜىٰ کٛ مبِعَيْمِ؞ نَاع اَللَّه سُٻِي ٻٜ نغَلَنَا ندٜرْ دُونِيَارُ ندُعُ ٻٜ نغَرْتَ کٛولِيٻٜ يٜىٰسُ ٻٜ ندٛنَ بَرْکَ غٛنْطُمْ ندٜرْ لَامُ اَللَّه طُمْ اٛ وَطَنِ يِطُٻٜمٛ اَلْکَوَلْ؟ 6 اَمَّا اٛنْ نغَرْتِرَ ٻٜ نغَلَنَا نَاع طُمْ غٛطُّمْ؞ نَاع غٛودُٻٜ رِسْکُ تٛرَّتَعٛنْ؟ نَاع طُمْ کَمْٻٜ نجَارَتَعٛنْ يٜىٰسٛ لَامُ؟ 7 نَاع طُمْ کَمْٻٜ کُطَتَ اِنْدٜ ندٜنْ طٛنْ مَوْندٜ ندٜ جٛومِرَاوٛ مٛوطٛنْ؟

8 اٛنْ نغَطِي کٛ وٛوطِ تٛ اٛنْ تٛکِّي دٛوکَ طُمْ لَامُ اَللَّه بِنْدَاطُمْ ندٜرْ اَايَارٜ بِيندٜ، ‏«‏يِطُ بَنْدِرَاوٛ مَاطَ نٛ نغِطِرْطَا حٛورٜ مَاطَ؞»‏ 9 اَمَّا تٛ اٛنْ کٛلَّ فٜىٰرٛوتِرٛلْ حَکُّندٜ مٛوطٛنْ، اٛنْ نغَطِي حَکّٜ؞ کِيتَ نَنْغِيعٛنْ، نغَمْ اٛنْ غٜوٛوٻٜ دٛوکَ؞ 10 نغَمْ فُو تٛکُّطٛ دٛوکَاجِ طِ فُو، اَمَّا اٛ يٜوِ غٛعٛ، تٛو، اٛ يٜوِيطِ طِ فُو؞ 11 نغَمْ اٛنْ طٛنْ بِيطٛ، ‏«‏تَاع وَطُ نجٜىٰنُ،»‏ کَنْکٛ وِعِ، ‏«‏تَاع وَطُ وَرْحٛورٜ؞»‏ تَا وَطَايِ نجٜىٰنُ، اَمَّا اَ وَطِي وَرْحٛورٜ، تٛو، اَ وَرْتِي غٜوٛووٛ دٛوکَ اَللَّه وٛنْ طٛنْ؞ 12 اَلٜىٰ مٜتٛ مٛوطٛنْ اٜ کُوطٜ مٛوطٛنْ وَرْتَ بٛ طُمْ يِمْٻٜ ٻٜ طُمْ وَطَنْتَ کِيتَ دٛوْ دٛوکَ رِمْطِنٛوجُمْ؞ 13 نغَمْ اٜ ݧَلْندٜ کِيتَ، اَللَّه يُرْمِنَنْتَا مٛ وَلَا يُرْمٜىٰندٜ؞ اَمَّا يُرْمٜىٰندٜ اٜ حٜٻَ جَالٛرْغَلْ دٛوْ کِيتَ؞

