1 جٛونِ بٛو، اٛنٛنْ رِسْکُٻٜ، نَنٜىٰ کٛ مبِعَيْمِ!‏ مبٛيٜىٰ، نغُلّٜىٰ نغَمْ بٛنٜ کَلُّطُمْ غَرٛوَيْطُمْ دٛوْ مٛوطٛنْ؞ 2 رِسْکُ مٛوطٛنْ ݧٛلِي، مٛوپِ ݧَامِي کٛلْتٜ مٛوطٛنْ؞ 3 جِينَارِ مٛوطٛنْ اٜ اَجُرْفَارِ مٛوطٛنْ فُونِي، فُونُکِ مَيْرِ بٛو وَرْتَيْ شٜيْدَ دٛوْ مٛوطٛنْ طُمْ ݧَامَيْ ٻَلِّ مٛوطٛنْ بٛ حِيتٜ؞ اٛنْ مٛٻْتَنِي کٛعٜ مٛوطٛنْ جَوْدِ ندٜرْ بَلْطٜ طٜعٜ طٜ رٜعُکِ دُونِيَارُ؞ 4 رَطُّمْ!‏ نجٛٻَارِ ندِ نغَݧُطٛنْ يٛٻُکِ کُوَنٛوٻٜعٛنْ تٛ غٜسٜ ندِ وُلّٛيَکٜعٛنْ؞ بٛجِّ اِتَّنٛوٻٜعٛنْ کٛ ٻٜنْدِ تٛ غٜسٜ نجَارِي تٛ جٛومِرَاوٛ جٛومُ بَوْطٜ؞ 5 اٛنْ نغَطِي جٛنْدٜ نَنْکِ بٜلْطُمْ اٜ دُونِيَارُ، اٛنْ ݧَامَ، اٛنْ نجَرَ، اٛنْ نغَطَ نٛ نغِطّٛنْ؞ اٛنْ ڤَيْنِي کٛعٜ مٛوطٛنْ نغَمْ ݧَلْندٜ حِرْسُکِ؞ 6 اٛنْ تَپَنِي اَادِلِعٜنْ کِيتَ کَلُّکَ، اٛنْ مبَرِيٻٜ، کَمْٻٜ بٛو ٻٜ نغٜدَّايِعٛنْ؞

7 نغَمْ نٛنْ، بَنْدِرَاٻٜ اَمْ، نغَطٜىٰ مُݧَلْ حَا يَاکِ ݧَلْندٜ ندٜ جٛومِرَاوٛ وَرْتَتَ؞ ندَارٜىٰ نٛ دٜمٛووٛ مُݧِرْتَ نغَمْ ندِيَمْ سٜىٰتٛ اٜ طَمْ پَاوٛلْ ٻٜنْدِنَ فِي بٛطُّمْ طُمْ اٛ رٜمِ؞ 8 اٛنٛنْ مَا، مُݧٜىٰ؞ شٜمْبِطِنٜىٰ ٻٜرْطٜ مٛوطٛنْ، نغَمْ وَرْتٛيْکِ جٛومِرَاوٛ ٻَدَکٜ؞ 9 بَنْدِرَاٻٜ اَمْ، تٛع اٛنْ مٜتِندِرْ مٜتٜمٜتٜىٰجِ نغَمْ تٛ طُمْ وَطَنَعٛنْ کِيتَ؞ رَطُّمْ، غَطٛووٛ کِيتَ اٜ دَرِي تٛ دَمُّغَلْ!‏ 10 بَنْدِرَاٻٜ اَمْ، شِفْتٛرٜىٰ اَنَّبٛعٜنْ مٜتُٻٜ ندٜرْ اِنْدٜ جٛومِرَاوٛ، نٛ ٻٜ مُݧِرِ ندٜرْ تٛرَّاجِ؞ تٛکّٜىٰ کٛ ٻٜ نغَطِ؞ 11 اٛنْ اَنْدِ، اٜنْ نٛدِّرَ مُݧُٻٜ بَرْکِطِنَاٻٜ؞ اٛنْ نَنِي نٛ اَيُوبَ مُݧِرِ، ندٜنْ اٛنْ اَنْدِ نٛ جٛومِرَاوٛ بَرْکِطِنِرِمٛ دَغَ غَطَ؞ جٛومِرَاوٛ اٛ کٜوْطٛ يُرْمٜىٰندٜ اٜ يِدّٜ؞