14 اٛنٛنْ بَنْدِرَاٻٜ اَمْ، کٛ طُمْ نَفِ تٛ نٜطّٛ وِعِي اٜ حٛولِي يٜىٰسُ، اَمَّا کُوطٜ مَاکٛ کٛلَّايِ حٛولَارٜ ندٜنْ؟ ندٜنْ طٛنْ حٛولَارٜ مَاکٛ ندٜ وَاوَيْ حِسْنُکِمٛ؟ 15 مِسَالُ، تٛ غٛطّٛ تٛکُّطٛ يٜىٰسُ غٛرْکٛ کٛو دٜبّٛ مٛ وَلَا کٛ ٻٛرْنٛتٛو کٛو کٛ ݧَامَتَ، 16 غٛطّٛ مٛوطٛنْ وِعِيمٛ، ‏«‏جِڤَّ جَمْ!‏ اَللَّه حٛکُّمَا کٛ ٻٛرْنٛتٛطَا اٜ کٛ ݧَامَتَا،»‏ اَمَّا اٛ حٛکَّايِمٛ کٛلْتٜ کٛو ݧَمْندُ، طُمٜ طُمْ نَفِ؟ 17 نٛنْ مَا حٛولَارٜ، تٛ ندٜ وَلَا کُوطٜ کٛلَّيْطٜندٜ، ندٜ وَرْتِي وَاتُندٜ؞

18 اَمَّا غٛطّٛ وِعَيْ، ‏«‏اَنْ اَ وٛودِ حٛولَارٜ، مِنْ اٜ مِ وٛودِ کُوطٜ؞»‏ تٛو، حٛلَّمْ حٛولَارٜ مَاطَ ندٜ وَلَا کُوطٜ؞ مِنْ بٛو، مِ حٛلّٜتٜ حٛولَارٜ اَمْ ندٜرْ کُوطٜ اَمْ؞ 19 اَ جَٻِي اَللَّه اٛ غٛعٛتٛ؞ تٛو، بٛطُّمْ!‏ کٛو غِنِّ مَا نجَٻِي نٛنْ؞ کَنْجُمْ وَطِ اٜ طِ ندِوْنَ نغَمْ کُلٛلْ؞ 20 اَنْ کَاݝَاطٛ!‏ اَ يِطِ طُمْ حٛلُّمَا حٛولَارٜ ندٜ وَلَا کُوطٜ ندٜ مٜىٰرٜ؟ 21 نَاع مَامَ مٜىٰطٜنْ اِبْرَاهِمْ نٛدِّرَامَ اَادِلِيجٛ نغَمْ کٛ اٛ وَطِ ندٜ اٛ حٛکِّ اَللَّه ٻِطّٛ مَاکٛ اِشِيَاکُ دٛوْ سَکِّرْدٜ؟ 22 تٛو، اَ يِعِي حٛولَارٜ مَاکٛ اٜ يَادَ اٜ کُوطٜ مَاکٛ؞ ندٜنْ حٛولَارٜ مَاکٛ وَرْتِي کٜوْندٜ نغَمْ کٛ اٛ وَطِ؞ 23 طُمْ حٜبِّنِي اَايَارٜ بِيندٜ، ‏«‏اِبْرَاهِمْ حٛولَکٜ اَللَّه، نغَمْ مَاجُمْ اَللَّه وِعِ اٛ اَادِلِيجٛ؞»‏ طٛنْمَا طُمْ نٛدِّمٛ حِغٛ اَللَّه؞ 24 تٛو، اٛنْ نغِعِي اَللَّه اٜ جَٻَ نٜطّٛ اٛ اَادِلِيجٛ نغَمْ کٛ اٛ وَطِ، نَاع نغَمْ حٛولَارٜ تَنْ؞

25 نٛنْ مَا، کَارُوَاجٛ اٛنْ طٛنْ بِعٜتٜىٰطٛ رَحَبْ، اٛ نٛدِّرَامَ اَادِلِيجٛ نغَمْ کٛ اٛ وَطِ ندٜ اٛ جَٻِّي ٻٜ طُمْ لِلٛيِ نغَمْ ندَارَ سِرُّ لٜيْدِ ندِنْ؞ اٛ وَلِّٻٜ ٻٜ ندَطِرِ وٛنْغٛلْ لَاوٛلْ فٜىٰرٜ؞

26 تٛو، نٛنْ نٛ ٻَنْدُ ندُ وَلَا فٛوفَانغٛ وَرْتِي مَيْندُ، نٛنْ مَا حٛولَارٜ ندٜ وَلَا کُوطٜ وَرْتِي بَاتُندٜ؞