12 بَنْدِرَاٻٜ اَمْ، کٛ ٻُرِ کٛو طُمٜ وٛنِ تٛع اٛنْ کُنٛرٛ دٛوْ، کٛو لٜيْ، کٛو اٜ کٛو اِرِ طُمٜ فِي؞ تٛ اٛنْ پَمَامَ، تٛ طُمْ نٛنْ، مبِعٛنْ ‏«‏اٜىٰ»‏ تَنْ؞ تٛ نَاع طُمْ نٛنْ، مبِعٛنْ ‏«‏اَاعَ»‏ تَنْ؞ نغَطٜىٰ نٛنْ نغَمْ تٛ طُمْ تَپَنَعٛنْ کِيتَ کَلُّکَ؞

13 اٜ وٛودِ جَرٛووٛ تٛرَّ ندٜرْ مٛوطٛنْ؟ تٛو، اٛ وَطَ دٛعَارٜ؞ اٜ وٛودِ نَنٛووٛ بٜلْطُمْ ندٜرْ ٻٜرْندٜ مُوطُمْ؟ تٛو، اٛ يِمَ غِمِ مَنْتُکِ اَللَّه؞ 14 اٜ وٛودِ غٛطّٛ مٛ يَمْطَا ندٜرْ مٛوطٛنْ؟ تٛو، اٛ نٛدَّ مَوْٻٜ ندٜرْ کَوْتَلْ تٛکُّٻٜ يٜىٰسُ، ٻٜ نغَطَنَمٛ دٛعَارٜ، ٻٜ نغَطَنَمٛ نٜبَّمْ دٛوْ حٛورٜ ندٜرْ اِنْدٜ جٛومِرَاوٛ؞ 15 نغَمْ دٛعَارٜ غَطَاندٜ ندٜرْ حٛولَارٜ ندٜ يَمْطِتِنَيْ مٛ يَمْطَا؞ جٛومِرَاوٛ يَمْطِتِنَيْمٛ؞ تٛ اٛ وَطِي حَکّٜ، طُمْ يَافَنْتٛمٛ؞ 16 نغَمْ نٛنْ، مبِعِندِرٜىٰ حَکّٜ طُمْ نغَطّٛنْ، ندٜنْ نغَطِندِرٜىٰ دٛعَارٜ نغَمْ طُمْ يَمْطِتِنَعٛنْ؞ دٛعَارٜ اَادِلِيجٛ اٜ ندٜ وٛودِ بَوْطٜ اٜ ندٜ حُوَ؞ 17 اِلِيَ اٛ نٜطّٛ بٛ مٜىٰطٜنْ؞ اٛ وَطِ دٛعَارٜ نَاع سٜطَّ نغَمْ تٛع ندِيَمْ تٛٻَ تٛ لٜيْدِ ندِنْ، سٜيْ ندٜ طُمْ وَطِ دُوٻِ تَتِ اٜ لٜبِّ جٛوٜىٰغٛعٛ طَمْ تٛٻَايِ؞ 18 ندٜنْ اٛ فُطِّتِ اٛ وَطِ دٛعَارٜ، سٜيْ دٛوْ يٛوفِ ندِيَمْ، لٜيْدِ بٛو وُرْتِنِ کٛو طُمٜ کٛ فُطَتَ؞

19 اٛنٛنْ بَنْدِرَاٻٜ اَمْ، تٛ غٛطّٛ مٛوطٛنْ سٜلِي لَاوٛلْ غٛونغَ، ندٜنْ غٛطّٛ وَرْتِرٛيِيمٛ دٛوْ لَاوٛلْ، 20 اَنْدٜىٰ طُعُمْ:‏ کٛو مٛيٜ سٛعِّ غَطٛووٛ حَکّٜ دَغَ تٛکُّکِ لَاوٛلْ نغٛلْ وٛوطَا، اٛ حِسْنَيْ يٛنْکِ غَطٛووٛ حَکّٜ اٛنْ دَغَ مَيْدٜ، ندٜنْ اٛ وَدَّيْ لَاوٛلْ يَافَاکِ حَکّٜ طُطُّمْ؞